Read Библия- Yakut 2021 Саалтыр 148 Bible Online

Саалтыр 148 - Библия- Yakut 2021 bible

Саалтыр 148

¹Аллилуия. Айхаллааҥ АЙЫЫ ТОЙОНУ халлааннартан, айхаллааҥ Кинини халлааннар уҥуордарыттан.

²Айхаллааҥ Кинини, бары Аанньаллара; айхаллааҥ Кинини, бары сэриилэрэ.

³Айхаллааҥ Кинини, күн уонна ый, айхаллааҥ Кинини, бары суһумнуур сулустар.

⁴Айхаллааҥ Кинини, добун халлааннар, айхаллааҥ, халлааннар үрдүлэринэн устар уулар.

⁵АЙЫЫ ТОЙОН аатын айхаллыахтыннар Кини тылынан айыллыбыттар.

⁶Кини үйэттэн үйэлэргэ кинилэри тэрийбитэ, кэһиллибэт чэрчилэрин быһаттаан биэрбитэ.

⁷Айхаллааҥ АЙЫЫ ТОЙОНУ сиртэн улуу балыктар, түгэҕэ биллибэт далайдар бары,

⁸уот уонна муус толон, хаар уонна туман, Кини тылын толорор ала буркун.

⁹Айхаллааҥ хайалар-томтордор бука бары, отонноох мастар, сыалаах мастар бары,

¹⁰дьиикэй кыыллар, сүөһү арааһа, сиринэн сыыллааччы, халлаанынан көтөөччү барыта.

¹¹Сир-дойду ыраахтааҕылара, бары норуоттар, кинээстэр, аан дойду судьуйалара бука бары,

¹²уолаттар-кыргыттар, оҕонньоттор-оҕолор — бары бүттүүн

¹³АЙЫЫ ТОЙОН аатын айхаллыахтыннар: Кини эрэ аата баар үрдүктэн үрдүк, Кини килбиэнэ сир-халлаан үрдүнэн сыдьаайар.

¹⁴Кини норуотун күүһүн-күдэҕин бөҕөргөттө, бары сибэтиэй дьонун, Израиль уолаттарын, Бэйэтигэр чугас норуоту, албан аатырта. Аллилуия.