Read Библия- Yakut 2021 Саалтыр 49 Bible Online

Саалтыр 49 - Библия- Yakut 2021 bible

Саалтыр 49

¹Асаф псалома. Таҥаралар Таҥаралара, АЙЫЫ ТОЙОН, саҥарар — күн күөрэйэр саҕаҕыттан арҕааҥҥа диэри Кини сири ыҥырар.

²Сионтан, эҥкилэ суох кэрэ куораттан, Таҥара килбиэннээх сырдыга сыдьаайар.

³Биһиги Таҥарабыт тиийэн кэлиэҕэ, Кини кэлиитэ чуумпу буолуо суоҕа: иннигэр суостаах уот оргуйуоҕа, тулатыгар добун буурҕа ытыллыаҕа.

⁴Норуотун дьүүллүүрүгэр кэрэһит оҥостоору, Кини үөһэттэн халлааннары уонна сири ыҥырар:

⁵«Мунньуҥ Миэхэ сибэтиэйдэрбин, Миигин кытта, сиэртибэ биэрэн, сөбүлэһии түһэрсибиттэри!»

⁶Айыы Таҥара Бэйэтинэн судьуйалыыр, ол иһин халлааннар Кини кырдьыктааҕын биллэрэллэр. Села

⁷«Иһит, норуотум, Мин этэрбин; Израиль! Мин эйигин утары туоһулуубун. Мин Таҥарабын, эйиэхэ Таҥараҥ буолабын.

⁸Сиэртибэ биэрбэккин диэн, эйигин сэмэлиэм суоҕа — уматан биэрэр бэлэххин өрүү көрөбүн.

⁹Мин ылыам суоҕа оҕуһу Эн дьиэҕиттэн, козеллары — тиэргэҥҥиттэн.

¹⁰Тыа кыыла барыта — Миэнэ, тыһыынчанан томторго мэччийэр сүөһү эмиэ — Миэнэ;

¹¹хайаҕа баар көтөрү ааҕа билэбин, хонууга сылдьар кыыл эмиэ барыта — Миэнэ.

¹²Аччыгым да буоллар, Мин эйиэхэ этиэм суоҕа этэ — аан дойду уонна онно баар барыта — Миэнэ.

¹³Сиирим буолуо дуо Мин оҕус этин, иһэрим буолуо дуо козел хаанын?

¹⁴Махталы эн Таҥараҕа сиэртибэлээ, Үрдүктэн Үрдүккэ эрэннэрбиккин толор.

¹⁵Кыһалҕалаах күҥҥэр Миигин ыҥыр; Мин эйигин өрүһүйэн ылыаҕым, оччоҕо эн Миигин айхаллыаҕыҥ».

¹⁶Оттон нэгэйгэ Таҥара этэр: «Тоҕо Мин сокуоннарбын үөрэтэҕин, тоҕо Мин кэс тылбын эн ырытаҕын?

¹⁷Бэйэҥ буоллаҕына Мин үөрэтэрбин абааһы көрөҕүн, Мин тылбын кэнниҥ диэки эһэн иһэҕин.

¹⁸Уоруйаҕы көрдөххүнэ, куодарыһаҕын, көссүүлэһээччилэри кытта алтыһаҕын.

¹⁹Уоһуҥ куһаҕаҥҥа дөбөҥнүк өһүллэр, тылыҥ албыны кэбэҕэстик тиһэр;

²⁰бырааккын утары тыллаһа олороҕун, бэйэҥ ийэҥ оҕотун холуннараҕын.

²¹Эн итинник быһыыланаргын Мин саҥарбат этим, ол иһин Миигин бэйэм курдук дии санаабыккын. Дьэ билигин эйигин дьарыйабын, буруйгун иннигэр ууран биэрэбин.

²²Өйдөөҥ маны эһиги, Таҥараны умнааччылар; эбэтэр, Мин эһигини, хахай курдук, хайа тардыаҕым, онно эһигини ким да өрүһүйэн ылыа суоҕа.

²³Ким Миэхэ махталы сиэртибэлиир, ол Миигин ытыктыыр. Суолун-ииһин болҕойор киһиэхэ Мин Таҥара быыһыырын көрдөрүөҕүм».