Read Библия- Yakut 2021 Саалтыр 105 Bible Online

Саалтыр 105 - Библия- Yakut 2021 bible

Саалтыр 105

¹Аллилуия. Айхаллааҥ АЙЫЫ ТОЙОНУ үтүө санаалааҕын иһин; Кини бигэ таптала — үйэлэр тухары.

²Ким АЙЫЫ ТОЙОН сүдү дьайыыларын ситэн кэпсиир кыахтааҕый? Ким Кини албан аатын толору иһитиннэрэр кыахтааҕый?

³Дьоллоохтор даҕаны — көнө дьүүлү тутуһааччылар, хайа да кэмҥэ кырдьыгынан сылдьааччылар!

⁴АЙЫЫ ТОЙОН, Эн норуоккар үтүөтүк сыһыаннастаххына, миигин эмиэ санаар, кинилэри быыһыыргар миигин эмиэ быыһаар.

⁵Оччоҕо Эн талбыт дьонуҥ илгэлээх олоҕун көрүөҕүм, Эн норуоккун кытта бииргэ үөрсүөҕүм, бас билэр дьонуҥ киэн туттуутун үллэстиэҕим.

⁶Биһиги эмиэ өбүгэлэрбит курдук, аньыыга киирдибит; буруйу оҥордубут, хара саҥнаахтык быһыыланныбыт.

⁷Өбүгэлэрбит, Египеккэ сылдьан, Эн сөҕүмэр дьайыыларгын өйдөөбөтөхтөрө, элбэх төгүл көрдөрбүт бигэ тапталгын умнубуттара; кинилэр муора аттыгар, Кыһыл муора аттыгар, Эйигин утары өрө турбуттара.

⁸Ол эрээри АЙЫЫ ТОЙОН, улуу кыаҕын көрдөрөөрү, Бэйэтин аатын туһугар кинилэри өрүһүйбүтэ;

⁹Кини Кыһыл Муораны суостаахтык соруйбутугар, муора кумаҕынан көрбүтэ, онон Кини норуотун байҕал түгэҕинэн, кураанах сиринэн ааһардыы, туораппыта.

¹⁰Абааһы көрөөччүлэртэн кинилэри быыһаан ылбыта, өстөөх илиититтэн өрүһүйбүтэ.

¹¹Оттон утарсааччыларын уу саба халыйбыта, биир да киһилэрэ ордубатаҕа.

¹²Дьэ онуоха Кини тылын итэҕэйбиттэрэ, Киниэхэ айхал ырыатын ыллаабыттара.

¹³Ол да үрдүнэн бэрт сотору Кини дьайыыларын умнубуттара, Кини сүбэлиирин кэтэһиэхтэрин баҕарбатахтара.

¹⁴Кураайы дуолга сылдьан, туохха да баҕалара хаммакка, Таҥара тулуурун тургутан көрөллөрө.

¹⁵Кини көрдөспүттэрин толорбута эрээри, кинилэргэ ыарыыны ыыппыта.

¹⁶Кинилэр, отууламмыт түөлбэлэригэр олорон, Моисейы уонна АЙЫЫ ТОЙОН сибэтиэйин Аарону ордугургуу саныыр буолбуттара;

¹⁷ол иһин сир, силлэн, Дафаны ыйыстыбыта, Авирон дьиэ кэргэнин буорунан көммүтэ;

¹⁸үрдүлэригэр уот умайан күүдэпчилэммитэ, хара санаалаахтары төлөн хаарыйан өлөрбүтэ.

¹⁹Онтон аны Хоривка оҕуһу кутан оҥорон баран, ол кутуу эмэгэккэ сүгүрүйбүттэрэ,

²⁰Таҥара кэрэмэн килбиэнин от аһылыктаах оҕуска кубулуппуттара.

²¹Кинилэр Египет сиригэр улууну оҥорбут, Хам сиригэр дьиктини көрдөрбүт, Кыһыл Муора таһыгар дьулааннык дьайбыт Таҥараны, Быыһааччыларын, умнубуттара.

²²

²³Ол иһин Таҥара кинилэри имири эһиэн баҕарбытыгар, Кини талан ылбыт киһитэ Моисей, Таҥара норуотун эспэтин диэн, Кини уорун уҕарытаары, иннигэр киирэн, хайа хапчаҕайыгар турбута.

