Библия- Yakut 2021 bible online

Саалтыр 118

¹[36] Ким омнуота суох олохтоох, АЙЫЫ ТОЙОН Сокуонун тутуһар, ол дьоллоох.

²Ким Кини туоһулуур кырдьыгын харыстыыр, Кинини бүтүн сүрэҕинэн көрдүүр,

³ким буруйу-сэмэни оҥорбот, Кини суолларынан сылдьар, ол дьоллоох.

⁴Ыйарбын-кэрдэрбин бигэтик тутуһуҥ диэн, Эн биһигини соруйбутуҥ.

⁵Оо, Эн сокуоннаргын тутуһаммын, көнө суолунан куруутун сырыттарбын!

⁶Оччоҕо, бары кэриэскин анаардахпына, кыбыстыыга киириэм суоҕа этэ;

⁷кырдьыктаах уураахтаргар үөрэнэммин, көнө сүрэхпиттэн Эйигин айхаллыам этэ.

⁸Эн сокуоннаргын мин тутуһуом; миигин букатыннаахтык хаалларыма.

⁹Хайдах гынан, эдэр киһи ыраас суолланыан сөбүй? Эн тылгынан бэйэтин харыстанан.

¹⁰Бүтүн сүрэхпинэн мин Эйигин көрдүүбүн; миигин кэриэстэргиттэн тэйитимэ.

¹¹Эн иннигэр аньыыны оҥорбот туһугар, мин сүрэхпэр Эн тылгын сөҥөртүм.

¹²Алгыстааххын Эн, АЙЫЫ ТОЙОН; миигин сокуоннаргар үөрэт;

¹³Эн уураахтаабыккын барытын мин биир-биир доргуччу ааҕабын.

¹⁴Эн туоһулаабыт кырдьыгыҥ суолунан иһэммин, хайа да баайга тиксибиттээҕэр ордук үөрэбин.

¹⁵Эн ыйыыларгын мин ырыҥалыам, суолгун-иискин анаарыам.

¹⁶Сокуоҥҥун толорон дуоһуйуом, умнуом суоҕа эппит тылгын.

¹⁷Кулуккар аһыныылаахтык сыһыаннас, оччоҕо тыыннаах хаалан, Эн тылгын тутуһуом.

¹⁸Харахпын ас, оччоҕо мин көрүөм Эн Сокуонуҥ сөҕүмэр дьиктилэрин.

¹⁹Бу сиргэ мин ааһан иһэр айанньыппын эрэ; миигиттэн кэриэстэргин кистээмэ.

²⁰Эн көнө дьүүлгүн өрүү көрүөхпүн баҕаран, дууһам туорхаһыйар.

²¹Бэрдимсиктэри, кырыыстаахтары, кэриэстэргиттэн туорааччылары, Эн сыһыттыҥ;

²²миигин кинилэр үөҕүүлэриттэн, сэнэбиллэриттэн өрүһүй; Эн туоһулаабыт кырдьыккын мин тутуһабын.

²³Кинээстэр миигин утары куомуннаһа олороллор, оттон кулутуҥ Эн сокуоннаргын анаарар.

²⁴Эн туоһулуур кырдьыгыҥ миигин дуоһутар, миэхэ сүбэһитим буолар.

²⁵Дууһам сиргэ-буорга тэпсилиннэ; эрэннэрбитиҥ курдук, миигин тилиннэр.

²⁶Суолбун-ииспин Эйиэхэ арыйбыппын Эн иһиттиҥ; миигин сокуоннаргар үөрэт.

²⁷Ыйар суолгун таба өйдүүрбэр көмөлөс, оччоҕо Эн дьикти дьайыыларгын ырыҥалыам.

²⁸Дууһам кутурҕаҥҥа ылларан, ууллан тохтон эрэр; эрэннэрбиккин толорон, миигин бөҕөргөт.

²⁹Сымыйа суолтан араҥаччылаа; Эн Сокуоҥҥунан олорорго амарахтык үөрэт.

³⁰Мин бэриниилээх буолуу суолун талбытым, Эн уураахтаргын иннибэр ууруммутум.

³¹Эн туоһулуур кырдьыккын мин тутуһабын, АЙЫЫ ТОЙОН; миигин саакка киллэртэримэ.

³²Мин өйбүн-санаабын кэҥэттэххинэ, олоҕум Эн кэриэстэриҥ суолунан устуоҕа.

³³Ыйан биэр миэхэ, АЙЫЫ ТОЙОН, ыйаахтарыҥ суолун, оччоҕо мин тиһэх күммэр диэри онон сылдьыаҕым.

