Read Библия- Yakut 2021 Саалтыр 113 Bible Online

Саалтыр 113 - Библия- Yakut 2021 bible

Саалтыр 113

¹Израиль Египеттэн тахсыбытыгар, Иаков норуота атын тыллаах норуоттан барбытыгар,

²Иуда АЙЫЫ ТОЙОН сибэтиэй норуота, Израиль Кини бас билиитэ буолбута.

³Муора ону көрөн, киэр куоппута, Иордан эмиэ төттөрү устубута.

⁴Хайалар барааннар курдук ыстаҥаласпыттара, томтордор бараан оҕолорунуу ойуоккаласпыттара.

⁵Тоҕо эн, муора, маннык куоттуҥ? Тоҕо эн, Иордан, төттөрү уһуннуҥ?

⁶Тоҕо, хайалар, барааннар курдук ыстаҥалаһаҕыт, томтордор бараан оҕолорунуу ойуоккалаһаҕыт?

⁷Титирэстээ, сир, АЙЫЫ ТОЙОН иннигэр, туруук хайаны толору уулаах күөлгэ кубулутар, тааһы уу төрдө оҥорор Иаков Таҥаратын иннигэр!

⁹Биһигини буолбатах, АЙЫЫ ТОЙОН, биһигини буолбатах — бигэ тапталыҥ уонна кырдьыгыҥ туһугар, Бэйэҥ ааккын албан аатырт.

¹⁰Тоҕо туора омуктар биһигини: «Таҥаралара ханнаный?» — диэхтээхтэрий?

¹¹Биһиги Таҥарабыт халлааннарга баар; Кини тугу баҕарбытын барытын оҥорор.

¹²Оттон кинилэр эмэгэттэрэ үрүҥ көмүс, кыһыл көмүс — киһи илиитинэн оҥоһуга.

¹³Айахтаахтар да, саҥарбаттар, харахтаахтар да, көрбөттөр;

¹⁴кулгаахтаахтар да, истибэттэр, таныылаахтар да, сыты ылбаттар,

¹⁵илиилээхтэр да, тутан-хабан билбэттэр, атахтаахтар эрээри, хаампаттар; куолайдарыттан саҥа дорҕоонун таһаарбаттар.

¹⁶Кинилэри оҥорооччулар бэйэлэрэ эмиэ ситигирдиктэр; кинилэргэ эрэнээччилэр эмиэ атына суохтар.

¹⁷Израиль! АЙЫЫ ТОЙОҤҤО эн эрэн; Кини биһиэхэ көмөлөһөр, биһиэхэ куйах буолар.

¹⁸Аарон дьиэтэ! АЙЫЫ ТОЙОҤҤО эн эрэн; Кини биһиэхэ көмөлөһөр, биһиэхэ куйах буолар.

¹⁹АЙЫЫ ТОЙОНТОН куттанааччылар! АЙЫЫ ТОЙОҤҤО эһиги эрэниҥ; Кини биһиэхэ көмөлөһөр, биһиэхэ куйах буолар.

²⁰АЙЫЫ ТОЙОН биһигини умнубат, Кини биһигини алгыаҕа: алгыаҕа Израиль дьиэтин, алгыаҕа Аарон дьиэтин;

²¹Кини АЙЫЫ ТОЙОНТОН куттанааччылары, кыраны да, улууну да, — барыларын алгыаҕа.

²²АЙЫЫ ТОЙОН ууһата турдун эһиги удьуоргутун, бэйэҕит да, оҕолоргут да оҕолорун.

²³Сири-халлааны айбыт АЙЫЫ ТОЙОН эһигини алгыахтын.

²⁴Халлаан — АЙЫЫ ТОЙОН халлаана, оттон сири Кини киһиэхэ биэрбитэ.

²⁵Өлбүттэр АЙЫЫ ТОЙОНУ айхаллыахтара суоҕа, ииҥҥэ түһээччилэр Кинини уруйдуохтара суоҕа —

²⁶биһиги айхаллыахпыт АЙЫЫ ТОЙОНУ аны мантан инньэ үйэлэр тухары. Аллилуия.