Read Библия- Yakut 2021 Саалтыр 48 Bible Online

Саалтыр 48 - Библия- Yakut 2021 bible

Саалтыр 48

¹Хуор салайааччытыгар. Корей уолаттарын псалома.

²Истиҥ маны, бары норуоттар; болҕойуҥ, сир олохтоохторо бука бары, —

³намыһахтар да, үрдүктэр да, баайдар да, дьадаҥылар да бүттүүн.

⁴Муудараһы мин эһиэхэ амалыйыам; билиибин эһигинниин үллэстэн, сүрэҕим кичэмэллээх санаатын арыйыам.

⁵Өс хоһоонугар мин кулгаахпын чугаһатыам, арфаҕа оонньооммун, таабырыммын таайтарыам.

⁶Куттаныахтаахпын дуо мин алдьархай адаҕыйдаҕына, миигин тилэх баттаһа иһээччилэр хара дьайдара тула өттүбүттэн хаайдаҕына?

⁷Балым баайдарыгар кинилэр эрэнэллэр, халыҥ харчыларынан хайҕаналлар.

⁸Киһи хайдах да кыайан бэйэтин[14] толунуо суоҕа, тыынын төлөбүрүн Таҥараҕа биэриэ суоҕа.

⁹Кини дууһатын толуга муҥура биллибэт күндү, ким да ону хаһан да ситэн төлүө суоҕа —

¹⁰киһи үйэлэр тухары өлбөтөҕө, өҥкөөтүн өҥөйбөтөҕө диэн суох.

¹¹Ким барыта көрөр: муударай да өлөр, ньүдьү-балай, аҥала да барыта антах аттанар, баайын-дуолун атыттарга хаалларар.

¹²Сирдэригэр бэйэлэрин ааттарын иҥэрэллэрэ эрээри, иин буолар кинилэр үйэлэр тухары олорор дьиэлэрэ[15], көлүөнэттэн көлүөнэҕэ олохсуйар сирдэрэ.

¹³Киһи, төһө да чиэстэммитин иһин, куруук баар буолуо суоҕа, кини эмиэ, өлөр-сүтэр кыыл-сүөл курдук, суох буолуоҕа.

¹⁴Төһө да кэннилэриттэн иһээччилэр кинилэр этэллэрин биһирээбиттэрин иһин, ити суолунан барааччылар өйө суох быһыыланаллар. Села

¹⁵Барааннары курдук, кинилэри үтүгэн түгэҕэр хатыахтара, онно өлөр өлүү барыларын маныаҕа; оттон сарсыарда көнө дьон кинилэри баһылыахтара. Симэлийэ сүтүөҕэ кинилэр эттэрэ-сииннэрэ, үтүгэн түгэҕэ буолуоҕа олохсуйар дьиэлэрэ.

¹⁶Оттон мин дууһабын Таҥара өлүү айаҕыттан толуйуоҕа, Кини миигин Бэйэтигэр ылыаҕа. Села

¹⁷Куттаныма киһи байарыттан-тайарыттан, кини дьиэтин баайа-дуола хаҥыырыттан.

¹⁸Өллөҕүнэ, кини тугу да илдьэ барыа суоҕа, баайа-дуола кэнниттэн батыһыа суоҕа.

¹⁹Төһө да тыыннааҕар дьоллоохпун дэммитин, ситиһиилэнэн, дьонтон хайҕаммытын иһин,

²⁰кини эмиэ өбүгэлэригэр аттаныаҕа, сырдыгы аны хаһан да көрбөттөргө барыаҕа.

²¹Киһи, төһө да чиэстэммитин иһин, куруук баар буолуо суоҕа: кини эмиэ, өлөр-сүтэр кыыл-сүөл курдук, суох буолуоҕа.