Read Библия- Yakut 2021 Эсфирь 5 Bible Online

Эсфирь 5 - Библия- Yakut 2021 bible

Эсфирь 5

¹Үһүс күнүгэр Эсфирь, сарыыссалыы таҥнан, дыбарыас ис олбуоругар ыраахтааҕы дьиэтин иннигэр киирэн турбута. Ити кэмҥэ ыраахтааҕы дыбарыас аанын утары бүрүстүөлүгэр олороро.

²Кини тиэргэҥҥэ кэлэн турар Эсфирь сарыыссаны исиһиттэн манньыйа көрөн, тутан олорор кыһыл көмүс торуоскатын киниэхэ утары ууммута. Эсфирь чугаһаан кэлэн, торуоска уһугун илиитинэн таарыйбыта.

³«Хайа, Эсфирь сарыысса, эн туох кыһалҕалаах кэллиҥ? — диэн ыйыппыта ыраахтааҕы. — Туох көрдөһүүлээххиний? Саарыстыбам аҥаарын да көрдөөтөххүнэ, эйиэхэ барыта бэриллиэҕэ».

⁴Эсфирь эппитэ: «Күн ыраахтааҕы, сөбүлэһэр буоллаҕына, бүгүн мин ыраахтааҕыга анаан тэрийэр малааһыммар Аманы кытта бииргэ кэлэ сырыттын».

⁵«Аманы түргэнник ыҥыра охсуҥ! — диэбитэ ыраахтааҕы. — Эсфирь эппитинэн буоллун!» Онон ыраахтааҕы Эсфирь бэлэмнээбит малааһыныгар Аманы кытта тиийэн кэлбитэ.

⁶Арыгы иһэ олордохторуна, кини Эсфирьтэн: «Эн туохха баҕара саныыгыный? — диэн ыйыппыта. — Ол барыта эйиэхэ бэриллиэ. Онон туох көрдөһүүлээххиний? Баҕар, саарыстыбам аҥаарын да ыйыт — баҕарбытыҥ барыта туолуо».

⁷«Мин көрдөһөбүнааттаһабын, — диэн хоруйдаабыта киниэхэ Эсфирь, —

⁸өскөтүн ыраахтааҕы миэхэ үтүөтүк сыһыаннаһан мин көрдөһөрбүн оҥоруон, мин ааттаһарбын толоруон баҕарар буоллаҕына, сарсын Аманы кытта бииргэ кэлэн, мин кинилэргэ тэрийэр малааһыммар сырыттын. Дьэ онно мин ыраахтааҕыга этиэҕим».

⁹Ити күн Аман малааһынтан үөрэнкөтөн, санаата улаханнык көнньүөрэн тахсыбыта. Ол иһэн ыраахтааҕы дыбарыаһын олбуорун аанын аттыгар үлэлии олорор Мардохей кини иннигэр турбатаҕыттан, туруохтааҕар дьөрү ымыттан да көрбөтөҕүттэн улаханнык кыыһырбыта эрээри,

¹⁰уордайбыт санаатын кыана туттубута. Дьиэтигэр тиийэн доҕотторун уонна ойоҕун Зереһы ыҥыртаран ылан,

¹¹кини Аман, хайдах курдук аатырансураҕыран, байантайан сылдьарын, элбэх уолаттардааҕын, ыраахтааҕы кинини улуутутан, атын үрдүк сололоохторуттан, чугас үлэһиттэриттэн өрө тутарын — кэпсээн барбыта.

¹²«Аны итини таһынан, — диэбитэ Аман, — бэл Эсфирь сарыысса малааһын тэрийэн баран, онно ыраахтааҕыны кытта атын кими да буолбатах, миигин ыҥырда эбээт! Сарсын эмиэ ыраахтааҕыны кытта киниэхэ барар ыҥырыылаахпын.

¹³Дьэ ол эрээри ыраахтааҕы олбуорун аттыгар ити Мардохей иудей олорорун көрөрүм тухары мин бу үөрүүм кэрэгэй».

¹⁴Онуоха ойоҕо Зерешь уонна доҕотторо бука бары сүбэлээн, киниэхэ эппиттэрэ: «Эн биэс уон тоҕонох[9] үрдүктээх остуолба маһы бэлэмнэт, итиэннэ сарсыарда ыраахтааҕыга тиийэн ол маска Мардохейы ыйаан кэбиһэригэр көрдөс. Дьэ ол кэнниттэн ыраахтааҕыны кытта малааһыҥҥа үөрэкөтө барыс». Аман ити эппиттэрин сөбүлээн, остуолба маһы туруоралларыгар дьаһайбыта.