Read Библия- Yakut 2021 Аман өһө 28 Bible Online

Аман өһө 28 - Библия- Yakut 2021 bible

Аман өһө 28

¹Куһаҕан киһи ким да эккирэппэтэҕин үрдүнэн куотар, оттон үтүө киһи, хахай курдук, киэҥ-холку.

²Араллааннаах дойду былааһа уларыйа-тэлэрийэ турар, оттон сатабыллаах, мындыр баһылык дойдута туругурар.

³Кыра-хара дьону атаҕастыыр баһылык[39] үүммүт бурдугу үлтү сынньар алдьатыылаах ардах кэриэтэ.

⁴Таҥара Сокуонун умнааччылар хара дьайдаахтары арбыыллар, оттон Сокуону тутуһааччылар кинилэри утараллар.

⁵Сидьиҥ кэмэлдьилээхтэр сиэрдээх быһыыны өйдөөбөттөр, оттон АЙЫЫ ТОЙОНУ көрдөөччүлэр барытын өйдүүллэр.

⁶Токур суоллаах-иистээх баай киһитээҕэр иҥэ-дьаҥа суох дьадаҥы быдан ордук.

⁷Сокуону тутуһар уол муударай өйдөөх, оттон көлөөктөрдүүн куодарыһааччы — аҕатын аатын алдьатар.

⁸Бырыһыаҥҥа иэс биэрэн байааччы үбэ-аһа дьадаҥылары аһынар айыы санаалаахха тиксиэҕэ.

⁹Ким Сокуону истиэн баҕарбат, ол үҥэрдиин сидьиҥ.

¹⁰Көнө дьону куһаҕаҥҥа уккуйааччы бэйэтэ хаспыт иинигэр түһүөҕэ, оттон ыраас дууһалаахтар дьоллоохтук олоруохтара.

¹¹Баай киһи муударайбын дэнэр даҕаны, өйдөөх дьадаҥы кинини курдары көрүөҕэ.

¹²Үтүө дьон өрөгөйдөөтөҕүнэ, үөрүү кэмэ үүнэр, оттон куһаҕан киһи былааска таҕыстаҕына, норуот бүгэн биэрэр.

¹³Аньыытын кистэнээччи туох да үчүгэйи көрүө суоҕа, оттон буруйун билинэн көнө суолга үктэнээччи үтүө сыһыаны көрсүөҕэ.

¹⁴АЙЫЫ ТОЙОНУ куруутун ытыктыыр киһи дьоллоох, оттон тыйыс сүрэхтээх иэдээҥҥэ түбэһиэҕэ.

¹⁵Кыраны-хараны баттыыр бардам баһылык уордайбыт хахайтан, торҕоннообут эһэттэн атына суох.

¹⁶Кылгас санаалаах тойон норуотун түһээнинэн кыһарыйар, оттон куорҕаллыыры абааһы көрөөччү өр салайыаҕа.

¹⁷Киһи хаанын тохпут өлөрүөхсүт иинин өҥөйүөр да диэри куота сылдьыаҕа; киниэхэ ким да көмөлөһүө суохтаах[40].

¹⁸Омсото суох олохтооххо куттал суоһуо суоҕа, оттон токур суоллаах соһуччу охтуоҕа.

¹⁹Сирин оҥостооччу дэлэй аһылыктаныаҕа, оттон кураанаҕы сырсааччы аччыктыаҕа.

²⁰Эрэбил киһи байым алгыһы ылыаҕа, оттон баайга-дуолга дьулуһааччы буруйдаммакка хаалыа суоҕа.

²¹Дьону сирэйиттэн көрөн сыһыаннаһар куһаҕан, сирэй көрбөх киһи быһыы килиэп да туһугар аньыыны оҥоруоҕа.

²²Байа охсор дьулҕаннаах ымсыы киһи хаһан эрэ дьадайыам диэн санаан да көрбөт.

²³Ньылаҥныыр киһитээҕэр сэмэлиир киһи кэлин ордук сөбүлэтиэҕэ.

²⁴Ийэлээх аҕатыттан былдьаан ылан баран: «Бу аньыы буолбатах», — диир киһи талабырдьыкка тэҥнээх.

²⁵Иҥсэ мэнэгэй иирээни үөскэтэр, оттон АЙЫЫ ТОЙОҤҤО эрэнээччи эйэ дэмнээхтик олоруоҕа.

²⁶Ким бэйэтин эрэ күүһүгэр эрэнэр, ол өйө суох, оттон муударас суолун тутуһааччы быыһанар.

²⁷Дьадаҥыга бэрсээччи тугунан да тутайыа суоҕа, оттон киэр хайыһааччы үгүс дьонтон кыраныаҕа.

²⁸Нэгэй дьон былааска таҕыстаҕына, ким барыта бүгэн биэрэр; кэлин, кинилэр эһиннэхтэринэ, норуоту көнө киһи салайыаҕа.