Read Библия- Yakut 2021 Саалтыр 7 Bible Online

Саалтыр 7 - Библия- Yakut 2021 bible

Саалтыр 7

¹Вениамин аҕатын ууһуттан төрүттээх Хус туһунан Давид АЙЫЫ ТОЙОҤҤО ыллаабыт ытабыл ырыата.

²АЙЫЫ ТОЙОН Таҥарам, Эйиэхэ мин эрэнэбин; бары күөмчүһүттэрбиттэн миигин быыһаа, өрүһүй.

³Хахай кыыл курдук, өстөөҕүм тырыта тыыппатын, харыһыйтарар кимим да суоҕар соһон илдьэ барбатын.

⁴АЙЫЫ ТОЙОН Таҥарам, өскөтүн мин чахчы итинник кэбилэммит, итинник мөкүтүк дьүһүлэммит буоллахпына,

⁵биитэр мин, бэл төрүөтэ суох миэхэ өстүйбүтү өрүһүйээччи, эйэ-дэмнээх киһибэр куһаҕанынан төлөөбүт буоллахпына,

⁶оччоҕуна өстөөҕүм, ир суолбун ирдээн, ситэн ылыахтын; олохпун сиргэ-буорга тэпсиэхтин, дууһабын хара быылынан тибиэхтин. Села

⁷Туруй, АЙЫЫ ТОЙОН, уордайан; турун, илбиһирбит өстөөхтөрбүн утаран; уһугун мин туспар — Эн көнө дьүүлү ирдээбитиҥ.

⁸Норуоттар, түмсэннэр, Эйигин тула турдуннар; Эн үөһэ тахсан олор кинилэр үрдүлэринэн.

⁹АЙЫЫ ТОЙОН норуоттары дьүүллүүр. Дьүүллээ миигин, АЙЫЫ ТОЙОН, кырдьыкпынан, сүрэҕим ырааһынан көрөҥҥүн.

¹⁰Тохтуохтун хара дьайдаахтар дьайдара, оттон көнө киһини Эн бөҕөргөт, сүрэҕи-быары тургутар, кырдьыгы көрөр Таҥара.

¹¹Таҥара — мин куйаҕым, Кини көнө сүрэхтээхтэри быыһыыр.

¹²Таҥара — кырдьыктаах судьуйа, хайа да күн кытаанах ирдэбиллээх Таҥара.

¹³Көммөттөрү утары Кини кылыһын сытыыланар, кинилэри ытаары, ох саатын кирсин тардар;

¹⁴өлөрөр сэбин-сэбиргэлин тэринэр, уоттаах оноҕостору бэлэмнэнэр.

¹⁵Көр, ол хайдах хара дьайы истэригэр үөскэтэн, өһүөнү-өһөгөйү иитиэхтээн, албыны-көлдьүнү төрөтөллөрүн.

¹⁶Иин бэлэмнииллэр, онтуларын хаһан бүтэрэллэр, итиэннэ хаспыт ииннэригэр бэйэлэрэ иҥнэстэллэр.

¹⁷Өһүөннэрэ бэйэлэрин төбөлөрүгэр эргийэр, өһөгөйдөөх дьайыылара бэйэлэрин оройдоругар түһэр.

¹⁸Кырдьыгы көрөрүн иһин, мин АЙЫЫ ТОЙОНУ айхаллыам, Үрдүктэн Үрдүк АЙЫЫ ТОЙОН аатыгар ырыа ыллыам.