Read Библия- Yakut 2021 Саалтыр 30 Bible Online

Саалтыр 30 - Библия- Yakut 2021 bible

Саалтыр 30

¹Хуор салайааччытыгар. Давид псалома.

²Эйиэхэ эрэнэбин, АЙЫЫ ТОЙОН; хаһан да мин кыбыстыыга кииримиим; кырдьыктаах Бэйэҥ миигин өрүһүй.

³Болҕойон иһит Эйигиттэн көрдөһөрбүн, тиэтэй миигин өрүһүйэн ыларга. Туруук таас хайам буолан миигин хаххалаа, бөҕө кириэппэһим буолан быыһаа.

⁴Эн бааргын мин таас хайам, мин кириэппэһим; Бэйэҥ аатыҥ туһугар, миигин сирдээ, салай,

⁵кистээн миэхэ оҥорбут угаайыларыттан миигин таһаар; Эйигин мин дурда-хахха туттабын эбээт.

⁶Эн илиигэр мин тыыммын туттарабын; Эн миигин өрүһүйэриҥ, АЙЫЫ ТОЙОН, кырдьык Таҥарата.

⁷Туһата суох эмэгэттэргэ эрэнээччилэри абааһы көрөбүн. АЙЫЫ ТОЙОҤҤО эрэнэбин.

⁸Мин кыһалҕабын көрбүтүҥ, дууһам кутурҕанын билбитиҥ иһин, Эн тапталгыттан көтөҕүллэн, мин үөрүөм-көтүөм;

⁹Эн миигин өстөөх илиитигэр туран биэрбэтэҕиҥ — киэҥ дуолга таһаарбытыҥ.

¹⁰Абыраа миигин, АЙЫЫ ТОЙОН, мин ыар кыһалҕаҕа ыллардым; кутурҕаммыттан хараҕым уута уолла, дууһам саймаарда, этим-хааным амньырайда.

¹¹Олоҕум санаарҕабылга баранна, күммүн-дьылбын энэлгэн эҥээрдэстэ; аньыым-харам миигин алларытан, уҥуохтарым куура хаттылар.

¹²Бары өстөөхпүттэн сылтаан бэл ыалларым миигин үөҕэллэр; билэр дьонум миигиттэн дьулайар буоллулар, уулуссаҕа көрбүттэр киэр куоталлар.

¹³Өлбүт киһилии мин умнулуннум, алдьаммыт иһиттии быраҕылынным.

¹⁴Үгүстэр хобугунаһалларын истэбин; тула өттүбүттэн куттал суоһуур! — миигин утары куомуннаһаллар, тыыммар тураары киксэллэр.

¹⁵Оттон мин Эйиэхэ эрэнэбин, АЙЫЫ ТОЙОН; Эйиэхэ этэбин: «Эн буолаҕын мин Таҥарам».

¹⁶Эн илиигэр баар мин олоҕум күнэ-дьыла барыта; миигин өстөөхтөрбүттэн, күөмчүһүттэрбиттэн өрүһүй.

¹⁷Эн сирэйиҥ сырдыга кулуккар сыдьаайдын; үтүө санааҕыттан миигин быыһаан ыл.

¹⁸АЙЫЫ ТОЙОН, Эйигин ыҥырбыт киһи мин кыбыстыыга кииримиим; кыбыстыыга хара дьайдаахтар киирдиннэр, хам бараннар, үтүгэн түгэҕэр түстүннэр.

¹⁹Киэмсийэннэр, сэнии санааннар, көнө киһини үөҕэр сымыйаччылар тыла суох бардыннар.

²⁰Оо, хайдах курдук Эйиэхэ элбэҕий — Эн ким барыта көрөрүгэр — Эйигиттэн толлооччуларга уурбут, Эйиэхэ эрэнээччилэргэ бэлэмнээбит үтүмэн үтүөҥ!

²¹Халыҥ хахха буолан Эн кинилэри харыстыыгын дьон уодаһыннаах куомунуттан; суон дурда буолан араҥаччылыыгын өстөөх өһүөннээх тылыттан.

²²Алгыс буоллун АЙЫЫ ТОЙОҤҤО! Өстөөх төгүрүйбүт куоратыгар сырыттахпына, Кини дьиктитик да миэхэ бигэ тапталын көрдөрбүтэ!

²³Аймаһыйбыт санаабар Эйигин миигиттэн киэр хайыспыт диэбитим; онтум, көмө көрдөөн ыҥырбыппар, мин ааттаһар саҥабын иһиттиҥ.

²⁴Таптааҥ АЙЫЫ ТОЙОНУ, Кини бары сибэтиэйдэрэ. АЙЫЫ ТОЙОН бэриниилээх дьону көмүскүүр, оттон бэрдимсиктэргэ иэстэрин толору төлүүр.

²⁵Эрдийиҥ, эр сүрэхтэниҥ, АЙЫЫ ТОЙОҤҤО эрэнээччилэр бука бары.