Read Библия- Yakut 2021 Саалтыр 59 Bible Online

Саалтыр 59 - Библия- Yakut 2021 bible

Саалтыр 59

¹Хуор салайааччытыгар: «Кэс Тыл сардааната» матыыбынан. Давид үөрэтэр ырыата.

²Давид, Месопотамия уонна Цова сириецтарын кытта сэриилэһэ сылдьан, кыргыһыыттан эргиллэн иһэр Иоав Туустаах хочоҕо 12000 эдомиты сууһарбытыгар, ыллаабыт ырыата.

³Айыы Таҥара, Эн биһигиттэн аккаастанныҥ, биһиги бөҕөргөтүнүүлэрбитин үрэйдиҥ; Эн биһиэхэ уордайдыҥ; оо, ол да буоллар, эргилин!

⁴Эн сири, хамсатан, хайыта ыыттыҥ: кини титирэстии турар, оһор кини баастарын.

⁵Ыар кыһалҕаны Эн норуоккар биллэрдиҥ, биһиги, Эн уохтаах утаххын иһэммит, иэҕэҥнэс буоллубут.

⁶Кырдьык иһин күөрэччи көтөҕөллөрүн туһугар, Эйигиттэн сүгүрүйэ толлор дьоҥҥо Эн былаах туттардыҥ. Села

⁷Эн таптыыр дьонуҥ быыһаналларын туһугар, уҥа илиигинэн кинилэргэ кыайыыны бэлэхтээ уонна биһиэхэ хардар.

⁸Таҥара сибэтиэй Дьиэтиттэн эрэннэрдэ: «Мин Сихем сирин, өрө көтөҕүллэн тураммын, үллэриэм, Сокхоф хочотун усталаах туоратын мээрэйдиэм.

⁹Галаад — Миэнэ, Манассия эмиэ — Миэнэ; Ефрем — баһым кураахтаах куйаҕа, Иуда — Мин скипетрым,

¹⁰Моав — суунар кытаҕым; Едомҥа Мин атаҕым таҥаһын быраҕыам. Чэ эрэ, Филистина сирэ, Миигин кыайан-хотон, үөгүлээ эрэ!»

¹¹Ким миигин бөҕөргөтүнүүлээх куоракка киллэриэҕэй? Ким миигин Едомҥа тиэрдиэҕэй?

¹²Эн буолбатах дуо, биһигиттэн аккаастаммыт, биһиги сэриилэрбитин кытта барсыбат буолбут Таҥара?

¹³Көмөлөс өстөөхпүтүн утары охсуһарбытыгар; киһи көмөтө көдьүүһэ суох.

¹⁴Таҥараны кытта сылдьан, биһиги күүстээх буолуохпут; Кини биһиги өстөөхтөрбүтүн сууһарыаҕа.