Read Библия- Yakut 2021 Аман өһө 23 Bible Online

Аман өһө 23 - Библия- Yakut 2021 bible

Аман өһө 23

¹Тойон остуолугар олорустаххына, ким аһылыгар ыҥырыллыбыккын өйдөөн олор;

²аһас буоллаххына, иҥсэҕин кыатана тутун.

³Кини минньигэс аһыгар-үөлүгэр ымсыырыма, ол барыта эйигин тургутар аһылык буолуон сөп.

⁴Баайы-таланы сырсыма, оннук санааҕын букатын хааллар.

⁵Биирдэ көрбүтүҥ, үбүҥ-харчыҥ көстө сүтүө, көтөр кынат оҥостон, кыырт курдук, кыырай халлааҥҥа көтүө.

⁶Ымсыы киһиэхэ аһаама, кини амтаннаах аһылыгар баҕарыма.

⁷Иһигэр эн төһөнү ыйыстыбыккын ааҕа-суоттуу олоруоҕа, кини оннук киһи. «Кытаат, аһаа-сиэ, ис», — диэҕэ эрээри, дьиҥ санаата атын буолуоҕа.

⁸Аһаабыт аһыҥ сыыһын өҕүйэн таһаарыаҕыҥ, үтүө тылгын-өскүн кураанахха барыаҕыҥ.

⁹Акаарыга тугу да этимэ, кини эн өйдөөх тылгын-өскүн хоҥоруутугар да хоҥноруо суоҕа.

¹⁰Сириҥ-уотуҥ былыргы быыһын сыҕарытыма, тулаайахтар сыһыыларын былдьаһыма:

¹¹кинилэр күүстээх Араҥаччылаахтар — АЙЫЫ ТОЙОН, кинилэри көмүскээн, эйигин утары туруоҕа.

¹²Үөрэнэр үөрэххин болҕойон иһит, өйгүн-санааҕын ууран билиигэ-көрүүгэ дьулус.

¹³Уолгун дьарыйартан куттаныма — талаҕынан таһыллыбытыттан өлүө суоҕа.

¹⁴Иэнин чыпчаххайдаан биэрдэххинэ, оҕоҕун өлүүттэн өрүһүйүөҕүҥ.

¹⁵Уолум, эн муударай киһи буоллаххына, мин сүрэҕим төһөлөөх үөрүөҕэй?

¹⁶Эн сиэрдээх тылгын-өскүн иһиттэхпинэ, мин эйигинэн ис сүрэхпиттэн киэн тутта саныаҕым.

¹⁷Аньыылаахтарга баҕарыма; олоҕуҥ тухары АЙЫЫ ТОЙОНУ ытыктаа,

¹⁸оччоҕо кэлэр кэскилиҥ киэҥ, инникигэ эрэлиҥ бигэ буолуоҕа.

¹⁹Уолум, миигин иһит! Муударай буоларга дьулус, сөптөөх үтүө суолу тутус.

²⁰Арыгыһыттардыын алтыһыма, моҕустардыын булсума.

²¹Арыгыһыт, аһас дьон быста дьадайыахтара, утуйары үлэлээччилэр нэк таҥастаныахтара.

²²Аҕаҥ ытык тылын быһа гыныма, кини эйигин төрөппүтэ; ийэҕин, төһө да бүдүгүрэ кырдьыбытын иһин, сэнээмэ.

²³Туохтааҕар да эн дьиҥ кырдьыгы буларга дьулус, муудараһы, үөрэҕи быраҕыма, чэгиэн өйгүн-санааҕын саймаардыма.

²⁴Үтүө киһи аҕата үөрүү үрдүгүн билиэҕэ, муударай киһи төрөппүтэ оҕотунан киэн туттуоҕа.

²⁵Онон төрөппүттэриҥ санааларын көнньүөрт, ийэҕин өрүү үөрдэ-көтүтэ сырыт.

²⁶Уолум эрэ буолларгын, үөрэтэн этэрбин өйдөөн иһит, мин суолбуттан хараххын араарыма — олук үктэһэн ис.

²⁷Содур дьахтар — дириҥ оҥкучах, туора киһи ойоҕо — кыараҕас холуодьас;

²⁸Киһимсэх дьахтар тоһуурга бүгэн олорор ороспуой кэриэтэ; кини аньыыны-буруйу оҥорор эр дьон ахсаанын үксэтэр.

²⁹Ким дьиэтиттэн энэлгэн, ынчык иһиллэрий? Ким иирсэрий-этиһэрий, ким суланарый? Ким туох да төрүөтэ суох сирэйэ-хараҕа көҕөрөн сылдьарый? Ким икки хараҕын кып-кыһылынан дьолточчу көрбүтүй?

³⁰Ити барыта кинилэр, хойукка диэри арыгылыы олорооччулар, минньитиллибит арыгыны батыһан иһээччилэр буолбатах дуо?

³¹Көрүмэ арыгы хайдах кытаран-наҕаран турарын, иһиккэ кутуллан күлүмнүү оонньуурун, куолайгар минньигэс бэйэлээхтик эйэргээн киирэрин!

³²Кэлин кини эйигин эриэн үөннүү тигиэҕэ, моҕой кыыллыы ытырыаҕа;

³³оччоҕо хараххын эрдээх дьахталларга хатыаҕыҥ[31], тосту-туора суолга сананыаҕыҥ.

³⁴Эн киэҥ байҕал үөһүгэр утуйа сытар, хараабыл маастатыгар тахсан сытар киһи курдук буолуоҕуҥ.

³⁵«Миигин охсубуттара да, ыалдьыбатаҕа, — диэҕиҥ[32]: кырбаабыттара да, билбэтэҕим. Утуйан турдум да, Онтон эмиэ утахтанар арыгыбын көрдөнө барыаҕым».