Read Библия- Yakut 2021 Саалтыр 89 Bible Online

Саалтыр 89 - Библия- Yakut 2021 bible

Саалтыр 89

¹Таҥара киһитин Моисей үҥүүтэ. Айыы Тойон, көлүөнэттэн көлүөнэҕэ Эн биһиэхэ халыҥ хаххабыт, суон дурдабыт буоларыҥ.

²Хайалар төрүөхтэрин инниттэн, Эн сири, аан дойдуну үөскэтиэҥ инниттэн үйэттэн үйэлэргэ Эн — Таҥараҕын.

³«Төннүҥ, өлөр үйэлээхтэр!» — диэҥҥин, Эн киһини сиргэ-буорга төнүннэрэҕин.

⁴Тыһыынча сыл Эн хараххар бэҕэһээ ааспыт биир күн кэриэтэ, түүҥҥү аҕыйах чаас эрэ кэриэтэ.

⁵Эн халаан уутунуу, дьону сотон бараҕын; киһи түүл кэриэтэ, сарсыарда үүнэн тахсыбыт от кэриэтэ;

⁶сарсыарда силигилии үүнэр, чэлгийэ көҕөрөр, оттон киэһэ иинэ хатар, хагдарыйа өлөр.

⁷Эн биһиэхэ уордайдаххына, биһиги бүтэр уһукпут кэлэр, Эн абардаххына, айманан-сайманан барабыт.

⁸Биһиги буруйбутун барытын Эн иннигэр ууруннуҥ, кистэлэҥ аньыыбытын сырдыккар таһаардыҥ.

⁹Күммүт-дьылбыт барыта Эн уоргун сэтиилэнэн ааһар, муҥур үйэбит өрө тыыныы кэриэтэ сүтэр.

¹⁰Олохпут кэмэ биһиэнэ — сэттэ уон сыл, ордук тэтиэнэх буоллахпытына, аҕыс уон сыл; ону да күммүт-дьылбыт чээрэтэ — үлэ икки сүпсүк икки, түргэнник ааһар, биһиги өлүүнү көрсө көтөн иһэбит.

¹¹Ким билэрий Эн уоруҥ-кылыныҥ уоҕун, ким өйдүүрүй Эн абаҥ-сатаҥ суоһун?

¹²Муударай буоларбыт туһугар, биһигини олохпут күнүн аахтара үөрэт.

¹³АЙЫЫ ТОЙОН, эргилин! Хаһааҥҥа диэри? Аһын-харыһый кулуттаргын!

¹⁴Сарсыарда эрдэттэн дуоһут бигэ тапталгынан, оччоҕо биһиги үрдүк өрөгөйдөнүөхпүт, үйэбит тухары үөрэ-көтө сылдьыахпыт.

¹⁵Төһө күн Эйигиттэн дьарыллыбыппытый да, төһө сыл эрэйи көрбүппүтүй да, соччонон Эн биһигини үөрт-көтүт.

¹⁶Кулуттарыҥ Эн дьайыыгын көрдүннэр, кинилэр оҕолоро Эн килбиэннээх күүскүн биллиннэр.

¹⁷Айыы Тойон Таҥарабыт үтүө сыһыана биһиэхэ тосхойдун. Ситиһиитэ бэлэхтээ биһиги үлэбитигэр, оҥорбуппутун барытын бөҕөргөт.