Read Библия- Yakut 2021 Аман өһө 12 Bible Online

Аман өһө 12 - Библия- Yakut 2021 bible

Аман өһө 12

¹Ким билиигэ тардыһар, ол сүбэлэтэрин сөбүлүүр, оттон сэмэни иннинэн истибэт киһи ньүдьү-балай.

²Амарахха АЙЫЫ ТОЙОН амарахтык сыһыаннаһыаҕа, оттон уодаһыннааҕы уодьуганныаҕа.

³Сидьиҥ киһи сир үрдүгэр тирэҕириэ суоҕа, оттон үтүө киһи бөҕө силистэниэҕэ.

⁴Үтүөкэн дьахтар — эрин үрдүк үөрүүтэ, оттон сааппат сирэй — уҥуохха ириҥэ көйүүтэ.

⁵Кырдьыксыт кырдьыктааҕы толкуйдуур, куһаҕан киһи уодаһыннааҕы торумнуур.

⁶Куһаҕан киһи тыла-өһө хааҥҥа суудайыылаах, үчүгэй киһи тыла абыраллаах.

⁷Алдьархай ааҥныа да, хара дьайдаахтары имири сотуоҕа, оттон үтүө киһи дьиэтэ-уота бигэтик туруоҕа.

⁸Сиэрдээх тыллааҕы хайгыыллар, сидьиҥ санаалааҕы сирэллэр.

⁹Улуутумсуйар эрээри, туос аччык киһитээҕэр үлэлээн айаҕын булунар көннөрү киһи быдан ордук.

¹⁰Үтүө киһи сүөһүтүгэр кытта кыһамньылаах, оттон куһаҕан киһи муус сүрэхтээх.

¹¹Сирин оҥостооччу аччыктыа суоҕа, оттон акаары — тыалы сырса сылдьыаҕа.

¹²Куһаҕан киһи күүстээх кириэппэһэ сууллуоҕа, оттон үтүө киһини туох да тулхадытыа суоҕа[10].

¹³Сидьиҥ киһи сымыйа тылыгар иҥниэҕэ, оттон кырдьыксыт алдьархайтан быыһаныаҕа.

¹⁴Үтүө тылыҥ үгүс үтүөнү түстүөҕэ, үлэҥ-хамнаһыҥ төлөбүр буолан төннүөҕэ.

¹⁵Акаары киһи көнө суолллаах-иистээх курдук сананар, оттон муударай — сүбэни-аманы ылынар.

¹⁶Акаары өһүргэммитэ тута биллэр, оттон өйдөөх, үөҕүллэн да баран, истибэтэх курдук туттар.

¹⁷Көнө киһи тыла кырдьыктаах, албын туоһу тыла уодаһыннаах.

¹⁸Ардыгар, кураанах куолу да болоттуу бааһырдар, оттон муударай тыл өрүү үтүөрдэр.

¹⁹Кырдьык үйэлэргэ барар, оттон сымыйа үйэтэ — чыпчылҕан түгэнэ.

²⁰Куһаҕаны торумнааччы сүрэҕэ уодаһыннаах, эйэни тэрийээччи сүрэҕэ үөрүүлээх.

²¹Үтүө киһи туох да куһаҕаҥҥа түбэһиэ суоҕа, оттон куһаҕан куруук сордонуоҕа.

²²АЙЫЫ ТОЙОН сымыйаны абааһы көрөр, Кини көнө дьону ылынар.

²³Өйдөөх киһи билэрин-көрөрүн кистэнэр, оттон акаары акаарытын сонно биллэрэр.

²⁴Туруу үлэһит тойон буолуоҕа, күөх сүрэх кулуттуоҕа.

²⁵Дьиксинии сүрэҕи элэтэр, оттон үтүө тыл үөрдэр.

²⁶Үтүө киһи доҕотторугар суол ыйыаҕа[11], оттон куһаҕан киһи муннарыаҕа.

²⁷Сүрэҕэ суох мас көтөрүн да өлөрүө суоҕа, оттон хоһуун үлэһит үбэ-аһа дэлэй буолуоҕа[12].

²⁸Кырдьык суола олоххо киллэрэр, оттон токур суол өлүүгэ тиэрдэр[13].