³⁴Миигин өйдөт, оччоҕо Эн Сокуоҥҥун тутуһуоҕум, бүтүн сүрэхпинэн киниэхэ бас бэриниэҕим.

³⁵Кэриэстэриҥ суолунан Эн миигин сирдээ, мин атын суолунан сылдьыахпын баҕарбаппын.

³⁶Барыс иҥсэтин сүрэхпэр үөскэтимэ, Бэйэҥ туоһулуур кырдьыккынан миигин умсугут;

³⁷сүпсүктэн мин харахпын тэйит, Эн суолгунан барар олоҕу миэхэ биэр[37].

³⁸Атыттар эмиэ Эйигиттэн толлоллорун туһугар, кулуккар эрэннэрбиккин толор.

³⁹Эн амарахтык дьүүллүүгүн; ити дьулаан үөҕүүттэн миигин өрүһүй.

⁴⁰Эн ыйаргын толоруохпун баҕарабын; кырдьыктаах Бэйэҥ миэхэ саҥа олоҕу бэлэхтээ.

⁴¹Эн бигэ тапталыҥ миэхэ тосхойдун, АЙЫЫ ТОЙОН, Эн эрэннэрбит быыһабылыҥ кэлиэхтин;

⁴²оччоҕо мин, Эн тылгар эрэнээччи, миигин хараардар киһиэхэ хардарыаҕым.

⁴³Кырдьыгы этэр кыаҕы миигиттэн былдьаама; Эн көнө дьүүлгэр мин эрэнэбин.

⁴⁴Эн Сокуоҥҥун тутуһуом өрүүтүн — үйэттэн үйэлэр тухары.

⁴⁵Эн ыйаахтаргын көрдөөн буллум, онон аны көҥүллүк сылдьар буолуом.

⁴⁶Ыраахтааҕыларга Эн туоһулуур кырдьыккын иһитиннэриэм, онно кыбыстыыга киириэм суоҕа.

⁴⁷Эн кэриэстэргин таптыыр буоламмын, кинилэри тутуһан дуоһуйабын.

⁴⁸Таптыыр кэриэстэрбэр икки илиибин уунабын; Эн ыйаахтаргын мин анаарабын.

⁴⁹Өйдөө кулуккар эппит тылгын, Эн тылыҥ миэхэ эрэл кыымын сахпытын.

⁵⁰Ол уоскутар миигин кыһалҕалаах кэммэр, Эн эрэннэрииҥ миэхэ олоҕу биэрэр.

⁵¹Бэрдимсиктэр миигин сирэйэ-хараҕа суох үөҕэллэр, ол эрээри Эн Сокуоҥҥуттан мин тэйбэппин.

⁵²Эн былыргыттан баар уураахтаргын санаатахпына, АЙЫЫ ТОЙОН, дууһам уоскуйар.

⁵³Эн Сокуоҥҥун хаалларар хара дьайдаахтары мин ис дууһабыттан абара-сатара көрөбүн.

⁵⁴Ханна да айанныы сырыттарбын, Эн ыйыыларгын ырыа гынан ыллыыбын.

⁵⁵Түүнүн эмиэ Эн ааккын өйдүүбүн, АЙЫЫ ТОЙОН, Эн Сокуоҥҥун кэспэппин.

⁵⁶Эн ыйыыларгын тутуһуу миэхэ үгэһим буолла.

⁵⁷АЙЫЫ ТОЙОН — мин аналым; Эн тылгын толоруом диэн, Эйиэхэ эрэннэрэбин.

⁵⁸Бүтүн сүрэхпинэн дьулуһабын Эн үтүө сыһыаҥҥар; эрэннэрбитиҥ курдук, миигин абыраа-аһын.

⁵⁹Эн суолларгын санаатахпына, хардыыбын Эн туоһулуур кырдьыккар салайабын.

⁶⁰Биэрбит кэриэстэргин уталыта барбакка, түргэнник толорорго тиэтэйэбин.

⁶¹Төһө да хара дьайдаахтар тулабар угаайы оҥордоллор, Эн Сокуоҥҥун умнубаппын.

⁶²Көнө дьүүлүҥ иһин Эйигин уруйдаары, мин түүн ортото турабын.

⁶³Эйигиттэн куттанар, Эн ыйаргын тутуһар дьон бука бары миэхэ доҕотторум буолаллар.

