Read Библия- Yakut 2021 Саалтыр 37 Bible Online

Саалтыр 37 - Библия- Yakut 2021 bible

Саалтыр 37

¹Давид псалома. Санатыы.

²АЙЫЫ ТОЙОН, абарбыккын аһардан баран, миигин дьарыйаар, уордайбыккын уҕарытан баран, буруйдаар.

³Миэхэ Эн охторуҥ хатаннылар, Эн илииҥ ыараханнык тайанна.

⁴Эн уордайаҥҥын, эппэр өлүөр сирим орпото, аньыым-харам таарыйан, уҥуохтарым кыйытталлар.

⁵Буруйум-сэмэм оройбунан буолла, ыар сүгэһэрдии ыйанна.

⁶Өйө суохтук быһыыланаммын, бааһым сытыган ириҥэнэн туолла.

⁷Мин, бүк баттатан, санньыйан сырыттым, уһун күнү быһа санаарҕаатым;

⁸икки өттүгүм уотунан умайар, барым барыта бүттэтэ суох.

⁹Сэниэм эстэн, сырам-сылбам быстан, сүрэҕим ааспат эрэйиттэн үөгүлээн ылабын.

¹⁰АЙЫЫ ТОЙОН, мин баҕарар баҕабын Эн барытын билэҕин, мин өрүтэ тыынарым Эйигиттэн кистэммэт.

¹¹Сүрэҕим сүүдүйдэ, күүһүм-күдэҕим өһүлүннэ, хараҕым уота кытта өлбөөдүйэ өстө.

¹²Доҕотторум, ыалларым, бааспын көрөн, тэйэ тутталлар, чугас дьонум эмиэ ыраах тураллар.

¹³Мин тыыммар турунааччылар миигин үктэтэ сатыыллар; куһаҕаны баҕарааччылар өлөрбүн түстүүллэр, хайа да күн уодаһыннааҕы саныыллар.

¹⁴Оттон мин дьүлэй курдук, истибэппин, тыла суох курдук, саҥарбаппын.

¹⁵Онон тугу да истибэт, утары этэрэ суох киһи буоллум.

¹⁶Эйиэхэ мин эрэнэбин, АЙЫЫ ТОЙОН; Эн хардарыаҕыҥ, Айыы Тойон Таҥарам.

¹⁷Ол иһин үҥэбин: «Өстөөхтөрүм сэтэрээбэтиннэр, бүдүрүйэр кэммэр улахамсыйар этилэр», — диэн.

¹⁸Охтон түһэрим миэхэ бу кэллэ, ыарыым ааһан-араҕан биэрбэт.

¹⁹Буруйбун-сэмэбин мин билинэбин, аньыыны оҥорбуппун кэмсинэбин.

²⁰Оттон өстөөхтөрүм олорбуттарын курдук олороллор, дьэ өссө ордук бөҕөргөөтүлэр; төрүөтэ суох миэхэ өстүйээччилэр үксээтилэр.

²¹Үтүөнү эрэ тутуһарым иһин, үтүөбүн куһаҕанынан төлөөччүлэр миэхэ өһүрэллэр.

²²Оо, хаалларыма миигин, АЙЫЫ ТОЙОН; Таҥарам, миигиттэн тэйимэ.

²³Тиэтэй миэхэ көмөлөһөргө, Айыы Тойон, Быыһааччым миэнэ!