Read Библия- Yakut 2021 Саалтыр 5 Bible Online

Саалтыр 5 - Библия- Yakut 2021 bible

Саалтыр 5

¹Хуор салайааччытыгар. Флейта доҕуһуолунан. Давид псалома.

²Иһит, АЙЫЫ ТОЙОН, Эйиэхэ этэрбин, өйдөөн иһит мин энэлийэрбин.

³Болҕой үөгүлүүр саҥабын, Ыраахтааҕым миэнэ, Таҥарам. Эйиэхэ мин үҥэбин.

⁴АЙЫЫ ТОЙОН, тыҥ хатыыта Эн истэҕин мин саҥабын; мин тыҥ хатыыта кэлэммин, Эн иннигэр турабын, Эйигин кэтэһэбин.

⁵Эн кэрээнэ суох быһыыны сөбүлээбэт Таҥараҕын; нэгэй киһи Эйиэхэ ыалдьыттаабат.

⁶Киһиргэс Эн иннигэр кэлэн турбат; кэрээннэрин сүтэрбиттэри Эн барыларын абааһы көрөҕүн.

⁷Сымыйаны саҥарааччылары өлөрөҕүн; хаанымсахтан, албынтан АЙЫЫ ТОЙОН сиргэнэр.

⁸Оттон мин, Эн муҥура суох үтүөҕүнэн, Эн Дьиэҕэр киириэм; Эйигиттэн толлон тураммын, сибэтиэй Храмҥар сүгүрүйүөм.

⁹АЙЫЫ ТОЙОН, Бэйэҥ кырдьыккынан миигин өстөөхтөрүм быыстарынан сирдээ, Эйигин батыһар суолбун дэхсилээ.

¹⁰Кинилэр тылларыгар кырдьык диэн суох: сүрэхтэрэ — өлөрөр-өһөрөр санаа, бэлэстэрэ — иин маҥалайа, тыллара-өстөрө — албын-ньымаат.

¹¹Айыы Таҥара, Эн кинилэри буруйдаа, оҕуруктаах куомуннарыттан бэйэлэрэ оҕуттуннар; халыҥ аньыыларын иһин киэр кыйдаа: кинилэр Эйигин утары өрө турбуттара.

¹²Оттон Эйиэхэ эрэнээччи барыта үөрүөхтүн, үөрүүлээх ырыа аргыстаах буолуохтун өрүүтүн; Эн ааккын таптааччылар Эйигинэн күөн тутталларын туһугар кинилэри Эн араҥаччылаа.

¹³АЙЫЫ ТОЙОН, Эн кырдьыгы тутуһааччыны алгыыгын, үтүө сыһыаҥҥынан кинини куйахтыы харыстыыгын.