Read Библия- Yakut 2021 Аман өһө 19 Bible Online

Аман өһө 19 - Библия- Yakut 2021 bible

Аман өһө 19

¹Акаарытын аанньа буор сымыйаччы баайдааҕар иҥэ-дьаҥа суох дьадаҥы быдан ордук.

²Киһи дууһата билиитэ-көрүүтэ суох иэдэйэр; ким тиэтэйэр, ол бүдүрүйэр.

³Киһи бэйэтин акаарытыгар суолун сүтэрэн баран, АЙЫЫ ТОЙОҤҤО абарар.

⁴Баай-тала атастары хаҥатар, оттон дьадаҥы бэл доҕоруттан матар.

⁵Албын туоһу накаастабылтан куотуо суоҕа, сымыйаны этээччи быыһаныа суоҕа.

⁶Биллиилээх дьоҥҥо үгүстэр бэрт буолаллар, бойом илиилээххэ ким барыта доҕор.

⁷Дьадаҥыттан аймахтара кытта дьалты тутталлар, эгэ доҕотторо тэйбэттэрэ кэлиэ дуо! Эккирэтэ сылдьан кэпсэтэ сатыыр да, кинини ким да сэҥээрбэт[26].

⁸Ким бэйэтигэр үчүгэйи баҕарар, ол муудараска дьулуһар, ким өйдөөн-төйдөөн сылдьар, ол үтүөнү булар.

⁹Албын туоһу накаастабылтан куотуо суоҕа, сымыйаччы өлүөҕэ.

¹⁰Акаары баайдык-талымнык олороро — сүөргү суол, оннооҕор өссө сүөргү — кулут тойотторго бас-көс буолара.

¹¹Үтүө өйдөөх киһи киэҥ көҕүстээх; атаҕастабылы бырастыы гыныы — дьоһуннаах быһыы.

¹²Ыраахтааҕы уордайара хахай хаһыырарыгар тэҥнээх, оттон кини үтүө сыһыана окко түспүт сиик кэриэтэ.

¹³Акаары уол — аҕатын муҥа-таҥа; тыллаах дьахтар — астыбат ардах.

¹⁴Дьиэ-уот, баай-дуол төрөппүттэртэн тиксэр, оттон өйдөөх ойох — АЙЫЫ ТОЙОН бэлэҕэ.

¹⁵Күөх көппө утуйарын таптыыр, көрүнньүк үлэһит аччыктыыр.

¹⁶Кэс тылы тутуһааччы үйэтин моҥуоҕа, оттон суолун-ииһин болҕойбот киһи өлүөҕэ.

¹⁷Дьадаҥыга бэрсиэҥ — АЙЫЫ ТОЙОҤҤО иэстиэҥ: үтүөҕүн Кини толору төлүөҕэ.

¹⁸Эрэл баарын тухары уолгун уостуганныы сырыт, сэрэн, аны оҕоҕун мүччү тутаайаҕын.

¹⁹Бардам киһи буруйга-сэмэҕэ тардылыннын, быыһаан ылыаҥ — батааска биэриэҥ[27].

²⁰Сүбэни-аманы иһит, сэмэни-суҥханы ылын, оччоҕо кэлин бэйэҥ муударай буолуоҥ.

²¹Сүрэх баҕата баһаам да, АЙЫЫ ТОЙОН быһаарбыта эрэ туолуоҕа.

²²Киһи биир бастыҥ өрүтэ — бэриниилээх буолуу[28]; сымыйаччы буолуох кэриэтин быста дьадайбыт ордук.

²³Киһи АЙЫЫ ТОЙОҤҤО ытыктабылынан тыыннаах сылдьар, онон утуйарыгар холкутук утуйар; киниэхэ туох да куһаҕан буолуо суоҕа.

²⁴Сүрэҕэ суох, илиитин астаах иһиккэ уган баран, айаҕар кыайан тиэрпэт.

²⁵Кэрээнэ суоҕу кэһэттэххинэ, кэнэн дьон өйдөнүөҕэ; өйдөөҕү сэмэлээтэххинэ, тута көннөрүнүөҕэ.

²⁶Аҕатыгар илиитин көтөҕөр, ийэтин дьиэтиттэн холдьоҕор киһи аата-суола алдьаныаҕа, сир-буор сирэйдэниэҕэ.

²⁷Уолум, дьонуҥ үөрэтэрин дьалайбатаххына, үтүө сүбэтэ-амата суох дэҥ үктээн биэриэҥ.

²⁸Көлдьүн туоһу көнө дьүүлү холуннарар, куһаҕан киһи буруйу оҥорон дуоһуйар.

²⁹Итэҕэли күлээччи дьүүллэниэҕэ, акаары эмиэ иэнэ аһыйыаҕа.