⁶⁴Сир үрдүн, АЙЫЫ ТОЙОН, Эн бигэ тапталыҥ толорбут; миигин Бэйэҥ сокуоннаргар үөрэт.

⁶⁵Эппит тылгын тутуһан, АЙЫЫ ТОЙОН, Эн кулуккар үтүөнү оҥордуҥ.

⁶⁶Эн кэриэстэргэр мин эрэнэбин; миигин чөл өйдөөх, билиилээх буоларга үөрэт.

⁶⁷Эрэйи көрүөм иннинэ мунар-тэнэр буоларым, оттон билигин Эн тылгын толоробун.

⁶⁸Үтүө санаалааххын Эн, үтүөнү оҥороҕун; миигин сокуоннаргар үөрэт.

⁶⁹Киэмсиктэр мин туспунан сымыйаны тиһэллэр, оттон мин Эн ыйыыларгын ис сүрэхпиттэн толоробун.

⁷⁰Кинилэр сүрэхтэрэ сыа буолбут, оттон мин Эн үөрэххинэн дуоһуйабын.

⁷¹Эрэйи көрбүтүм миэхэ үчүгэйинэн эргийдэ — Эн сокуоннаргар мин үөрэнним.

⁷²Эн иһитиннэрбит үөрэҕиҥ миэхэ тыһыынчанан кыһыл да, үрүҥ да көмүстээҕэр ордук.

⁷³Миигин Эн илииҥ айбыта, дьүһүммүн нарылаан биэрбитэ; өйдөтөн биэр миэхэ, оччоҕо Эн кэриэстэргэр мин үөрэниэм.

⁷⁴Эн тылгар эрэнэрим иһин, Эйигиттэн куттанааччылар миигин үөрэ көрүөхтэрэ.

⁷⁵Мин билэбин, АЙЫЫ ТОЙОН, Эн дьүүлүҥ кырдьыктааҕын, кырдьыгы көрөр буолаҥҥын, миигин дьарыйбыккын.

⁷⁶Миэхэ, кулуккар, эрэннэрбитиҥ курдук, Эн бигэ тапталыҥ миигин уоскутуохтун.

⁷⁷Эн амарах сыһыаныҥ миэхэ тосхойдун, оччоҕо тыыннаах хаалыам; Эн Сокуоҥҥуттан мин үөрүүнү булабын.

⁷⁸Сааттыннар миигин олоҕо суох баттыыр бэрдимсиктэр; оттон мин Эн ыйыыларгын ырыҥалыам.

⁷⁹Миэхэ кэллиннэр Эйигиттэн сүгүрүйэ толлор, Эн туоһулаабыт кырдьыккын билэр дьон.

⁸⁰Кыбыстыыга киирбэтим туһугар, сүрэҕим, Эн сокуоннаргын ылынан, эҥкилэ суох ыраас буоллун.

⁸¹Хаһан миигин быыһыыргын кэтэһэн, дууһам туорхаһыйар; Эн тылгар мин эрэнэбин.

⁸²Эн эрэннэрбиккин хараҕым сылайыар диэри кэтэһэбин; ол иһин ыйытабын: «Хаһан миигин уоскутаҕын?»

⁸³Буруо быһа сиэбит сирии иһитин курдук да буолларбын, Эн сокуоннаргын умнубаппын.

⁸⁴Хаһааҥҥа диэри мин, Эн кулутуҥ, тулуйабын? Хаһан миигин күөмчүлээччилэри дьүүллүүгүн?

⁸⁵Бэрдимсиктэр миэхэ иин хаспыттар; кинилэр Эн Сокуоҥҥун утараллар.

⁸⁶Эн кэриэстэриҥ бары эрэбиллэр; буруйа суоҕум үрдүнэн сойуолууллар, миэхэ көмөлөс.

⁸⁷Бу сиргэ миигин өлөрө сыстылар, ол да буоллар, Эн ыйыыларгын кэспэтим.

⁸⁸Үтүө санааҕыттан олохпун араҥаччылаа, Эн туоһулуур кырдьыккын мин тутуһуом.

⁸⁹Эн тылыҥ, АЙЫЫ ТОЙОН, үйэлэргэ барардыы, халлааннарга бигэргэтиллибит.

⁹⁰Эн кырдьыгыҥ көлүөнэттэн көлүөнэҕэ уларыйбат; сири Эн олохтообутуҥ, ол иһин сир тулхадыйбат.

⁹¹Туох барыта билиҥҥэ диэри Эн быһаарыыгынан турар, баар барыта Эйиэхэ үлэлиир.

