Read Библия- Yakut 2021 Аман өһө 13 Bible Online

Аман өһө 13 - Библия- Yakut 2021 bible

Аман өһө 13

¹Аҕатын үөрэҕин ылынар уолтан муударай киһи тахсар, оттон хадаар хаата сэмэни истэ да барбат.

²Үтүө киһи тыла-өһө бэйэтигэр үтүөнү эргитэр, оттон үктэтиилээх өйдөөхтөр күөмчүлүүр эрэ мөккүөрдээхтэр.

³Тылын кыатанааччы олоҕун харыстанар, үгүһү түөһээччи иэдээҥҥэ түбэһэр.

⁴Сүрэҕэ суох кэтэһэ саныыр да, киниэхэ биэриэхтэрэ суоҕа, оттон туруу үлэһит тото-хана аһыаҕа.

⁵Кырдьыксыт сымыйа тылы абааһы көрөр, оттон сидьиҥ киһи саакка барыаҕа, сир-буор сирэйдэниэҕэ.

⁶Көнө суоллааҕы кырдьыга харыстыаҕа, хара саҥнааҕы кыдьыга алдьатыаҕа.

⁷Сорох байымсыйар да, турар бэйэтинэн эрэ, сорох кэриэлийэр да, үбэ-аһа дэлэй.

⁸Баай халыҥ харчытынан толунан тыыннаах хаалар, оттон дьадаҥыны саана да барбаттар.

⁹Үтүө киһи ыһыырынньыга үөрэ-көтө умайыаҕа, куһаҕан дьон уота умуллуоҕа.

¹⁰Бэрдимсийии өстөһүүнү эрэ үөскэтэр, оттон муударай дьон сүбэлэһэр.

¹¹Дөбөҥнүк көстүбүт үп-ас дөбөҥнүк баранар, оттон сыранан мунньуллубут — эбиллэ турар.

¹²Туолан биэрбэт баҕа санаа — сүрэх ааспат бааһа, оттон ыра санаа туолуута — олох Аал луук маһа.

¹³Ким этиллибит тылы ылыммат, ол өлөрүн оҥостор[14], оттон кэриэһи ытыктааччыга алгыс тосхойор.

¹⁴Муударай киһи үөрэҕэ — өлбөт мэҥэ уута — бар дьону өлүү ситимиттэн өрүһүйүөҕэ[15].

¹⁵Өйдөөх киһи дьон-сэргэ ытыктабылын ылар, оттон түөкэйдэр суоллара өлүүгэ тиэрдэр.

¹⁶Оттомноох тугу барытын толкуйдаан баран оҥорор, оттон акаары ньүдьү-балайын көрдөрөр.

¹⁷Куһаҕан тэҥсик эрэйгэ тэбэр, эрэбил тэҥсик эйэни тэрийэр.

¹⁸Ким үтүө үөрэҕи ылыммат, ол быста дьадайыа, саакка барыа, оттон сүбэни-аманы ылынааччы ытыктабылга сылдьыа.

¹⁹Ыра санааҥ туолуута дууһаҕын дуоһутар; акаары аньыыттан араҕарын туохтан да ыарырҕатар.

²⁰Муударайдыын бодоруһуоҥ — муударай буолуоҥ, акаарылыын булсуһуоҥ — куһаҕаны оҥостуоҥ.

²¹Аньыылааҕы хара дьай батыһар, оттон көнө киһи үтүө манньаны ылар.

²²Үтүө киһи үбэ-аһа оҕолоругар, сиэннэригэр тиксиэҕэ, оттон аньыылаах киһи баайа көнө киһиэхэ бэриллиэҕэ.

²³Дьадаҥылар да сирдэрэ быйаҥнанар эрээри, үүнүүтүн кэрээнэ суохтар тутан ылаллар[16].

²⁴Уолун чыпчаххайдыан кэрэйэр киһи кинини абааһы көрөр, оттон оҕотун таптыыр киһи ноһуоратын эрдэттэн көннөрөр.

²⁵Үтүө киһи дуоһуйа аһыаҕа, оттон хара дьайдаах хам аччык сылдьыаҕа.