Read Библия- Yakut 2021 Аман өһө 11 Bible Online

Аман өһө 11 - Библия- Yakut 2021 bible

Аман өһө 11

¹АЙЫЫ ТОЙОН албын ыйааһыны абааһы көрөр, Кини көнө атыыны-тутууну сөбүлүүр.

²Улаханнык сананыаҥ — саакка-суукка барыаҥ; муударай киһи сэмэй.

³Көнө киһини ыраас сигилитэ сирдиэҕэ, оттон уодаһыннааҕы уодаһына өлөрүөҕэ.

⁴Таҥара уордайар күнүгэр баайыҥ-дуолуҥ эйигин абырыа суоҕа, оттон көнө быһыыҥ өлөртөн өрүһүйүөҕэ.

⁵Көнө быһыы, ыраас сигили эркээйилээх суолунан сирдииллэр, оттон сидьиҥ сидьиҥи оҥоро сылдьан охтуоҕа.

⁶Көнө дууһалааҕы кырдьыга быыһыаҕа, оттон уодаһыннааҕы кыдьыга алдьатыаҕа.

⁷Куһаҕан киһи өллө да, эрэммитэ барыта сүтүөҕэ, хара санаалаахтар баҕалара туолуо суоҕа.

⁸Кырдьыксыт алдьархайтан быыһаныаҕа, кини оннугар нэгэй киирэн биэриэҕэ.

⁹Таҥараны билиммэт киһи тыла-өһө дьону сатарытар, ол эрээри көнө дьон билиилэринэн быыһаныахтара.

¹⁰Үтүө киһи этэҥҥэ олордоҕуна куорат бүттүүнэ үөрэр, оттон куһаҕан дьон өллөҕүнэ дьоро кэм үүнэр.

¹¹Көнө дьон алгыһа куораты албан аатырдар, куһаҕан дьон тыла айгыратар.

¹²Акаары киһи атыттары сиилиир-хоһулуур, оттон өйдөөх тугу да саҥарбат.

¹³Хобу-сиби таһааччы дьон кистэлэҥин ускайдыыр, оттон эрэллээх киһи ону харыстыыр.

¹⁴Үтүө сүбэтэ-амата суох норуот сатарыйар, оттон сүбэһит элбэҕэр быыһанар.

¹⁵Туора киһи туһугар илии охсуһуоҥ — сору булунуоҥ, эрэннэрэргэ тиэтэйбэт ордук — холкутук олоруоҥ.

¹⁶Үтүө майгылаах дьахтар ытыктаныаҕа, дьүккүөрдээх үлэһит байыаҕа.

¹⁷Үтүө санаалаах бэйэтигэр үтүөнү оҥостор, хаҕыс майгылаах бэйэтигэр алдьархайы ыҥырар.

¹⁸Куһаҕаны оҥорооччу албын манньаны ылар, оттон үтүөнү үксэтээччи дьиҥ манньаҕа тиксэр.

¹⁹Үтүөнү оҥорооччу олоҕун оҥкулланар, оттон кири-дьайы сырсааччы өлөргө дьулуһар.

²⁰Сидьиҥнэртэн АЙЫЫ ТОЙОН сиргэнэр, Кини иҥэ-дьаҥа суох көнө дьонтон үөрэр.

²¹Саараама даҕаны: хара дьайдаах киһи накаастабылтан куотуо суоҕа, оттон көнө суолунан сылдьааччы быыһаныаҕа.

²²Кыраһыабай гынан баран, акаары дьахтар таныытыгар кыһыл көмүс көлөөскөлөөх сибиинньэ кэриэтэ.

²³Үтүө киһи эрэмньитэ үтүөнү эргитэр, оттон хара санаалаахтар ыралара Таҥараны уордатар.

²⁴Сорох дэлэйдик бэрсэр эрээри, эбии байар-тайар, сорох, сиэри таһынан кэччэйэрин үрдүнэн, дьадайар.

²⁵Байым илиилээх баайдык олоруоҕа, утаппыт утаҕын ханнарааччы уута суох хаалыа суоҕа.

²⁶Бурдугу кистэнээччини дьон-сэргэ кырыыр, оттон атыыга таһаарааччыны алгыыр.

²⁷Ким үтүөҕэ дьулуһар, ол Таҥара алгыһын ылар, ким кири-дьайы эккирэтэр, ол бэйэтигэр куһаҕаны ыҥырар.

²⁸Баайыгар эрэнээччи эстиэҕэ, оттон үтүө киһи киил мастыы чэлгийиэҕэ.

²⁹Дьиэтин-уотун үрэйээччи тиһэҕэр кураанаҕы кууһуоҕа, акаары киһи муударайга кулуттуоҕа.

³⁰Көнө быһыы үүнүүтэ — олох Аал луук маһа; муударай киһи дьон кутун тутар[9].

³¹Үтүө киһи манньатын бу сиргэ ылар эбит буоллаҕына, нэгэй быһыылаах, аньыылаах киһи буруйданара биллэн турар.