⁹²Эн Сокуоҥҥунан дуоһуйбатым эбитэ буоллар, сор суолланан өлбүтүм ырааппыт буолуо этэ.

⁹³Эн ыйбыккын хаһан да умнуом суоҕа; миигин ыйан-кэрдэн, Эн миэхэ олоҕу биэрбитиҥ.

⁹⁴Эйиэнэбин эбээт мин, миигин быыһаа; Эн ыйыыларгын тутуһарга мин дьулуһабын.

⁹⁵Хара дьайдаахтар миигин өлөрөөрү манаһаллар, оттон мин Эн туоһулаабыт кырдьыккын анаарабын.

⁹⁶Хайа да үчүгэй барыта бүтэр уһуктааҕын мин көрдүм, арай Эн кэриэһиҥ муҥурун булларбат.

⁹⁷Оо, таптыыбын даҕаны Эн Сокуоҥҥун! Уһун күнү быһа ону өйдүү-саныы сылдьабын.

⁹⁸Мин сүрэхпэр кэриэстэргин иҥэрэн, Эн миигин өстөөхтөрбүнээҕэр муударай оҥордуҥ.

⁹⁹Эн туоһулуур кырдьыккын анаараммын, бары учууталларбынааҕар ордук өйдүүр буоллум.

¹⁰⁰Эн ыйаргын-кэрдэргин тутуһаммын, кырдьаҕастардааҕар ордук билиилэнним.

¹⁰¹Эн тылгын толорор туһугар, ханнык да куһаҕан суолтан мин дьалты хаамабын.

¹⁰²Миигин Эн үөрэтэр буолаҥҥын, уураахтаргыттан туораабаппын.

¹⁰³Минньигэс да буоллаҕа Эн тылыҥ-өһүҥ! Мүөттээҕэр минньигэс.

¹⁰⁴Эн ыйыыларгыттан мин муудараһы сомсобун; хайа да албын суолу абааһы көрөбүн.

¹⁰⁵Эн тылыҥ мин суолбун сырдатар, мин сылдьар ыллыкпын сандаардар.

¹⁰⁶Кырдьыктаах уураахтаргын тутуһуом диэн, Эйиэхэ биэрбит андаҕарбын мин толоруом.

¹⁰⁷Ыар санааҕа мин баттаттым, АЙЫЫ ТОЙОН; эрэннэрбитиҥ курдук, миигин тилиннэр.

¹⁰⁸Айхал этэрбин, АЙЫЫ ТОЙОН, көҥүл өттүнэн бэриллэр сиэртибэ курдук ылын уонна миигин уураахтаргар үөрэт.

¹⁰⁹Төһө да олохпор куруутун куттал суоһаатар, Эн Сокуоҥҥун умнубаппын.

¹¹⁰Хара дьайдаахтар миэхэ угаайы оҥорбуттар, ол да буоллар, Эн ыйыыларгын кэспэтим.

¹¹¹Эн туоһулуур кырдьыгыҥ үйэлэр тухары — мин аналым, мин сүрэҕим үөрүүтэ.

¹¹²Мин үйэм тухары, тиһэҕэр да диэри, Эн сокуоннаргын тутуһар санаалаахпын.

¹¹³Икки сирэй буолааччылары мин абааһы көрөбүн, Эн Сокуоҥҥун таптыыбын.

¹¹⁴Эн миэхэ халыҥ хаххам, бөҕө куйаҕым буолаҕын; Эн тылгар мин эрэнэбин.

¹¹⁵Киэр кэбэлийиҥ миигиттэн, куһаҕаны оҥорооччулар, мин Таҥарам кэриэстэрин тутуһуом.

¹¹⁶Эрэннэрбитиҥ курдук, миигин бөҕөргөт, оччоҕо мин тыыннаах хаалыам; эрэлбин сиргэ-буорга тэбистэримэ.

¹¹⁷Миигин өйөө, оччоҕо быыһаныам, Эн сокуоннаргын өрүү өйдүү-саныы сылдьыам.

¹¹⁸Сокуоннаргын тутуспат дьону Эн самнараҕын; киитэрэйдээн да, кинилэр туһамматтар.

¹¹⁹Сир нэгэйдэрин барыларын Эн киэр сиппийэҕин, ол иһин мин таптыыбын Эн туоһулуур кырдьыккын.

¹²⁰Эйигиттэн мин уҥуоҕум хамсыар диэри куттанабын, Эн дьүүлгүттэн дьулайабын.