²⁴Кинилэр, Таҥара эрэннэриитин итэҕэйбэт буоланнар, баҕалаах сирдэрин улахаҥҥа уурбатахтара.

²⁵Отууларыгар олорон суланаллара, АЙЫЫ ТОЙОН саҥатын истибэттэрэ.

²⁶Ол иһин Кини, илиитин өрө уунан туран, эһигини кураайы дуолга имири эһиэм, оттон удьуордаргытын сир устун омуктар ортолоругар ыһыам диэн андаҕайбыта.

²⁷

²⁸Онтон аны Ваал-Фегорга[33] бас бэринэннэр, эмэгэттэргэ бэриллибит кэрэх этин сиир буолбуттара;

²⁹АЙЫЫ ТОЙОНУ аньыылаах дьайыыларынан кыйахааннар, кинилэри ыарыы буулаабыта.

³⁰Онно Финеес туран буруйдаахтары дьүүллээбитигэр, ыарыы-сүтүү дьэ тохтообута.

³¹Ол иһин көлүөнэттэн көлүөнэҕэ, үйэттэн үйэҕэ кини дьүүлэ кырдьыктааҕынан ааҕыллыбыта.

³²Онтон Мерива уутун таһыгар АЙЫЫ ТОЙОНУ кыыһырданнар, Кини уора-кылына Моисей үрдүнэн барбыта.

³³Ол курдук Моисей, кинилэртэн хомойон, онно сыыһа-халты тылласпыта.

³⁴АЙЫЫ ТОЙОН эһиҥ диэбит норуоттарын кинилэр имири эспэтэхтэрэ;

³⁵хата, туора омуктары кытта булкуһан, олор үгэстэригэр үөрэммиттэрэ;

³⁶кинилэр эмэгэттэригэр сүгүрүйэн, угаайыга киирэн биэрбиттэрэ.

³⁷Уолаттарын-кыргыттарын абааһыларга кэрэх туппуттара;

³⁸кинилэр буруйа суохтар хааннарын — Ханаан эмэгэттэригэр кэрэх туппут уолаттарын-кыргыттарын хааннарын тоҕон, сир үрдүн киртиппиттэрэ.

³⁹Онон аньыыны оҥорон, киргэ-дьайга булкуллубуттара, содур быһыыламмыттара.

⁴⁰АЙЫЫ ТОЙОН, норуотугар уордайан, Бэйэтин дьонуттан сиргэнэр буолбута,

⁴¹онон кинилэри омуктар илиилэригэр туран биэрбитэ; абааһы көрөр дьон кинилэргэ тойон буолбуттара.

⁴²Өстөөхтөрө кинилэри ыгаллара-түүрэллэрэ, бэйэлэригэр бас бэриннэрэн сыһыталлара.

⁴³Кини норуотун элбэх төгүл өрүһүйбүтэ да, Киниэхэ утарылаһар хаҥыл санааларын уларыппатахтара, онон, буруйдарын-сэмэлэрин иһин, баттана-үктэнэ сылдьыбыттара.

⁴⁴Ол да үрдүнэн Кини, энэлийэр саҥаларын истэр буолан, эрииргэ түбэспиттэрин аһына көрөрө.

⁴⁵Кинилэргэ эппит кэс тылын өйдүү сылдьара, муҥура суох таптыыр буолан, кинилэри аһынар этэ.

⁴⁶Онон билиэн ылбыттар сүрэхтэригэр барыларыгар эмиэ аһынар санааны үөскэтэрэ.

⁴⁷Быыһаа биһигини, АЙЫЫ ТОЙОН Таҥарабыт; уонна, Эн сибэтиэй ааккын айхаллыырбыт, Эн албан ааккынан күөн туттарбыт туһугар, биһигини норуоттар ортолоруттан хомуйан ыл.

⁴⁸Алгыс буоллун АЙЫЫ ТОЙОҤҤО, Израиль Таҥаратыгар, үйэттэн үйэҕэ диэри. Норуот бүттүүнэ этиэхтин: «Аминь!» Аллилуия.