Read Библия- Yakut 2021 Саалтыр 135 Bible Online

Саалтыр 135 - Библия- Yakut 2021 bible

Саалтыр 135

¹Айхаллааҥ АЙЫЫ ТОЙОНУ үтүө санаалааҕын иһин, Кини бигэ таптала — үйэлэр тухары.

²Айхаллааҥ таҥаралар Таҥараларын, Кини бигэ таптала — үйэлэр тухары.

³Айхаллааҥ тойоттор Тойоннорун, Кини бигэ таптала — үйэлэр тухары;

⁴Кинини, улуу дьиктилэри оҥорор соҕотох кыахтааҕы, Кини бигэ таптала — үйэлэр тухары;

⁵муударай өйүнэн халлааннары айбыты, Кини бигэ таптала — үйэлэр тухары;

⁶сири уу үрдүнэн тэниччи тарпыты, Кини бигэ таптала — үйэлэр тухары;

⁷күнү-ыйы айбыты, Кини бигэ таптала — үйэлэр тухары;

⁸күнү — күнүскү кэми салайарга, Кини бигэ таптала — үйэлэр тухары;

⁹ыйы уонна сулустары — түүнү салайарга, Кини бигэ таптала — үйэлэр тухары;

¹⁰Египет бастакы төрүөхтэрин имири эспити, Кини бигэ таптала — үйэлэр тухары;

¹¹Израиль дьонун Египеттэн таһаарбыты, Кини бигэ таптала — үйэлэр тухары;

¹²күүстээх илиитин утары уунан быыһаабыты, Кини бигэ таптала — үйэлэр тухары;

¹³Кыһыл Муораны икки аҥыы хайыппыты, Кини бигэ таптала — үйэлэр тухары;

¹⁴Израиль дьонун муора түгэҕинэн сатыы туораппыты, Кини бигэ таптала — үйэлэр тухары;

¹⁵фараону сэриитин кытта Кыһыл Муораҕа тимирпити, Кини бигэ таптала — үйэлэр тухары;

¹⁶норуотун кураайы дуол устун сирдээбити, Кини бигэ таптала — үйэлэр тухары;

¹⁷улуу ыраахтааҕылары сууһарбыты, Кини бигэ таптала — үйэлэр тухары;

¹⁸күүстээх ыраахтааҕылары өлөрбүтү, Кини бигэ таптала — үйэлэр тухары;

¹⁹Сигону, Аморрей ыраахтааҕытын, Кини бигэ таптала — үйэлэр тухары;

²⁰Огу, Васан ыраахтааҕытын, Кини бигэ таптала — үйэлэр тухары;

²¹кинилэр сирдэрин норуотугар биэрбити, Кини бигэ таптала — үйэлэр тухары;

²²кулутугар Израильга бас биллэрэ биэрбити, Кини бигэ таптала — үйэлэр тухары;

²³Баттаммыт кэммитигэр биһигини умнубатаҕы, Кини бигэ таптала — үйэлэр тухары;

²⁴өстөөхтөрбүтүттэн биһигини өрүһүйбүтү, Кини бигэ таптала — үйэлэр тухары;

²⁵тыынар тыыннаахха барытыгар аһылыгы биэрээччини, Кини бигэ таптала — үйэлэр тухары.

²⁶Айхаллааҥ халлааннар Таҥараларын, Кини бигэ таптала — үйэлэр тухары.