Read Библия- Yakut 2021 Саалтыр 88 Bible Online

Саалтыр 88 - Библия- Yakut 2021 bible

Саалтыр 88

¹Ефам Езрахит үөрэтиитэ.

²АЙЫЫ ТОЙОН, мин үйэм тухары ыллыам Эн бигэ тапталгын, көлүөнэттэн көлүөнэҕэ иһитиннэриэм Эн кырдьыккын.

³Мин билэбин[27]: Эн тапталыҥ үйэлэр тухары уларыйбат, Эн кырдьыгыҥ халлааннар курдук бигэ — тулхадыйбат.

⁴Эн эппитиҥ: «Мин талыылаахпын кытта сөбүлэһии түһэристим, кулуппар Давидка андаҕар тылбын эттим:

⁵„Эн удьуордарыҥ куруутун ыраахтааҕы буолуохтара, Эн бүрүстүөлгүн Мин үйэттэн үйэҕэ туругурдуоҕум“». Села

⁶Халлааннар айхаллыахтара, АЙЫЫ ТОЙОН, Эн сөҕүмэр дьайыыгын, сибэтиэйдэр түмсүүлэригэр уруйдуохтара Эн кырдьыккын.

⁷Ким халлааҥҥа АЙЫЫ ТОЙОНУ кытта тэҥнэһиэй? Ким Таҥара уолаттарыттан АЙЫЫ ТОЙОҤҤО холонуой?

⁸Сибэтиэйдэр түмсүүлэригэр АЙЫЫ ТОЙОНТОН куттаналлар, Кини кимнээҕэр да, тулатыгар бааллартан, дьулаан.

⁹АЙЫЫ ТОЙОН, Аанньал сэриитин Таҥарата, ким баарый Эн курдук күүстээх, АЙЫЫ ТОЙОН? Эн кырдьыгыҥ тулаҕар илэ-бодо көстөр.

¹⁰Эн бааллырар байҕалы салайаҕын, муора уордаах долгунун уоскутаҕын.

¹¹Эн Раавы[28] самнаран өлөрдүҥ; өстөөхтөргүн күүстээх илиигинэн үрэйдиҥ.

¹²Халлааннар — Эйиэннэрэ, сир эмиэ — Эйиэнэ, аан дойдуну, онно баары барытын Эн олохтообутуҥ.

¹³Хотуну-соҕурууну Эн айбытыҥ; Фавордаах Ермон, үөрэ-көтө, Эн ааккын айхаллыыллар.

¹⁴Эн модун быччыҥнааххын, бөҕө-таҕа илиилээххин, Эн уҥа илиигин өрө көтөхпүккүн.

¹⁵Кырдьыктаах быһыы, көнө дьүүл — Эн бүрүстүөлүҥ тирэҕэ; бигэ таптал уонна кырдьык Эн иннигэр иһэллэр.

¹⁶Дьоллоох даҕаны кыайыы өрөгөйүн билбит норуот! АЙЫЫ ТОЙОН, кини Эн сыдьаайдаах сырдыккар сылдьар.

¹⁷Эн аатыҥ кинини уһун күн устата үөрдэр, Эн кырдьыктаах быһыыҥ кинини үрдэтэр.

¹⁸Эн буолаҕын кини килбиэннээх күүһэ; Эн үтүөҕүнэн биһиги кыайыыны ситиһэбит.

¹⁹АЙЫЫ ТОЙОН биһиэхэ көмүскээччини биэрдэ, Израиль Сибэтиэйэ биһиэхэ ыраахтааҕыны туруорда.

²⁰Онтон Эн бэриниилээх кулуккар көстөн эппитиҥ: «Эр санаалаахха Мин көмө оҥордум, норуоттан талан ылбыт киһибин өрө таһаардым.

²¹Давиды, Бэйэм кулуппун, буламмын, сибэтиэй елей арыыбынан аҕаатым;

²²Мин илиим кинини өрүү өйүөҕэ, Мин күүһүм кинини бөҕөргөтүөҕэ,

²³хайа да өстөөх оччоҕо кинини хотутуо суоҕа, хара дьайыылаах булгурутуо суоҕа.

²⁴Мин кини өстөөхтөрүн, көрөн турдаҕына, сууһарыаҕым, кинини абааһы көрөөччүлэри самнарыаҕым.

²⁵Мин кырдьыгым, тапталым кинини арыаллыахтара, Мин аатым кинини кыайыылаах оҥоруоҕа.

