Read Библия- Yakut 2021 Саалтыр 117 Bible Online

Саалтыр 117 - Библия- Yakut 2021 bible

Саалтыр 117

¹Айхаллааҥ АЙЫЫ ТОЙОНУ үтүө санаалааҕын иһин; Кини бигэ таптала — үйэлэр тухары.

²Этиэхтин Израиль: «Кини бигэ таптала — үйэлэр тухары».

³Этиэхтин Аарон дьиэтэ: «Кини бигэ таптала — үйэлэр тухары».

⁴Этиэхтиннэр АЙЫЫ ТОЙОНТОН куттанааччылар: «Кини бигэ таптала — үйэлэр тухары».

⁵Кыһарҕаҥҥа түбэһэн АЙЫЫ ТОЙОНУ ыҥырбыппар, АЙЫЫ ТОЙОН миигин истэн, киэҥ дуолга таһаарда.

⁶АЙЫЫ ТОЙОН мин диэки, онон куттаммаппын: муҥур үйэлээх миэхэ тугу оҥоруой?

⁷АЙЫЫ ТОЙОН мин диэки, Кини миэхэ көмөлөһөр; миигин абааһы көрөөччүлэри мин өрөгөйдүү көрүөҕүм.

⁸Киһиэхэ эрэниэхтээҕэр АЙЫЫ ТОЙОҤҤО эрэммит быдан ордук.

⁹Кинээстэргэ эрэниэхтээҕэр АЙЫЫ ТОЙОҤҤО эрэммит быдан ордук.

¹⁰Бары норуоттар миигин иилээбиттэрэ эрээри, АЙЫЫ ТОЙОН аатынан мин кинилэри самнардым!

¹¹Тула өттүбүттэн төгүрүйэн туран ыкпыттара эрээри, АЙЫЫ ТОЙОН аатынан мин кинилэри самнардым!

¹²Ыҥырыа үөрэ буолан тулалаабыттара эрээри, хагдаҥ оттуу күлүм эрэ гынан хааллылар; АЙЫЫ ТОЙОН аатынан мин кинилэри самнардым!

¹³Күүскэ үтүрүйэннэр, сүһүөхпүн сүтэрэн эрдэхпинэ, АЙЫЫ ТОЙОН миэхэ көмөлөстө.

¹⁴АЙЫЫ ТОЙОН — мин күүһүм-тирэҕим, мин ырыам, Кини миигин быыһаан ылла.

¹⁵Кырдьыктаах дьон отууларыттан кыайыы үөрүүлээх ырыата ньиргийэр: «АЙЫЫ ТОЙОН уҥа илиитэ улуу дьайыылары оҥорор.

¹⁶АЙЫЫ ТОЙОН уҥа илиитин өрө көтөхпүт; АЙЫЫ ТОЙОН уҥа илиитэ улуу дьайыылары оҥорор».

¹⁷Мин өлүөм суоҕа, тыыннаах хаалыаҕым, АЙЫЫ ТОЙОН дьайыыларын иһитиннэриэҕим.

¹⁸АЙЫЫ ТОЙОН миигин кытаанахтык дьарыйда эрээри, өлөр өлүүгэ туран биэрбэтэ.

¹⁹АЙЫЫ ТОЙОНУ айхаллыы киириэхпин, кырдьык аанын миэхэ аһан биэриҥ.

²⁰Бу — АЙЫЫ ТОЙОН олбуорун аана, кырдьыктаах дьон манан киириэҕэ.

²¹Айхал этэбин Эйиэхэ, миигин истибитиҥ иһин, миигин быыһаан ылбытыҥ иһин.

²²Тутааччылар сирэн бырахпыт таастара муннук тутаах тааһа буолла.

²³Бу — АЙЫЫ ТОЙОН оҥоһуута, биһиги маны көрө сөҕөбүт.

²⁴Бу — АЙЫЫ ТОЙОН айбыт күнэ, үөрүөҕүҥ, өрөгөйдүөҕүҥ бу күҥҥэ.

²⁵Оо, АЙЫЫ ТОЙОН, быыһаа! Оо, АЙЫЫ ТОЙОН, ситиһиитэ бэлэхтээ!

²⁶АЙЫЫ ТОЙОН аатыгар кэлээччи — алгыстаах. АЙЫЫ ТОЙОН Дьиэтиттэн биһиги эһигини алгыыбыт.

²⁷АЙЫЫ ТОЙОН — Таҥара, Кини биһигини сырдыгынан сыдьаайда; быалааҥ бырааһынньык сиэртибэтин, сиэртибэнньик муоһугар сиэтэн илдьиҥ.

²⁸Эн буолаҕын мин Таҥарам: Эйигин мин айхаллыам; Эн буолаҕын мин Таҥарам: Эйигин мин уруйдуом.

²⁹Айхаллааҥ АЙЫЫ ТОЙОНУ үтүө санаалааҕын иһин; Кини бигэ таптала — үйэлэр тухары.