Read Библия- Yakut 2021 Аман өһө 16 Bible Online

Аман өһө 16 - Библия- Yakut 2021 bible

Аман өһө 16

¹Тугу оҥоруохтааххын торумнанаҕын эрээри, түмүк тылы АЙЫЫ ТОЙОН этэр[21].

²Төһө да суолуҥ-ииһиҥ эҥкилэ суох курдугун иһин, куккун-сүргүн АЙЫЫ ТОЙОН тургутан көрөр.

³Дьыалаҕын-куолугун АЙЫЫ ТОЙОҤҤО туттар, оччоҕо туруорбут соруккун ситиэҕиҥ.

⁴АЙЫЫ ТОЙОН тугу барытын соруктаах айбыт, бэл хара дьайдаахтары кытта алдьархай күнүгэр анаабыт.

⁵Киэбиримсиктэн АЙЫЫ ТОЙОН сиргэнэр; саараама даҕаны, кини накаастабылтан куотуо суоҕа.

⁶Аһыныгас буол, кырдьыгы тутус, оччоҕо буруйгун боруостаныаҥ; АЙЫЫ ТОЙОНТОН толун, оччоҕо хара дьайтан харыстаныаҥ.

⁷АЙЫЫ ТОЙОН сөптөөх суолунан иһэр диэбит киһитин өстөөхтөрүн да кытта иллэһиннэриэҕэ.

⁸Албыннаан-түөкэйдээн байыахтааҕар, дьадаҥытык да буоллар, кырдьыгынан сылдьыбыт ордук.

⁹Барыахтаах суолгун барҕалыыгын эрээри, хардыыгын АЙЫЫ ТОЙОН салайар.

¹⁰Ыраахтааҕы төлкөлөөх тылы түстүүр, кини ыйааҕа сыысхала суох.

¹¹Сөпкө көрдөрөр ыйааһын — АЙЫЫ ТОЙОН ирдэбилэ, мөһөөччүктээх киирэ эмиэ — Кини оҥоһуга.

¹²Бүрүстүөлү кырдьык туругурдар, ол иһин ыраахтааҕылар кири-дьайы тулуйбаттар.

¹³Ыраахтааҕы кырдьыгы истиэн баҕарар, онон көнө дьону сөбүлүүр.

¹⁴Уордайбыт ыраахтааҕы өлөртөрүөн да сөп, ол эрээри муударай киһи кинини уоскутуоҕа.

¹⁵Ыраахтааҕы үөрбүт хараҕа олоҕу эрэннэрэр; кини үтүө сыһыана сааскы быйаҥнаах ардах кэриэтэ.

¹⁶Кыһыл көмүһү мунньуохтааҕар билиини муспут ордук; үрүҥ көмүһү көрдүөхтээҕэр өйдөөх буоларга дьулуспут ордук.

¹⁷Үтүө киһи кири-дьайы тумнан барар; ким суолун-ииһин харыстанар, ол өлөртөн быыһанар.

¹⁸Үрдүктүк санаммыт үгдэрийэр, үтүөмсүк бүдүрүйэр.

¹⁹Баламаттары кытта былдьаммыт баайы үллэстиэхтээҕэр, дьадаҥылары кытта көрсүөтүк олорбут ордук.

²⁰Үөрэнэр үөрэххин болҕой[22] — ситиһиилээх буолуоҥ; АЙЫЫ ТОЙОҤҤО эрэн — дьоллоох буолуоҥ.

²¹Ким муударай сүрэхтээх, ол үтүө өйдөөх дэтиэҕэ, ким эйэҕэс тыллаах, ол итэҕэтиэҕэ.

²²Өйдөөх киһиэхэ өйө — өлбөт мэҥэ уута, оттон ньүдьү-балай накаастабыла — кини акаарыта.

²³Оттомноох киһи тыла-өһө ыйааһыннаах, онон кини этэрэ итэҕэтиилээх.

²⁴Үтүө тыл мүөт кэриэтэ: дууһаҕын үөрдэр, эккин-хааҥҥын үтүөрдэр.

²⁵Сорох суол, көрдөххө, көнө курдук эрээри, тиһэҕэр өлүүгэ тиэрдэр.

²⁶Үлэһит айаҕар сыралаһар, аччыктыыр кыһалҕа кинини кыһайар.

²⁷Куһаҕан куһаҕаҥҥа тиллэр, айаҕын атыа кэрэх — уотунан тибэр.

²⁸Уодаһыннаах киһи дьону охсуһуннарар, хобуоччу эмиэ доҕордуулары өстөһүннэрэр.

²⁹Хара санаалаахтар дьону сатарыталлар, хараҥа-халтараан суолга анньаллар.

³⁰Оҕуруктаары оҥостооччу хараҕын быһыччы көрөр, куһаҕаҥҥа сананааччы уоһун хаанньатар.

³¹Маҥан баттах — килбиэннээх мэнньиэс, дьоһуннаах олох түмүгэ.

³²Тулуурдаах киһи бухатыырдааҕар ордук, ким бэйэтин кыатанар, ол куораты ылар сэрииһиттээҕэр күүстээх.

³³Түөрэх кэбиһэллэр эрээри, барытын АЙЫЫ ТОЙОН быһаарар.