Read Библия- Yakut 2021 Саалтыр 47 Bible Online

Саалтыр 47 - Библия- Yakut 2021 bible

Саалтыр 47

¹Ырыа. Корей уолаттарын псалома.

²Айыы Тойон улуу, онон бар дьон айхала Киниэхэ ананар биһиги Таҥарабыт куоратыгар, Кини сибэтиэй хайатыгар.

³Кэрэ көстүүлээх үрдэл, сир бүттүүнүн үөрүүтэ — Сион хайата; кини хоту өттүгэр улуу Ыраахтааҕы куората турар.

⁴Таҥара бу куорат кириэппэстэригэр бигэ көмүскээччи буоларын көрдөрбүтэ.

⁵Ыраахтааҕылар, киксэн баран, бары бииргэ ыга анньан кэлбиттэрэ;

⁶куораты көрөөт да, бэри диэн бэркиһээбиттэрэ, уонна, уолуйа куттанан, атахха биллэрбиттэрэ;

⁷салыбырас буолуохтарыгар диэри онно дьулайбыттара, талыыта киирбит дьахтардыы аймаласпыттара.

⁸Эн илинтэн тыалы түһэрэҥҥин, Фарсис аалларын үлтү охсубутуҥ.

⁹Истибиппитин биһиги дьэ онно илэ көрбүппүт Аанньал сэриитин АЙЫЫ ТОЙОНУН куоратыгар, биһиги Таҥарабыт куоратыгар. Таҥара кинини үйэлэргэ барардыы бөҕөргөтүөҕэ. Села

¹⁰Айыы Таҥара, Эн Храмҥар тураммыт, биһиги Эн бигэ тапталгын саныыбыт.

¹¹Эн аатыҥ сири сиксигинэн иһиллэрин курдук, Эйиэхэ айхал эмиэ сир устун иһиллэр. Эн уҥа ытыскар тобус-толору кырдьыгы туппуккун.

¹²Өрөгөйө үрдээтин Сион хайата; Эн көнө дьүүлгүн көрөннөр, үөрдүннэр Иуда куораттара.

¹³Барыҥ, Сиону эргийэн кэлиҥ, башнятын ахсаанын ааҕан билиҥ;

¹⁴өйдөөн көрүҥ кини бөҕөргөтүнүүлэрин, кэрийэ хаамыҥ кириэппэстэрин; оччоҕо кэлин кэнэҕэс көлүөнэлэргэ кэпсиэххит:

¹⁵«Бу Таҥара үйэттэн үйэҕэ биһиги Таҥарабыт, Кини биһигини өлүөхпүтүгэр диэри сирдиэҕэ».