Read Библия- Yakut 2021 Аман өһө 27 Bible Online

Аман өһө 27 - Библия- Yakut 2021 bible

Аман өһө 27

¹Сарсыҥҥы күҥҥүнэн киһиргэнимэ, сарсын эйигин туох күүтэрин эн билбэккин.

²Бэйэҕин хайҕаныма — атыттар хайҕаатыннар, үтүөҕүн кэпсэнимэ — атыттар кэпсээтиннэр.

³Сымара таас ыарахан, кумах эмиэ чэпчэкитэ суох, ол эрээри акаары эрэйдиирэ туохтан да ыарахан.

⁴Уордаах киһи дьулаан, киҥнээх киһи суостаах, ол эрээри күнүүһүт барыларыттан кутталлаах.

⁵Алҕаһаабыты аһаҕастык көннөрөр ордук, саҥарбатаххына, аахайбат дии саныаҕа.

⁶Таптыыр киһи сэмэлиирдиин истиҥ, абааһы көрөөччү ууруурдуун албын.

⁷Тот киһи мүөтү да тэпсэр, оттон аччык аһыыны да минньигэһиргэтэр.

⁸Төрөөбүт сириттэн-уотуттан тэлэһийэн сылдьар киһи уйатын быраҕан барбыт көтөр кэриэтэ.

⁹Үчүгэй сыттаах күндү арыы дууһаҕын дуоһутар, истиҥ доҕоруҥ үтүө сүбэтэ сүрэххин үөрдэр[37].

¹⁰Доҕотторгун, аҕаҥ доҕорун быраҕыма, кыһалҕалаах күҥҥэр аймахтаргар барыма, ыраах баар аймаххынааҕар чугас олорор ыалыҥ эйиэхэ ордук көмөлөһүөҕэ.

¹¹Уолум, муударай киһи буолан сүрэхпин үөрт, оччоҕо миигин атаҕастааччыларга мин хардарар кыахтаныам.

¹²Өйдөөх киһи алдьархай ааҥнаан эрэрин көрдөҕүнэ, саһар, оттон кэнэн иннин хоту баран киирэн биэрэр.

¹³Атын киһи туһугар илии охсустаххына, соҥҥун устуохтара, туора киһи туһугар тылгын биэрдэххинэ, солуок тутуохтара.

¹⁴Тыҥ эрдэ туран ыалын алҕаан уһугуннарааччыны хара сарсыардаттан кыраабыкка холуйуохтара.

¹⁵Тыллаах дьахтар астыбат ардах кэриэтэ — начааскыга да намыраан ылбат.

¹⁶Хайдах гынан кинини тохтотуоҥуй? Эн тыалы-кууһу тохтотор, мас арыытын ытыскар ыбылы тутар кыахтааххын дуо?[38]

¹⁷Тимири тимир сытыылыыр, киһини киһи үөрэтэр.

¹⁸Астаах маһын көрөр-харайар киһи маһын аһыттан амсайыаҕа, тойонун харыстыыр киһи ытыктабылга сылдьыаҕа.

¹⁹Ууга төҥкөйөн, киһи дьүһүнүн көрүнэр, оттон сүрэҕин болҕойон, ис дьиҥин билинэр.

²⁰Анараа дойду кудуга хаһан да туолбатын курдук, киһи хараҕа эмиэ туохха да туолбат.

²¹Үрүҥ көмүһү — тиигэл, кыһыл көмүһү — кыһа, оттон киһини хайҕал тургутар.

²²Акаарыны төһө да кэлиигэ уган бурдугу кытта бииргэ мэлий — акаарыта араҕыа суоҕа.

²³Сүөһүгүн-аскын үчүгэйдик көр, барааннарыҥ үөрүн кыһаллан манаа;

²⁴баай-дуол киһиэхэ куруук баар буола турбат. Бэл ыраахтааҕы хоруоната удьуоруттан удьуоругар бэриллэн испэт.

²⁵Ходуһаҕын оттоон баран, кэнчээрилиэр диэри, аны томтор сиргин оттоо.

²⁶Барааннарыҥ түүтүн таҥас гынан таҥын, козелларгын атыылаан, сирдэ-уотта атыылас.

²⁷Козаҥ үүтэ бэйэҥ иһэргэр, дьиэ кэргэҥҥин, чаҕар дьахталларгын аһатаргар сөрү-сөп тиийиэҕэ.