Read Библия- Yakut 2021 Саалтыр 43 Bible Online

Саалтыр 43 - Библия- Yakut 2021 bible

Саалтыр 43

¹Хуор салайааччытыгар. Корей уолаттарын үөрэтиитэ.

²Айыы Таҥара, былыр өбүгэлэрбит саҕана Эн хайдахтаах дьайыылары оҥорбуккун биһиги эт кулгаахпытынан истибиппит — аҕаларбыт ону биһиэхэ кэпсээбиттэрэ.

³Эн, атын омуктары үүртэлээн баран, кинилэр сирдэригэр өбүгэлэрбитин олордубутуҥ; туора биис уустарын сууһартаан баран, норуоккар көҥүлү тосхойбутуҥ.

⁴Өбүгэлэрбит бу сири кылыстарынан ылбатахтара, бэйэлэрин кыахтарынан да быыһамматахтара: Эн уҥа илииҥ, Эн күүһүҥ, Эн сирэйиҥ сырдыга кинилэргэ кыайыыны биэрбитэ, оннук үтүө сыһыаннааҕыҥ кинилэргэ.

⁵Эн буолаҕын мин Ыраахтааҕым, мин Таҥарам, Иаковка кыайыыны Эн бэлэхтиигин.

⁶Эйигин кытта сылдьан, биһиги өстөөхпүтүн кыайыахпыт, Эн ааккынан биһиги өрө турааччылары тэпсиэхпит.

⁷Ох саабар мин эрэммэппин, кылыһым да миигин быыһыыр кыаҕа суох;

⁸Эн биһигини өстөөхтөрбүтүттэн быыһыырыҥ, биһигини абааһы көрөөччүлэри саатырдарыҥ.

⁹Айыы Таҥарабытынан биһиги өрүү хайҕанарбыт; Эн ааккын үйэлэр тухары айхаллыахпыт. Села

¹⁰Оттон билигин Эн биһигини киэр анньан саатыртыҥ, биһиги сэриилэрбитин кытта барсыбатыҥ.

¹¹Өһөгөйдөөхтөн куотар аакка ыытаҥҥын, өстөөхтөрбүт биһигини талыыллар.

¹²Эн биһигини, барааннары курдук, өлөртөрө биэрдиҥ, туора омуктар ортолоругар үрэйдиҥ.

¹³Норуоккун туох да барыһа суох атыылаатыҥ, кини сыанатын үрдэтэ барбатыҥ.

¹⁴Эн биһигини ыалларбытыгар ыыстаттыҥ, тула олорооччулар элэктэригэр, үөҕүүлэригэр ыыттыҥ;

¹⁵норуоттар ортолоругар биһигини тыл домоҕо оҥордуҥ, туора уустары бастарын быһа илгиһиннэрдиҥ.

¹⁶Уһун күнү быһа мин сааты-сууту тулуйабын, сирэйим уотунан умайар —

¹⁷күлээччи, үөҕээччи саҥатыттан, өстөөх киһи, иэстэһээччи, хараҕыттан.

¹⁸Төһө да бу барыта үрдүбүтүгэр түстэр, биһиги Эйигин умнубатыбыт, Эн кэс тылгын кэспэтибит.

¹⁹Төһө да биһигини торҕоттор ордууларыгар сууһарбытыҥ, төһө да өлүү күлүгүн биһиэхэ бүрүүкэппитиҥ иһин, биһиги санаабыт Эйигиттэн тэйбэтэ, Эн суолгуттан туораабатыбыт.

²¹Арай биһиги, Таҥарабыт аатын умнаммыт, атын таҥараҕа илиибитин ууммут буолуубут,

²²ама Таҥара, сүрэх кистэлэҥин курдат көрөөччү, арыйыа суоҕа этэ дуо ону?

²³Эн тускуттан биһигини күннэтэ өлөрөллөр, туттарга анаммыт барааннары курдук көрөллөр.

²⁴Оо, туруй, тоҕо утуйан хааллыҥ, Айыы Тойон? Уһугун, биһигиттэн бүтэһиктээхтик аккаастаныма!

²⁵Тоҕо Эн биһигиттэн киэр хайыһаҕын? Тоҕо биһиги эрэйдэнэрбитин, баттанарбытын умнаҕын?

²⁶Биһиги, быылга-буорга тэпсиллэн, өрүттэр кыаҕа суох көлөттөн сытабыт.

²⁷Туран, биһиэхэ көмөлөһө кэл, үтүө санааҕыттан биһигини өрүһүйэн ыл.