Read Библия- Yakut 2021 Аман өһө 10 Bible Online

Аман өһө 10 - Библия- Yakut 2021 bible

Аман өһө 10

¹Соломуон ох тыллара: Муударай уол аҕатын дьоллуур, акаары уол ийэтин сордуур.

²Албыннаан булуммут баайыҥ абырыа суоҕа, оттон көнө быһыыҥ өлөртөн өрүһүйүөҕэ.

³АЙЫЫ ТОЙОН үтүө киһини аччыктатыа суоҕа, оттон хара санаалааҕы, төһө да ымсыырдын, киэр анньыаҕа.

⁴Көлөөк үлэһит дьадайар, туруу үлэһит байар-тайар.

⁵Өйдөөх уол сайынын сонуокка бурдук быһар, оттон үлэ үгэнигэр утуйа сытааччы саакка барар.

⁶Кырдьыксыт бар дьон алгыһын ылыаҕа. Үөннээх киһи түөкэй — үктэтэн этэрин биллэриэ суоҕа.

⁷Айыы санаалаахтар алгыһы кытта ахтылла туруохтара, оттон хара дьайдаахтар ааттыын-суоллуун умнуллуохтара.

⁸Ким муударай сүрэхтээх, ол үтүө сүбэни ылынар, оттон акаары лахсыыра алдьархайы тардар.

⁹Көнө суолу тутуһааччы холкутук сылдьыаҕа, оттон буруйан барааччы буруйданыаҕа.

¹⁰Ким хараҕынан имнэнэр, ол дьону өһүргэтэр, ким кураанаҕы эрдэр, ол иэдээҥҥэ түбэһэр[8].

¹¹Үтүө киһи тыла-өһө — өлбөт мэҥэ уута. Үөннээх киһи түөкэй — үктэтэн этэрин биллэриэ суоҕа.

¹²Абааһы көрсүүттэн айдаан тахсар, оттон таптал атаҕастабылы бырастыы гынар.

¹³Өйдөөх киһи тыла-өһө оттомноох, оттон акаары таһылларын оҥостор.

¹⁴Муударай киһи билиитин хаҥатар, акаары тыла алдьархайы ааҥнатар.

¹⁵Баай киһиэхэ үбэ-аһа — бөҕө кириэппэһэ, оттон дьадаҥы сир-халлаан икки ардыгар хаалар.

¹⁶Үтүө киһи үлэтэ-хамнаһа — олох туһугар, куһаҕан киһи барыһа — аньыы туһугар.

¹⁷Сиэрдээх сүбэни тутуһуу — бу баар олох эркээйилээх суола; сэмэни-суҥханы аахайбат киһи муна-тэнэ сылдьыаҕа.

¹⁸Абааһы көрөрүн кистэнээччи ньуолбардык кэпсэтэр, хобу-сиби тарҕатааччы ааргытын биллэрэр.

¹⁹Элбэх тыл аньыыта суох буолбат, өйдөөх киһи тылын кыатана туттар.

²⁰Үтүө киһи тыла-өһө — ыраас үрүҥ көмүс, оттон көлдьүн өйө-санаата — көҥдөй сүпсүк.

²¹Үтүө киһи тыла үгүстэри өрүһүйүөҕэ, оттон акаары өйө тиийбэккэ өлүөҕэ.

²²АЙЫЫ ТОЙОН алгыһа киһини байытар уонна кинини тугунан да санаарҕаппат.

²³Акаары куһаҕаны оҥорон саатыыр, оттон өйдөөх киһи муудараһы таптыыр.

²⁴Куһаҕан киһини куттанар суола буулуоҕа, оттон үтүө киһи баҕата туолуоҕа.

²⁵Күүстээх силлиэ түһүө да, сидьиҥнэри имири сотуоҕа, оттон кырдьыксыт үйэ-саас тухары тулхадыйыа суоҕа.

²⁶Сүрэҕэ суоҕу соруйуоҥ — уксуус тиискин сииринии, буруо хараххын аһытарыныы, сордонуоҥ.

²⁷АЙЫЫ ТОЙОҤҤО ытыктабыл олоҕу уһатар, оттон хара дьайдаахтар күннэрэ-дьыллара ааҕыллан турар.

²⁸Үтүө киһи эрэлэ үөрдүөҕэ, мөкү киһи эрэлэ өһүөҕэ.

²⁹АЙЫЫ ТОЙОН ыраас дууһалаахтары араҥаччылыыр, оттон хара дьайдаахтары имири эһэр.

³⁰Кырдьыксыт хаһан да халбаҥныа суоҕа, оттон куһаҕан дьон сир үрдүгэр уһуохтара суоҕа.

³¹Үтүө киһи уоһуттан муударас аллар, оттон быдьар тыллаах тыла быһыллыа.

³²Үтүө киһи күттүөннээҕи булан этэр, оттон куһаҕан куһаҕаны эрэ билэр.