Read Библия- Yakut 2021 Аман өһө 15 Bible Online

Аман өһө 15 - Библия- Yakut 2021 bible

Аман өһө 15

¹Сымнаҕас харда уордайбыты уоскутар, оттон хабыр тыл уокка арыыны кутар.

²Муударай дьон тыла-өһө билиигэ угуйар, оттон акаары хой баһын туойар.

³АЙЫЫ ТОЙОН аан дойдуну анаарар: үтүө да, мөкү да барыта — Кини хараҕын далыгар.

⁴Үтүө тыл үтүөрдэр, түөкэй тыл сүһүрдэр.

⁵Акаары уол аҕатын сүбэтин сиргэ-буорга тэпсэр, оттон өйдөөх — сэмэни-суҥханы болҕойон истэр.

⁶Үтүө киһи дьиэтэ-уота барҕа баайдаах, оттон куһаҕан киһи, барыһыран да, туһаламмат.

⁷Муударай киһи билиитин үллэстэр, оттон акаары оннук кыаҕа суох.

⁸Сидьиҥнэр бэлэхтэриттэн АЙЫЫ ТОЙОН сиргэнэр, Кини көнө дьон үҥэриттэн үөрэр.

⁹Куһаҕан дьон суолун АЙЫЫ ТОЙОН абааһы көрөр, Кини кырдьыгы көрдөөччүлэри таптыыр.

¹⁰Суолуттан туорааччы ыардык буруйданыаҕа, сүбэни абааһы көрөөччү өлүөҕэ.

¹¹АЙЫЫ ТОЙОН бэл анараа дойдуну[20] курдары көрөр, онон дьон сүрэҕин өтө көрөрө биллэн турар!

¹²Бэрдимсик сэмэлэтэрин сөбүлээбэт, онон муударай дьоҥҥо барыа суоҕа.

¹³Ким сүрэҕэ ыллыыр, ол сирэйдиин-харахтыын сырдыыр, оттон ыар санаа киһини хам баттыыр.

¹⁴Өйдөөх киһи билиигэ-көрүүгэ тардыһар, оттон акаары солуута суоҕунан дуоһуйар.

¹⁵Дьадаҥы олоҕо эргиччи кыһарҕан, оттон дьоллооххо күннэтэ малааһын.

¹⁶Барҕа баайданан баран дьиксинэ олоруохтааҕар, дьадаҥытык да буоллар, АЙЫЫ ТОЙОҤҤО эрэллээх олорбут ордук.

¹⁷Эмис идэһэ этин тула иирсэ олоруохтааҕар, оҕуруот аһын тула эйэ дэмнээхтик олорбут ордук.

¹⁸Киҥнээх киһи иирээни тардар, оттон тулуурдаах өһү-сааһы ууратар.

¹⁹Күөх көппө суола барыта эрбэһин, оттон үтүө дьон суола-ииһэ эриэ-дэхси.

²⁰Өйдөөх уол аҕатын үөрдэр, акаары уол ийэтин түһэн биэрэр.

²¹Акаары ааргытык быһыыланан астынар, оттон өйдөөх киһи көнө суолунан сылдьар.

²²Сүбэтэ-амата суох дьыала-куолу сатарыйар, оттон сүбэһит элбэҕэр табыллар.

²³Бэргэн хардаҥ бэйэҕин үөрдэр; үчүгэй да буоллаҕа кэмигэр этиллибит үтүөкэн тыл!

²⁴Муударай киһи олох суолун дабайар — өлүү айаҕыттан киэр куотар.

²⁵Улуутумсуктар дьиэлэрин АЙЫЫ ТОЙОН урусхаллыаҕа, оттон огдообо сирин-уотун хараанныаҕа.

²⁶АЙЫЫ ТОЙОН уодаһыннаах санааны абааһы көрөр, Кини үтүө тылы-өһү ылынар.

²⁷Харчыга хараҥарааччы алдьархайы дьиэтигэр ыҥырар, оттон бэриги абааһы көрөөччү кэскилин түстэнэр.

²⁸Үтүө киһи ыараҥнатан баран саҥарар, оттон сидьиҥ сидьиҥи суккуйар.

²⁹АЙЫЫ ТОЙОН хара санаалаахтартан ыраах, Кини көнө дьон көрдөһөрүн истэр.

³⁰Эйэҕэс мичээр үөрдэр, үтүө сурах үтүөрдэр.

³¹Ким сиэрдээх сэмэни ылынар, ол муударай дьоннуун алтыһар.

³²Ким сүбэни сүгүн истибэт, ол бэйэтигэр куһаҕаны оҥостор, оттон сэмэни иннинэн истээччи үтүө өйдөнөр.

³³АЙЫЫ ТОЙОҤҤО ытыктабыл муудараска үөрэтиэҕэ; көрсүө-сэмэй майгы — үтүө аат бастакы үктэлэ.