Read Библия- Yakut 2021 Саалтыр 78 Bible Online

Саалтыр 78 - Библия- Yakut 2021 bible

Саалтыр 78

¹Асаф псалома. Айыы Таҥара, Эн сиргэр омуктар киирдилэр; Эн сибэтиэй Храмҥын киртиттилэр, Иерусалимы урусхал оҥордулар.

²Кулуттарыҥ өлүктэрин халлаан көтөрдөрүгэр хааллардылар; сибэтиэй дьоҥҥун сир дьиикэй кыылларыгар бырахтылар.

³Кинилэр хааннарын Иерусалим тулатыгар уу курдук тохтулар, көмүөх-харайыах дьону ордорботулар.

⁴Биһиги ыаллыы норуоттарбыт күлүүлэригэр бардыбыт, тула олорооччуларбыт ыстыыр ыастара буоллубут, саакка-суукка киирдибит.

⁵Оо, хаһааҥҥа диэри, АЙЫЫ ТОЙОН? Ама үйэлэр тухары кыыһыра сылдьыаҥ дуо? Хаһан Эн күнүүҥ күүдэпчилэнэн бүтэрий?

⁶Кыһыыгын-абаҕын тоҕо сүөкээ Эйигин билбэт норуоттарга, Эн ааккын ыҥырбат саарыстыбаларга.

⁷Иаковы кинилэр сиэбиттэрэ, сирин-уотун кинилэр иччитэхсиппиттэрэ.

⁸Аҕаларбыт аньыыларыгар буруйдаабакка, биһигини амарахтык көрсөргө тиэтэй; муҥур уһукка биһиги түстүбүт эбээт.

⁹Килбиэннээх аатыҥ туһугар биһиэхэ көмөлөс, Айыы Таҥара Быыһааччыбыт. Бэйэҥ аатыҥ туһугар биһигини өрүһүй, аньыыбытын бырастыы гын.

¹⁰Тоҕо омуктар: «Таҥаралара ханнаный?» — диэхтээхтэрий? Эн кулуттарыҥ хаанын иэстэһэргин норуоттар биллиннэр, биһиги эмиэ ону көрүүбүт.

¹¹Билиэн барбыттар энэлгэннэрэ Эйиэхэ тиийиэхтин; сүдү күүскүнэн өрүһүй өлөргө анаммыттары.

¹²Сэттэ бүктээн ситис ыалларбытыттан үөҕүүлэрин иһин, Эйигин, Айыы Тойон, үөхпүттэрин иһин.

¹³Оччоҕо биһиги, Эн норуотуҥ, Эн мэччирэҥиҥ бараанын үөрэ, үйэлэр тухары Эйиэхэ махтаныахпыт, көлүөнэттэн көлүөнэҕэ Эйигин айхаллыахпыт.