Read Библия- Yakut 2021 Саалтыр 18 Bible Online

Саалтыр 18 - Библия- Yakut 2021 bible

Саалтыр 18

¹Хуор салайааччытыгар. Давид псалома.

²Таҥара кэрэмэн килбиэнин мэҥэ халлаан кэрэһилиир, Кини ураннаан оҥорбутун улуу куйаар туоһулуур.

³Күн күҥҥэ ону сэһэргиир, түүн түүннүүн билиитин үллэстэр.

⁴Тыла-дорҕооно суох кинилэр кэпсииллэр, саҥалара-иҥэлэрэ иһиллибэт[9];

⁵ол эрэн, кинилэр этэллэрэ сири биир гына эҥсиллэр, сир-халлаан сиксигэр тиийэ иһиллэр. Халлааҥҥа Таҥара күҥҥэ уораҕай туруорбут.

⁶Күтүөт уол хаппахчыттан тахсарыныы, күн эмиэ тахсан, биэтэккэ тиийиэхтээх сүүрүк курдук үөрэр-көтөр.

⁷Халлаан биир саҕаҕыттан атын саҕаҕар кини тиийэр, туох да саһар кыаҕа суох кини сыралҕаныттан.

⁸АЙЫЫ ТОЙОН Сокуона эҥкилэ суох ситэри, куту-сүрү бөҕөргөтөр; АЙЫЫ ТОЙОН туоһулуур кырдьыга эрэбил, кэнэни үөрэтэр;

⁹АЙЫЫ ТОЙОН ыйаахтара кырдьыктаахтар, сүрэҕи үөрдэллэр; АЙЫЫ ТОЙОН кэриэстэрэ сырдыктар, хараҕы сырдаталлар.

¹⁰АЙЫЫ ТОЙОНТОН куттаныы ыраас, үйэлэргэ барар. АЙЫЫ ТОЙОН дьүүлэ көнө, барыта сөптөөх,

¹¹кыһыл көмүстээҕэр, элбэх ыраас көмүстээҕэр ордук баҕалаах, ыҥырыа уйатыттан таммалыыр мүөттээҕэр минньигэс.

¹²Кинилэри тутуһан, кулутуҥ бэйэтин харыстанар; кинилэри тутуһуу улуу манньаҕа тиксэрэр.

¹³Ким сыыһатын барытын ситэн көрүнүөҕэй? Оо, биллибэт-көстүбэт аньыыбыттан миигин ыраастаа;

¹⁴аньыыга-хараҕа баһыйтарбатым туһугар, билэн туран буруйу оҥорорбун тохтот. Оччоҕо мин туох да омсото суох буолуоҕум, улуу буруйтан-суҥхаттан ырааһырыаҕым.

¹⁵Мин этэр тылым, саныыр санаам барыта сүрэҕиҥ ортотунан Эйиэхэ киириэхтин, АЙЫЫ ТОЙОН, мин туруук таас хайам, мин Өрүһүйээччим.