Read Библия- Yakut 2021 Аман өһө 17 Bible Online

Аман өһө 17 - Библия- Yakut 2021 bible

Аман өһө 17

¹Иирээннээх дьиэҕэ малааһынныах кэриэтэ иллээх дьиэҕэ хаппыт килиэп хаҕын сии олорбут ордук.

²Өйдөөх кулут тойонун улдьаа уолун салайыаҕа, ини-биилэр үптэрин үллэстиэҕэ.

³Үрүҥ көмүһү — тиигэл, кыһыл көмүһү — кыһа, оттон киһи сүрэҕин АЙЫЫ ТОЙОН тургутар.

⁴Хара санаалаах хобу-сиби иһиллиир, сымыйаччы оҕуруктаах тылы-өһү сэргиир.

⁵Ким дьадаҥыны үөҕэр, ол кинини Айбыты үөҕэр; ким куһаҕантан үөрэр, ол иэстэбилтэн куотуо суоҕа.

⁶Кырдьаҕастар сиэннэринэн, уолаттар аҕаларынан киэн тутталлар.

⁷Акаары дьоһумсуйан саҥарара, ытык киһи сымыйалыыра — барыта олуона.

⁸Бэрик биэрээччи хараҕар бэлэҕэ аптаах таас кэриэтэ: хайа да диэки хайыһыннардын, барыта табыллар.

⁹Ким тапталга дьулуһар, ол хоргуппутун умнар, ким хоһох хостоһор, ол доҕоруттан матар.

¹⁰Өйдөөҕү биирдэ сэмэлиэҥ кэрэх — көннөрүнүө, оттон акаарыны сүүстэ да таһыйан өйдөппөккүн.

¹¹Хара санаалаах хабырыйсар эрэ баҕалаах, онон киниэхэ хабыр утарсааччы ыытыллыаҕа.

¹²Оройунан оонньообут хоҥ мэйиини көрсүөхтээҕэр, оҕолоруттан маппыт тыһы эһэни көрсүбүт ордук.

¹³Үтүөнү мөкүнэн төлүүр киһи дьиэтиттэн куһаҕан араҕан биэриэ суоҕа.

¹⁴Иирээн быһыт тоҕо барарын кэриэтэ, онон кыыһырсыыны саҥатына саба баттаа.

¹⁵Хара дьайдааҕы быыһаан ылыы, буруйа суоҕу буруйдааһын — хайата да АЙЫЫ ТОЙОН хараҕар сидьиҥ быһыы.

¹⁶Акаары, харчыланан да, абыраммат: кини муудараска уһуллар өйө суох.

¹⁷Доҕоруҥ эйигин мэлдьи таптыыр, сурдьуҥ эмиэ ыарахан кэмҥэр кыһалҕаҕын үллэстэр.

¹⁸Акаары илиитин биэрэ охсорго тиэтэйэр, атыттар иэстэрин төлүөх буолан эрэннэрэр.

¹⁹Ким аньыыны таптыыр, ол араллааны таптыыр; ким үрдүктүк туттар, ол охторун оҥостор[23].

²⁰Уодаһыннаах киһи үтүөнү көрүө суоҕа, албын-түөкэй эмиэ иэдээҥҥэ түбэһиэҕэ.

²¹Акаарыны төрөппүт — кыһалҕаны төрөппүт: акаары аҕата үөрүүнү билбэт.

²²Сүрэх үөрүүтэ эмтиир, санаа түһүүтэ кэрбиир.

²³Куһаҕан киһи көнө дьүүлү токурутаары хоонньуттан бэриги таһаарар.

²⁴Өйдөөх хараҕа — муударас үөрэҕэр, акаары хараҕа — сир түөрт өттүгэр.

²⁵Акаары уолтан аҕата абарар, ийэтэ ыар санааҕа ылларар.

²⁶Буруйа суоҕу төлөтүү, көнө киһини кырдьыгын иһин сынньыы — барыта сиэргэ баппат түктэри быһыы.

²⁷Билиилээх киһи тылыгар-өһүгэр сэрэхтээх; ким өйдөөх, ол киэҥ көҕүстээх.

²⁸Акаары да, саҥарбатаҕына, муударай курдук көстүөҕэ, айаҕын аппатаҕына, өйдөөх киһи дэтиэҕэ.