Read Библия- Yakut 2021 Саалтыр 70 Bible Online

Саалтыр 70 - Библия- Yakut 2021 bible

Саалтыр 70

¹Эйиэхэ, АЙЫЫ ТОЙОН, мин эрэнэбин, хаһан да мин кыбыстыыга кииримиим.

²Кырдьыктаах Бэйэҥ миигин өрүһүй, босхолоо, көрдөһөрбүн истэн, быыһаан ыл.

³Куруук кэлэн хорҕойорум курдук, туруук таас хайам буолан хаххалаа; миигин быыһатан ылардыы Эн дьаһай, мин туруук хайам, мин кириэппэһим Эн бааргын эбээт.

⁴Айыы Таҥарам, өрүһүй хара дьайдаах илиититтэн, суута-сокуона суохтартан, күөмчүлээччиттэн.

⁵Эн буолаҕын, Айыы Тойон, мин эрэлим, Эйиэхэ эрэнэбин, АЙЫЫ ТОЙОН, эдэр сааспыттан.

⁶Эн этиҥ мин төрүөхпүттэн бигэ тирэҕим; ийэм иһиттэн миигин Эн таһаарбытыҥ. Эйиэхэ мин өрүүтүн уруй-айхал этэбин.

⁷Төһө да миигин үгүстэр дьиибэргии көрдөллөр, Эн буолаҕын мин халыҥ хаххам, суон дурдам.

⁸Уруй-айхал тыла уоспуттан кутуллан, уһун күн устата мин Эйиэхэ махтана сылдьабын.

⁹Кырдьан-бохтон да олордохпуна, миигин киэр анньымаар, күүһүм-күдэҕим сөллүүтэ хаалларар буолумаар.

¹⁰Өстөөхтөрүм миигин киртитэллэр, өлөрөргө сананааччылар киксэллэр:

¹¹«Таҥара кинини хаалларда, тутан ылардыы сойуолааҥ, ким да кинини өрүһүйбэт», — дэһэллэр.

¹²Айыы Таҥара, Эн миигиттэн тэйимэ; Айыы Таҥарам, миэхэ көмөҕө тиэтэй!

¹³Саакка киирэн өллүннэр миигин буруйдааччылар; сурахтара суулуннун, ааттара алдьаннын миэхэ куһаҕаны оҥоруохтарын баҕарааччылар.

¹⁴Оттон мин өрүүтүн Эйиэхэ эрэниэм, Эйигин айхаллыырбын күүһүрдэн эрэ иһиэм.

¹⁵Эн кырдьыктааххын мин иһитиннэриэм; ахсаанын ааҕан сиппэтэрбин даҕаны, абыраллаах дьайыыларгын күн аайы сэһэргиэм.

¹⁶Кэлэммин, АЙЫЫ ТОЙОН ТАҤАРА сүдү күүһүн айхаллыам, Эн кырдьыктаах быһыыгын, Эйиэнин эрэ, мин ахтыам.

¹⁷Айыы Таҥара, Эн миигин эдэр эрдэхпиттэн үөрэтэриҥ, мин билиҥҥэ диэри Эн сөҕүмэр дьайыыларгын кэпсиибин.

¹⁸Онон төһө да кырдьыбытым, аһым аастыйбытын иһин, Айыы Таҥара, кэнчээри ыччакка, бары кэнэҕэс кэлээччигэ Эн күүскүн-кыаххын иһитиннэриэхпэр диэри миигин хаалларар буолумаар.

¹⁹Эн кырдьыгыҥ, Айыы Таҥара, үрдүк халлааннарга тиийэр; Эн сүдү дьайыылары оҥордуҥ. Ким баарый Эйиэхэ холоонноох, Айыы Таҥара?

²⁰Иэнэ биллибэт иэдээни Эн миэхэ ыытарыҥ, итиэннэ эмиэ тилиннэрэн, сир түгэҕиттэн миигин таһаарарыҥ;

²¹Эн, миигин үрдүктүк тутаҥҥын, дууһабар уоскулаҥы биэрэриҥ.

²²Арфа тыаһын намылытан, мин Эйигин айхаллыам, Эн кырдьыккын, Айыы Таҥарам; лира тыаһын дьүрүһүтэн, Эйигин уруйдаан ыллыам, оо, Израиль Сибэтиэйэ.

²³Эйигин айхаллаатахпына, ырыам тыла үөрүүбүттэн дөбөҥнүк тахсар; Эйиэхэ өрүһүйтэрэн, дууһам өрөгөйдүүр.

²⁴Миэхэ куһаҕаны оҥоро сатаабыттар саакка киирбиттэрин, ааттара сууллубутун иһин, мин күн аайы Эн кырдьыктааххын иһитиннэриэм.