Read Библия- Yakut 2021 Саалтыр 21 Bible Online

Саалтыр 21 - Библия- Yakut 2021 bible

Саалтыр 21

¹Хуор салайааччытыгар: «Сарыал табатын» матыыбынан. Давид псалома.

²Таҥарам, Таҥарам миэнэ, Эн тоҕо миигин хааллардыҥ? Тоҕо миигиттэн маннык ыраатан, энэлийэр саҥабын истэн көмөлөспөт буоллуҥ?

³Оо, Таҥарам! Күнүс Эйигин ыҥырабын — хардарбаккын, түүн ыҥырабын — уоскулаҥы булбаппын.

⁴Ол эрэн, Сибэтиэй, Эн бүрүстүөлгэ олороҕун, Израиль Эйигин уруйдуур-айхаллыыр.

⁵Эйиэхэ биһиги өбүгэлэрбит эрэнэллэрэ, Эйиэхэ эрэнэллэрэ, ол иһин Эн кинилэри өрүһүйэриҥ.

⁶Эйигин ыҥыраллара, ол иһин быыһаан ыларыҥ, Эйиэхэ эрэнэллэрэ, онон кыбыстыыга киирбэтэхтэрэ.

⁷Оттон мин чиэрбэбин, киһи буолбатахпын, дьон элэгэр, норуот сэнэбилигэр сылдьабын.

⁸Көрбүт эрэ барыта миигин күлүү оҥостор, чыпчырынан ылар, баһын быһа илгистэр:

⁹«АЙЫЫ ТОЙОҤҤО эрэнэрэ бэрдэ, онон Киниэхэ өрүһүйтэрдин, оннук сөбүлэппит буоллаҕына, быыһаттын».

¹⁰Эн миигин ис түгэҕиттэн таһаарбытыҥ, ийэм түөһүгэр сыһыары тутан, миигин харыстаабытыҥ.

¹¹Төрүөхпүттэн мин Эйиэхэ бэриллибитим, ийэм иһигэр эрдэхпиттэн Эн миэхэ Таҥарам этиҥ.

¹²Миигиттэн ыраатыма — мин сору-муҥу көрөрүм чугаһаата, көмөлөһүннэриэх киһим кимим да суох.

¹³Оҕус үөрэ миигин тулалаата, Васан дьиикэй сүөһүтэ иилээтэ.

¹⁴Тырыта тыытаары ырдьыгыныыр хахайдардыы, маҥалайдарын аппыттар.

¹⁵Мин уу курдук тоҕуннум, уҥуоҕум барыта босхо барда; сүрэҕим буоска курдук буолла, агдам иһигэр уулунна.

¹⁶Күүһүм-күдэҕим үгдэрийдэ, күөс үлтүркэйинии мин куура хаттым; тылым таҥалайбар хам сыһынна; Эн миигин иин куоппаһыгар түһэрдиҥ.

¹⁷Ыттар миигин төгүрүйдүлэр; тулабар хара дьайдаахтар үмүөрүстүлэр, илиибин-атахпын дьөлүтэ астылар.

¹⁸Уҥуоҕум барыта, ааҕыллар гына, адыгыраан таҕыста; кинилэр буоллаҕына миигин көрөн, одуулаан тураллар.

¹⁹Бэйэлэрин икки ардыларыгар таҥаспын үллэстэллэр, таҥаспын ылаары, түөрэх кэбиһэллэр.

²⁰Оттон Эн, АЙЫЫ ТОЙОН, миигиттэн тэйимэ; оо, мин күүһүм-тирэҕим, миэхэ көмөҕө тиэтэй!

²¹Өрүһүй мин дууһабын кылыстан, олохпун — ыттартан!

²²Быыһаа хахай маҥалайыттан, дьиикэй оҕустар муостарыттан, миигин истэн, көмүскээ!

²³Эн ааккын мин бырааттарбар иһитиннэриэм, түмсүү ортотугар Эйигин айхаллыам.

²⁴АЙЫЫ ТОЙОНТОН куттанааччылар, Кинини айхаллааҥ! Иаков удьуордара бары, Кинини уруйдааҥ! Дириҥник ытыктааҥ Кинини, Израиль дьоно бука!

²⁵Кини кыһалҕалаах киһи эрэйдэнэрин аахайбакка хаалларбатаҕа, кинини сэнээбэтэҕэ; сирэйин киниттэн кистээбэтэҕэ, көмөҕө ыҥырбытыгар истибитэ.

²⁶Мин, улуу түмсүүгэ киирэммин, Эйигин уруйдуом; Эйигиттэн толлор дьон иннигэр эрэннэрбиппин толоруом.

²⁷Дьадаҥылар аны дуоһуйа аһыыр буолуохтара; АЙЫЫ ТОЙОНУ көрдөөччүлэр Кинини уруйдуохтара. Үйэлэр тухары эһиги сүрэххит тэбиэхтин!

²⁸Сир бары уһуктара, өйдөөннөр, АЙЫЫ ТОЙОҤҤО эргиллиэхтэрэ; бары норуоттар уустара Киниэхэ сүгүрүйүөхтэрэ.

²⁹АЙЫЫ ТОЙОН Саарыстыбаны салайар, Кини норуоттар Баһылыктара.

³⁰Сир бары күүстээхтэрэ Киниэхэ сүгүрүйүөхтэрэ; иин быылыгар түһэн эрээччилэр, тыыннаах хаалар кыахтара суохтар эмиэ бары Кини иннигэр нөрүөн нөргүйүөхтэрэ;

³¹Кэнчээри ыччаттар Киниэхэ үлэлиэхтэрэ, кэлэр көлүөнэлэргэ Айыы Тойон туһунан кэпсиэхтэрэ,

³²кэнэҕэс төрүүр дьоҥҥо Кини кырдьыктаах быһыытын, Кини тугу оҥорбутун иһитиннэриэхтэрэ.