Read Библия- Yakut 2021 Саалтыр 34 Bible Online

Саалтыр 34 - Библия- Yakut 2021 bible

Саалтыр 34

¹Давид псалома. Киирис, АЙЫЫ ТОЙОН, миигин кытта киирсээччилэрдиин, сэриилэс миигин утары сэриилэһээччилэрдиин;

²харыҥ куйаҕын, халҕан куйаххын ылаҥҥын, миэхэ көмөҕө кэлэрдии Эн турун.

³Үҥүүгүн таһааран, сүгэҕин тутаҥҥын, туора тур миигин сойуолааччылар суолларыгар; итиэннэ, эйигин быыһаан ылыам диэҥҥин, эрэннэр мин дууһабар.

⁴Саакка-суукка киирэн сурахтара суйданнын мин дууһабар турунааччылар. Атахха биллэрэн ааттара алдьаннын миигин утары куһаҕаҥҥа куомуннаһааччылар.

⁵Тыал ыһар-тоҕор мэкиинэтэ буоллуннар, АЙЫЫ ТОЙОН Аанньала кинилэри кыйдаатын.

⁶Айанныыр суоллара хараҥа, халтараан буолуохтун, АЙЫЫ ТОЙОН Аанньала кинилэри сойуолуохтун.

⁷Буруйа суоҕум үрдүнэн, кистээн, миэхэ угаайы оҥорбуттар, буруйа суоҕум үрдүнэн миэхэ иин хаспыттар.

⁸Эстэр-быстар күннэрэ кинилэргэ эмискэ үтүрүйэн кэллин, кистээн оҥорбут угаайыларыгар бэйэлэрэ түбэстиннэр; илимҥэ сөрүөстэн кинилэр өллүннэр.

⁹Оттон мин дууһам АЙЫЫ ТОЙОНТОН үөрүөҕэ, Киниэхэ өрүһүйтэрэн, өрөгөйүм үрдүөҕэ.

¹⁰Оччоҕо хас биирдии уҥуоҕум этиэҕэ: «Оо, АЙЫЫ ТОЙОН, ким Эйиэхэ тэҥнэһиэҕэй? Эн өрүһүйэн ылаҕын мөлтөҕү күүстээхтэн, кыраны-кыһалҕалааҕы — кинини халааччыттан».

¹¹Кырыктаах туоһулар миигин утары турдулар, тугу билбэппин, ону ыйытан ыҕарыйдылар.

¹²Үтүөбүн куһаҕанынан төлөөннөр, дууһабын тулаайахсыттылар.

¹³Оттон мин, кинилэр ыарыйдахтарына, ытабыл таҥаһын таҥнарым, астан аккаастанан, дууһабын сыһытарым; мин үҥэрим бэйэбэр төннөн кэлэрэ.

¹⁴Кинилэри, доҕорум, быраатым курдук, аһынарым; ийэтин аһыйар киһилии, бүк түһэн, курутуйан сылдьарым.

¹⁵Оттон мин бүдүрүйдэхпинэ, үөрэн, түмсэ түһэллэр, миигин утары түмсэллэр; өстөөхтөр, мин урут кинилэри билбэт этим, күннэри-түүннэри үөҕэллэр.

¹⁶Нэгэйдэри кытта бииргэ өһүөннээхтик күлсэллэр, миигин көрө-көрө тиистэрин хабырыналлар.

¹⁷Хаһааҥҥа диэри, АЙЫЫ ТОЙОН, Эн итини көрүөҥүй? Хара дьайыыларыттан миигин өрүһүй, хахайдартан олохпун, баарбын-суохпун, быыһаан ыл.

¹⁸Мин, улуу түмсүүгэ киирэммин, Эйиэхэ махтаныам, үтүмэн киһи ортотугар тураммын, Эйигин айхаллыам.

¹⁹Туох да төрүөтэ суох миэхэ өстүйээччилэр миигин сэтэрээбэтиннэр; буруйа суоҕум үрдүнэн абааһы көрөөччүлэр бэйэ-бэйэлэригэр имнэммэтиннэр;

²⁰эйэ туһунан кинилэр кэпсэтэр буолбатахтар — сиргэ эйэ-дэмнээхтик олорооччулары утары уодаһыннаахтык куомуннаһаллар.

²¹Миигин утаран, айахтара кытарар: «Кэһэй, кэһэй! — дэһэллэр. — Тугу оҥорбуккун биһиги көрбүппүт!»

²²Эн көрбүтүҥ, АЙЫЫ ТОЙОН, итини саҥата суох хаалларыма; Айыы Тойон, миигиттэн ыраатыма!

²³Оо, уһугун, турун мин көмүскэлбэр, киирис мин дьыалабар, Таҥарам, Айыы Тойонум!

²⁴Бэйэҥ кырдьыккынан миигин дьүүллээ; АЙЫЫ ТОЙОН Таҥарам, өстөөхпүн өрөгөйдөтүмэ.

²⁵«Кэһэй, баҕарбыппыт дьэ туолла!» — диэбэтиннэр, «Дьэ хата, мэҥиэһиннэхпит!» — дэспэтиннэр.

²⁶Сир сирэйдэнэн, саакка киирдиннэр мин эрэйдэнэрбиттэн үөрээччилэр; ааттара алдьанан, чиэстэрэ киртийдин миигин үөһэттэн сэнии көрөөччүлэр.

²⁷Оттон мин кырдьыгым кыайарыгар баҕарааччылар өрөгөйдөрө үрдээтин, үөрдүннэр-көттүннэр; «Оо, улуу даҕаны, — диир буоллуннар өрүүтүн, — кулутугар эйэни баҕарар АЙЫЫ ТОЙОН!»

²⁸Оччоҕо мин Эн кырдьыктааххын иһитиннэриэм, хас күн аайы Эйиэхэ уруй-айхал этиэм.