Read Библия- Yakut 2021 Саалтыр 40 Bible Online

Саалтыр 40 - Библия- Yakut 2021 bible

Саалтыр 40

¹Хуор салайааччытыгар. Давид псалома.

²Ким кыраны-кыамматы умнубат, ол дьоллоох. Кыһалҕалаах күнүгэр кинини АЙЫЫ ТОЙОН быыһыаҕа,

³АЙЫЫ ТОЙОН көмүскүөҕэ, тыыннаах хаалларыаҕа, оччоҕо кини сиргэ дьоллооҕунан ааттаныаҕа. Эн кинини өстөөхтөрүн илиилэригэр биэриэҥ суоҕа.

⁴Ыалдьан-бохтон сыттаҕына, АЙЫЫ ТОЙОН бөҕөргөтүөҕэ. Ыарыйдаҕына, Эн кинини бары ыарыытыттан үтүөрдүөҕүҥ.

⁵Мин эппитим: «АЙЫЫ ТОЙОН, миигин абыраа, үтүөрт мин дууһабын; Эйигин утары аньыыны оҥорбуппун».

⁶Өстөөхтөрүм мин туспунан өһүөннээхтик кэпсэтэллэр, хаһан эрэ өлөн, ааттыын-суоллуун умнуллар дэһэллэр.

⁷Ким эмэ миигин көрсө кэллэҕинэ, кураанаҕы эрдэр, иһигэр куһаҕаны саныы олорор уонна, таҕыста да, онтун уҥа-хаҥас ыһар-тоҕор.

⁸Миигин абааһы көрөөччүлэр бары мин туспунан хобугунаһаллар, куһаҕаны миэхэ оҥорорго сананаллар,

⁹«Кырыыс киниэхэ тиийдэ, аны турбаттыы сытта», — дэһэллэр.

¹⁰Бэл эрэммит эйэ-дэмнээх доҕорум, мин килиэппин сиэбит киһи, миигин тэпсээри оҥоһунна.

¹¹Абыраа миигин, АЙЫЫ ТОЙОН, атахпар туруор, оччоҕо мин кинилэргэ төлүөҕүм.

¹²Өстөөҕүм иннибин ылбатаҕына, онтон билиэҕим Эн миэхэ үтүө сыһыаннааххын.

¹³Чөллөөҕүм иһин, Эн миигин харыстыаҕыҥ, үйэлэр тухары Бэйэҥ аттыгар илдьэ сылдьыаҕыҥ.

¹⁴Алгыс буоллун АЙЫЫ ТОЙОҤҤО, Израиль Таҥаратыгар, үйэттэн үйэҕэ диэри. Аминь, аминь.