¹²¹Мин өрүү сөптөөҕүнэн, сиэрдээҕинэн сылдьарым; миигин күөмчүһүттэргэ биэримэ.

¹²²Кулутуҥ этэҥҥэ сылдьарын туһугар кинини көмүскээ, бэрдимсиктэргэ атаҕастатыма.

¹²³Хаһан быыһаан ыларгын, кырдьыктаах тылыҥ туоларын, хараҕым сылайыар диэри, кэтэһэбин.

¹²⁴Кулуккар миэхэ үтүөтүк сыһыаннас, сокуоннаргар миигин үөрэт.

¹²⁵Кулутуҥ буолабын эбээт мин; миигин өйдөт, оччоҕо Эн туоһулаабыт кырдьыккын билиэм.

¹²⁶АЙЫЫ ТОЙОН күүһүн көрдөрөр кэмэ кэллэ: Эн Сокуоҥҥун үрэйдилэр.

¹²⁷Оттон мин Эн кэриэстэргин кыһыл көмүстээҕэр, ыраас кыһыл көмүстээҕэр ордоробун.

¹²⁸Эн ыйарыҥ барыта кырдьыктааҕын билэбин, ханнык да албын суолу абааһы көрөбүн.

¹²⁹Эн туоһулуур кырдьыгыҥ дьикти үчүгэй, ол иһин мин ону ис дууһабыттан тутуһабын.

¹³⁰Эн тылыҥ, суолтата арыллан, сырдыгы бэлэхтиир, кэнэннэри өйдөтөр.

¹³¹Эн кэриэстэргин истиэхпин утаппыттыы баҕаран, мин дириҥник өрүтэ тыынабын.

¹³²Оо, хайыс мин диэки; Эн ааккын таптыыр дьону аһынарыҥ курдук, миигин эмиэ аһын-харыһый.

¹³³Эрэннэрбиккин толорон, хардыыбын чиҥэтэн биэр, ханнык да хара дьайга бас бэриннэртэримэ.

¹³⁴Эппит кэриэстэргин тутуһарым туһугар, дьон батталыттан миигин өрүһүй.

¹³⁵Эн сирэйиҥ сырдыга кулуккар сыдьаайдын, миигин сокуоннаргар үөрэт.

¹³⁶Эн Сокуоҥҥун тутуспаттарын иһин көмүскэм уута үрүйэ уутунуу сүүрэр.

¹³⁷АЙЫЫ ТОЙОН, Эн кырдьыктааххын, дьүүлүҥ Эйиэнэ барыта сөптөөх.

¹³⁸Эн тутуһуҥ диэн биһиэхэ биэрбит уураахтарыҥ кырдьыктаахтар, эҥкилэ суох көнөлөр.

¹³⁹Өстөөхтөрүм Эн тылгын умнубуттарын көрөммүн, уоҕум-кылыным уоттуу оргуйар.

¹⁴⁰Эн эрэннэрэр тылыҥ — кыһаҕа уһаарыллыбыт бигэ тыл; кулутуҥ Эн тылгын таптыыр.

¹⁴¹Мин кырабын-харабын, сэнэбилгэ сылдьабын, ол да буоллар, Эн ыйыыларгын умнубаппын.

¹⁴²Эн кырдьыктаах быһыыҥ үйэлэр тухары уларыйбат, Эн Сокуонуҥ — дьиҥ кырдьык.

¹⁴³Төһө да эрииргэ түбэһэн муҥҥа буулаттарбын, Эн кэриэстэргиттэн мин үөрүүнү булабын.

¹⁴⁴Эн туоһулаабыт кырдьыгыҥ өлбөт үйэлээх; олохпун сөпкө олорорум туһугар миигин өйдөт.

¹⁴⁵Бүтүн сүрэхпинэн мин Эйигин ыҥырабын: иһит миигин, АЙЫЫ ТОЙОН, Эн сокуоннаргын мин толоруом.

¹⁴⁶Эйигин ыҥырабын; миигин быыһаа, оччоҕо Эн туоһулуур кырдьыккын тутуһуом.

¹⁴⁷Күн тахсыан иннинэ тураммын, Эйигиттэн көрдөһөбүн; Эн тылгар мин эрэнэбин.

¹⁴⁸Уһун түүнү быһа утуйбакка, Эн миэхэ эрэннэрбиккин саныыбын.

¹⁴⁹Үтүө санааҕыттан миигин иһит, АЙЫЫ ТОЙОН; көнөтүк дьүүллээн, олохпун араҥаччылаа.

