Read Библия- Yakut 2021 Саалтыр 73 Bible Online

Саалтыр 73 - Библия- Yakut 2021 bible

Саалтыр 73

¹Асаф үөрэтиитэ. Оо, Таҥара, тоҕо Эн биһигини букатын хааллардыҥ? Тоҕо Бэйэҥ мэччирэҥиҥ барааннарыгар уордайдыҥ?

²Өйдөөн кэл былыр талан ылбыт дьоҥҥун — Бэйэҕэр норуот гынаары толуйбуккун. Өйдөө олохсуйа сылдьыбыт Сион хайаҕын.

³Кэлэн көр бу бүтэһиктээх урусхалы; сибэтиэй Дьиэ иһигэр өстөөх тугу да ордорботох.

⁴Эн Дьиэҕэр өстөөхтөрүҥ үөгүлэһэллэр, онно аны кинилэр былаахтара ыйанан тураллар.

⁵Кинилэр мас хатыһа үүммүт лабааларын сүгэнэн кэрдээччилэри санаталлар.

⁶Быһан оҥоһуллубут ойууну-мандары барытын сүгэнэн, өтүйэнэн үлтү сынньыбыттар.

⁷Эн сибэтиэй Дьиэҕин күл-көмөр оҥорбуттар, Эн ааккар сүгүрүйэр сирбитин киртиппиттэр.

⁸«Букатыннаахтык кинилэри үрэйиэхпит», — дэммиттэр, Таҥараҕа түмсэр сирбитин барытын умаппыттар.

⁹Ханнык да бэлиэ дьикти биһиэхэ көстүбэт буолбут; аны пророктар суохтар, хаһааҥҥа диэри маннык барарын хайабыт да билбэт.

¹⁰Хаһааҥҥа диэри, Айыы Таҥара, өстөөх биһигини үөҕэр? Ама утарсааччы үйэ тухары холуннарыа дуо Эн ааккын?

¹¹Тоҕо Эн илиигин кэннигэр кистии туттаҕын? Оо, тоҕо уҥа илиигин хонноҕуҥ анныгар уктаҕын?

¹²Айыы Таҥара, аан маҥнайгыттан мин Ыраахтааҕым, Эн сиргэ быыһабыллаахтык дьайаҕын.

¹³Эн сүдү күүскүнэн муораны икки аҥыы хайыппытыҥ, ууга баар моҕойдор бастарын хампарыппытыҥ;

¹⁴Левиафан[19] кыылы, бастарын хампы охсон баран, этин кураайы дуол харамайдарыгар сиэтэ биэрбитиҥ.

¹⁵Эн дьүүктэлэри, үрэхтэри сүүрдүбүтүҥ, күүстээх өрүстэри кумаҕынан көрдөрбүтүҥ.

¹⁶Күнүскү кэм — Эйиэнэ, түүн эмиэ — Эйиэнэ, күнү да, ыйы да Эн туруорбутуҥ;

¹⁷сир бары чэрчитин Эн быспытыҥ; сайыны да, кыһыны да Эн айбытыҥ.

¹⁸Өйдөө, АЙЫЫ ТОЙОН, өстөөх Эйигин үөҕэрин, өйө суохтар Эн ааккын киртитэллэрин!

¹⁹Холуубуҥ дууһатын торҕон кыылларга туттарыма; дьадаҥыларыҥ олохторун хаһан да умнума.

²⁰Өйдөө Бэйэҥ кэс тылгын; сир хараҥа муннуга барыта ороспуой ордуута буолла.

²¹Баттаммыты-үктэммити кыбыстыыга киллэртэримэ; дьадаҥы-кыһалҕалаах Эн ааккар айхал этиэхтин.

²²Туран, Айыы Таҥара, Бэйэҥ дьыалаҕын көмүскээ; өйө суохтар күнү быһа Эйигин күлэллэрин Эн өйдөө.

²³Умнума өстөөхтөрүҥ үөгүлэрин-хаһыыларын, Эйигин утары өрө турааччылар намыраабат айдааннарын.