Read Библия- Yakut 2021 Саалтыр 134 Bible Online

Саалтыр 134 - Библия- Yakut 2021 bible

Саалтыр 134

¹Аллилуия. Айхаллааҥ АЙЫЫ ТОЙОН аатын, айхаллааҥ, АЙЫЫ ТОЙОН кулуттара,

²эһиги, АЙЫЫ ТОЙОН Дьиэтигэр, Таҥарабыт Дьиэтин тиэргэнигэр турааччылар.

³Айхаллааҥ АЙЫЫ ТОЙОНУ — АЙЫЫ ТОЙОН үтүө санаалаах; ыллааҥ Кини аатыгар — Киниэхэ ыллыыр үөрүүлээх.

⁴АЙЫЫ ТОЙОН Иаковы Бэйэтигэр талан ылбыта, Израиль Кини бас билиитинэн буолбута.

⁵Мин билэбин АЙЫЫ ТОЙОН сүдүтүн, биһиги Айыы Тойоммут бары таҥаралартан үрдүгүн.

⁶Халлааҥҥа даҕаны, сиргэ даҕаны, байҕалга да, түгэҕэ биллибэт дириҥ далайга да — АЙЫЫ ТОЙОН тугу баҕарбытын барытын оҥорор;

⁷сир уһугуттан былыттары үүрэн аҕалар, ардах кэмигэр чаҕылҕаны сандаардар, хаайан турбут сириттэн тыалы-кууһу таһаарар.

⁸Кини Египет сирин бастакы төрүөхтэрин — киһититтэн сүөһүтүгэр тиийэ — сууһарбыта;

⁹фараону уонна кини бары кулуттарын утары, Египет, Кини эйиэхэ сөҕүмэр бэлиэлэри көрдөрбүтэ, дьикти дьайыылары оҥорбута.

¹⁰Кини үгүс норуоту самнарбыта, күүстээх ыраахтааҕылары өлөрбүтэ:

¹¹Аморрей ыраахтааҕытын Сигону, Васан ыраахтааҕытын Огу, Ханаан бары ыраахтааҕыларын;

¹²итиэннэ, кинилэр сирдэрин бас биллэрэ, норуотугар Израильга биэрбитэ.

¹³АЙЫЫ ТОЙОН, Эн аатыҥ өрүүтүн иһиллэ туруоҕа; АЙЫЫ ТОЙОН, Эйигин үйэттэн үйэҕэ өйдүөхтэрэ.

¹⁴АЙЫЫ ТОЙОН норуотун кырдьыгын таһаарыаҕа, Бэйэтин кулуттарын аһыныаҕа.

¹⁵Омуктар эмэгэттэрэ үрүҥ көмүс, кыһыл көмүс — киһи илиитинэн оҥоһуга.

¹⁶Айахтаахтар да, саҥарбаттар; харахтаахтар да, көрбөттөр;

¹⁷кулгаахтаахтар да, истибэттэр, айахтарыттан тыын тахсыбат.

¹⁸Кинилэри оҥорооччулар да, кинилэргэ эрэнээччилэр да бары итинник буолуохтара.

¹⁹Израиль дьиэтэ, алҕаа АЙЫЫ ТОЙОНУ! Аарон дьиэтэ, алҕаа АЙЫЫ ТОЙОНУ!

²⁰Левий дьиэтэ, алҕаа АЙЫЫ ТОЙОНУ! Эһиги, АЙЫЫ ТОЙОНТОН куттанааччылар, алҕааҥ АЙЫЫ ТОЙОНУ!

²¹Алҕааҥ АЙЫЫ ТОЙОНУ Сионтан, Иерусалимҥа олорор АЙЫЫ ТОЙОНУ! Аллилуия.