Read Библия- Yakut 2021 Саалтыр 90 Bible Online

Саалтыр 90 - Библия- Yakut 2021 bible

Саалтыр 90

¹Ким Үрдүктэн Үрдүк көмөтүнэн олорор, Күүстээхтэн Күүстээх күлүгэр хорҕойор,

²ол АЙЫЫ ТОЙОҤҤО этэр: «Мин халыҥ хаххам, суон дурдам, бигэ кириэппэһим, эрэнэр Таҥарам!»

³Таҥара эйигин бултаһааччы доҕууруттан, өлүүлээх сутултан өрүһүйүөҕэ;

⁴куорсуннарын күлүгэр кистии тутуоҕа, Кини кынатын анныгар куттал суоһуо суоҕа; Кини кырдьыга Эйиэхэ харыҥ куйаҕа, халҕан куйаҕыҥ буолуоҕа.

⁵Куттаныаҥ суоҕа эн түүҥҥү үлүгэртэн, күнүс иһиирэ көтөр бүргэс охтон,

⁶хараҥаҕа хаамар сутултан, күн ортото кураанахтыыр сотуунтан.

⁷Аттыгар тыһыынчанан, уҥа өттүгэр уонунан тыһыынчанан охтуохтара, оттон эйигин ол өлүү таарыйыа суоҕа.

⁸Хараххынан эн ону анаарыаҥ эрэ, хара дьайдаахтары иэстэбил ситэрин көрүөҥ эрэ.

⁹Эрэлим АЙЫЫ ТОЙОН диэбитиҥ, Үрдүктэн Үрдүгү дурда-хахха туттубутуҥ иһин,

¹⁰туох да куһаҕан эйиэхэ буолуо суоҕа, алдьархай эн дьиэҕэр чугаһыа суоҕа;

¹¹Кини Аанньалларыгар эн тускунан соруйуоҕа, оччоҕо бары суолгар араҥаччылыахтара,

¹²таастан бүдүрүйбэтиҥ туһугар, кинилэр эйигин көтөҕөн барыахтара;

¹³эн хахайы да, эриэн үөнү да үлтү үктүөҥ, эдэр хахайы, дьааттаах моҕойу илдьи тэпсиэҥ.

¹⁴«Миигин таптыырын иһин, Мин кинини өрүһүйүөм, Мин ааппын билэрин иһин, көмүскүөм.

¹⁵Миигин ыҥырдаҕына, Мин кинини истиэм; эриирдээх кэмигэр кинилиин бииргэ буолуом, өрүһүйэн ылыам, албан аатырдыам.

¹⁶Уһун олоҕунан Мин кинини дуоһутуом, быыһаан ыларбын киниэхэ көрдөрүөм».