²⁶Байҕал далайын Мин киниэхэ баһылатыам, улуу өрүстэри киниэхэ бас бэриннэриэм.

²⁷Кини Миигин: „Аҕам миэнэ, Таҥарам, быыһанар Очуоһум!“ — диэн ыҥырыаҕа.

²⁸Кини Мин бастакы уолум буолуоҕа, сир хайа да ыраахтааҕытыттан үөһэ туруоҕа.

²⁹Үйэлэр тухары уларытыам суоҕа киниэхэ тапталбын, хаһан да кэһиэм суоҕа киниэхэ эппит кэс тылбын.

³⁰Удьуордарын үйэлэр тухары ууһата туруоҕум, бүрүстүөлүн халлаан үйэтэ үйэлиэҕим.

³¹Оттон уолаттара, Мин Сокуоммун хааллараннар, кэриэстээбиппин толорбот буоллахтарына,

³²ыйыыларбын-кэрдиилэрбин кэһэннэр, соруйбуппун тутуспакка бардахтарына,

³³хара дьайыыларын иһин кинилэри тайаҕынан таһыйтыам, буруйдарын иһин оруосканан охсуталыам.

³⁴Оттон Давидка бигэ тапталбын Мин уларытыам суоҕа, киниэхэ бэриниилээх сыһыаммын кубулутуом суоҕа;

³⁵эппит кэс тылбын хаһан да көтүрүөм суоҕа, эрэннэрбиппин кэһиэм суоҕа.

³⁶Мин букатыннаахтык андаҕайбытым Бэйэм сибэтиэй ааппынан: Давидка Мин сымыйалыам суоҕа.

³⁷Кини удьуора үйэттэн үйэҕэ салҕанан барыаҕа, Кини бүрүстүөлэ, күн курдук, өрүү Мин иннибэр туруоҕа.

³⁸Халлаан бигэ туоһута ый курдук, кини үйэлэр тухары тулхадыйыа суоҕа». Села

³⁹Оттон билигин Эн кинини киэр астыҥ, киниттэн аккаастанныҥ, Бэйэҥ туруорбут ыраахтааҕыгар уордайдыҥ.

⁴⁰Кулуккар эппит кэс тылгын көтүрдүҥ, кини хоруонатын сиргэ-буорга бырахтыҥ.

⁴¹Куоратын эркинин барытын сууллардыҥ, кириэппэстэрин урусхал оҥордуҥ.

⁴²Ааһан иһээччилэр бары кинини уоран-талаан ааһаллар, ыаллара күлүү-элэк гыналлар.

⁴³Эн кини утарсааччыларыгар кыайыыны бэлэхтээтиҥ, өстөөхтөрүн барыларын үөрдүтэлээтиҥ.

⁴⁴Кини кылыһын биитин кыларытан биэрдиҥ, кыргыһа сырыттаҕына, кинини бөҕөргөппөтүҥ;

⁴⁵килбиэннээх бэйэтин саппаҕыртыҥ, бүрүстүөлүн сиргэ сууллардыҥ;

⁴⁶кэмин иннинэ кырытыннардыҥ, кыбыстыыга кинини киллэрдиҥ. Села

⁴⁷Хаһааҥҥа диэри, АЙЫЫ ТОЙОН? Ама хаһан да биһиэхэ эргиллиэҥ суоҕа дуо? Хаһааҥҥа диэри Эн уоруҥ уоттуу күүдэпчилэнэр?

⁴⁸Өйдөө дуу мин үйэм хайдахтаах кылгаһын — туох сүпсүгэр Эн айбыккыный киһи аймаҕы барытын?

⁴⁹Ким олох олорон баран өлбөтөҕөй? Ким үтүгэн айаҕыттан өрүһүммүтэй? Села

⁵⁰Ханнаный, Айыы Тойон, Эн урукку бигэ тапталыҥ? Ханнаный эрэбил Бэйэҥ Давидка эрэннэрбитиҥ?

⁵¹Өйдөө, Айыы Тойон, Эн кулуттаргын хоруотуулларын, мин итиччэ норуот үөҕүүтүн уйан сылдьарбын,

⁵²хайдах өстөөхтөрүҥ үөҕэллэрин, АЙЫЫ ТОЙОН, Эн ыраахтааҕыҥ хас хардыытын ыыстыылларын.

⁵³Алгыс буоллун АЙЫЫ ТОЙОҤҤО үйэлэр тухары. Аминь, аминь.