Read Библия- Yakut 2021 Саалтыр 26 Bible Online

Саалтыр 26 - Библия- Yakut 2021 bible

Саалтыр 26

¹Давид псалома. АЙЫЫ ТОЙОН — олоҕум сырдыга, мин Быыһааччым; кимтэн мин куттаныамый? АЙЫЫ ТОЙОН — халыҥ хаххам, суон дурдам; кимтэн мин дьулайыамый?

²Өһөгөйдөөхтөр, миэхэ кимэн киирдэхтэринэ, күөмчүлээччилэрим уонна өстөөхтөрүм, тыыннаахтыы ыйыстыахтарын баҕардахтарына, бэйэлэрэ бүдүрүйэн охтуохтара.

³Халыҥ сэрии да миигин утары саба халыйан кэллэҕинэ, сүрэҕим онтон эймэнийиэ суоҕа; уот сэрии да миигин утары өрө күөдьүйдэҕинэ, онно даҕаны мин эрэлбин энчирэтиэм суоҕа.

⁴Биири мин АЙЫЫ ТОЙОНТОН көрдөһөрүм, биири эрэ көрдүүбүн: олоҕум устатын тухары АЙЫЫ ТОЙОН Дьиэтигэр олорорбун, АЙЫЫ ТОЙОН кэрэ килбиэнин көрөрбүн, Кини Храмыгар сылдьарбын.

⁵Оччоҕо алдьархай ааҥныыр күнүгэр Бэйэтин хаххатыгар Кини миигин кистиэҕэ, олорор Отуутугар саһыарыаҕа, очуос оройугар таһаарыаҕа.

⁶Оччоҕо мин иилээн турар өстөөхтөрбүн үөһэттэн өрөгөйдүү көрүөҕүм, Кини ытык Отуутугар киирэммин, үөрэ-көтө, Киниэхэ сиэртибэ биэриэҕим; АЙЫЫ ТОЙОНУ туойуоҕум, айхал ырыатын ыллыаҕым.

⁷Иһит, АЙЫЫ ТОЙОН, мин үөгүлүүр саҥабын, аһын-харыһый миигин, иһит Эйигин ыҥырарбын.

⁸Сүрэхпэр: «Миигин көрдөөҥ», — диэн, Эн этэриҥ иһиллэр. Мин Эйигин көрдүөм, АЙЫЫ ТОЙОН.

⁹Миигиттэн киэр хайыһыма. Оо, уордайан кулуккун киэр анньыма, Эн миэхэ өрүү көмөлөһөрүҥ эбээт; быраҕыма миигин, хаалларыма, Айыы Таҥара, Быыһааччым миэнэ!

¹⁰Аҕалаах ийэм миигин хаалларбыттарын да иһин, АЙЫЫ ТОЙОН мин туспар кыһаллыаҕа.

¹¹АЙЫЫ ТОЙОН, миигин үөрэт Бэйэҥ суолгар, көнө суолунан сирдээ өстөөхтөрүм тустарыгар.

¹²Утарсааччыларым көҥүллэригэр биэримэ; ити сымыйа туоһулар миигин утары турдулар, өһүнэн-сааһынан уһуурдулар.

¹³Ол эрэн, мин АЙЫЫ ТОЙОН үтүө сыһыанын бу тыыннаахтар сирдэригэр көрүөм диэн итэҕэйэбин.

¹⁴Эрэн АЙЫЫ ТОЙОҤҤО; эрдий, эр сүрэхтэн, эрэн АЙЫЫ ТОЙОҤҤО.