¹⁵⁰Хара санаалаах сойуолааччылар миэхэ ыга кэллилэр, кинилэр Эн Сокуоҥҥуттан ыраахтар.

¹⁵¹АЙЫЫ ТОЙОН, Эн миэхэ чугаскын; Эн кэриэстээбитиҥ барыта — дьиҥ кырдьык.

¹⁵²Өр буолла мин Эн туоһулуур кырдьыккын — ону Эн үйэлэргэ бигэргэппиккин — билбитим.

¹⁵³Бу түбэспит эрэйбин көрөҥҥүн, миигин өрүһүйэн ыл; Эн Сокуоҥҥун мин умнубаппын.

¹⁵⁴Киирис мин дьыалабар, миигин толуйан ыл; эрэннэрбитиҥ курдук, тыыннаах хааллар.

¹⁵⁵Хара дьайдаахтар быыһаналлара ыраах, кинилэр Эн ыйаахтаргын көрдөөбөттөр.

¹⁵⁶АЙЫЫ ТОЙОН, Эн амарах санааҥ муҥура суох; көнөтүк дьүүллээн, миэхэ олоҕу бэлэхтээ.

¹⁵⁷Миигин күөмчүлээччи, миэхэ өстүйээччи үксэ-дьүүлэ биллибэт, ол да буоллар, Эн туоһулуур кырдьыккыттан тэйбэппин.

¹⁵⁸Эн Сокуоҥҥуттан тэйээччилэри кэлэйэ көрөбүн; кинилэр Эн кэриэстэргин тутуспаттар.

¹⁵⁹Көр хайдах курдук Эн ыйыыларгын таптыырбын; үтүө санааҕыттан миигин тыыннаах хааллар.

¹⁶⁰Эн тылыҥ олоҕо — дьиҥ кырдьык; Эн кырдьыктаах сокуоннарыҥ өлбөт үйэлээхтэр.

¹⁶¹Кинээстэр миигин буруйа суоҕум үрдүнэн сойуолууллар, оттон мин сүрэҕим Эн тылгыттан дьулайар.

¹⁶²Эн тылгын ааҕаммын, мин улуу барыска тиксибиттии, үөрэбин.

¹⁶³Сымыйаны абааһы көрөбүн, сымыйаттан сиргэнэбин; Эн Сокуоҥҥун таптыыбын.

¹⁶⁴Күҥҥэ сэттэтэ Эйиэхэ айхал этэбин, көнө дьүүлүҥ иһин махтанабын.

¹⁶⁵Эн Сокуоҥҥун таптыыр дьон илэ-эйэтэ муҥура суох, кинилэри дубук үктэтэр туох да суох.

¹⁶⁶АЙЫЫ ТОЙОН, Эн быыһыыргар мин эрэнэбин, Эн кэриэстэргин толоробун.

¹⁶⁷Дууһам Эн туоһулаабыт кырдьыккын тутуһар, ис сүрэхпиттэн ону таптыыбын.

¹⁶⁸Эн ыйаргын, туоһулуургун мин толоробун, суолум-ииһим барыта Эн иннигэр ырылыйа сытар.

¹⁶⁹АЙЫЫ ТОЙОН, мин энэлгэним Эйиэхэ иһиллиэхтин; эппиккин толорон, миигин өйдөт.

¹⁷⁰Мин үҥэрим Эйиэхэ тиийиэхтин; эрэннэрбитиҥ курдук, миигин өрүһүйэн ыл.

¹⁷¹Сокуоннаргар үөрэтэриҥ иһин, мин өрүү Эйигин айхаллыам.

¹⁷²Бары кэриэстэриҥ кырдьыктаахтарын иһин, Эн тылгын ырыа гынан ыллыам.

¹⁷³Эн ыйыыларгын мин талбытым, онон Эн илииҥ миэхэ көмөлөһө турдун.

¹⁷⁴Кэтэһэбин даҕаны, АЙЫЫ ТОЙОН, миигин быыһыыргын, Эн Сокуоҥҥуттан мин үөрүүнү булабын.

¹⁷⁵Эйигин айхаллыырым туһугар, миигин тыыннаах хааллар; Эн көнө дьүүлүҥ миэхэ көмөлөстүн.

¹⁷⁶Сүппүт бараан курдук, мин муна-тэнэ сылдьабын; кулуккун көрдөө; Эн кэриэстэргин мин умнубатым.

Read Библия- Yakut 2021 Саалтыр 118 Bible Online

Саалтыр 118 - Библия- Yakut 2021 bible

Саалтыр 118