Read Библия- Yakut 2021 Аман өһө 3 Bible Online

Аман өһө 3 - Библия- Yakut 2021 bible

Аман өһө 3

¹Уолум! Мин үөрэппит үөрэхпин умнума, кэскиллээх кэс тылбын сүрэххэр сөҥөрөн сырыт.

²Мин үөрэҕим олоҕуҥ күнүн-дьылын үксэтиэ, дьолу-соргуну, эйэни эйиэхэ эбэн биэриэ.

³Бигэ тапталы, кырдьыгы бэйэҕиттэн тэйитимэ: кылдьыы киэргэл курдук моонньугар кэтэ сырыт, сүрэҕиҥ ньууругар сурунан кэбис,

⁴оччоҕо эйиэхэ Таҥараттан уонна бар дьонтон амарах алгыс, үтүө аат-суол тосхойуо.

⁵АЙЫЫ ТОЙОҤҤО ис сүрэххиттэн эрэн — бэйэҥ өйгөр-санааҕар эрэнимэ.

⁶Бары суолгар барытыгар Кинини билэргэ дьулус — Кини эйигин барыахтаах суолгар салайан биэриэҕэ.

⁷Муударайбын диэн сананыма; АЙЫЫ ТОЙОНТОН толун, куһаҕантан дьалты тутун,

⁸оччоҕо этиҥ-хааныҥ үтүөрүө, уҥуоҕуҥ-иҥиэҕиҥ бөҕөргүө.

⁹АЙЫЫ ТОЙОНУ ытыктаан, баайгыттан-дуолгуттан, сириҥ бастыҥ үүнүүтүттэн Киниэхэ өлүүлүү сырыт,

¹⁰оччоҕо ампаарыҥ аһынан-үөлүнэн, бурдугунан ыга туолуоҕа, бинэгирээтиҥ саҥа арыгыта үллэ-балла туруоҕа.

¹¹Уолум, АЙЫЫ ТОЙОН буойарын баардылаабат буолума, сыыһаҕын-халтыгын көннөрдөҕүнэ, хомойума.

¹²Амарах аҕа таптыыр уолун дьарыйарыныы, АЙЫЫ ТОЙОН эмиэ таптыыр киһитин дьарыйар.

¹³Ким муудараһы көрдөөн булан ылбыт, уһуну-киэҥи толкуйдуур тобуллаҕас өйдөммүт, ол дьоллоох.

¹⁴Муударас үрүҥ көмүстээҕэр туһалаах, кыһыл көмүстээҕэр сыаналаах,

¹⁵ханнык да бэйэлээх эриэккэс таастааҕар күндү; эн бу күн сиригэр баҕара саныыргыттан киниэхэ тэҥнэһэр кыахтаах туох да суох.

¹⁶Дириҥ муударас уҥа илиитигэр уһун үйэ баар, хаҥас илиитигэр — баай-тала, албан аат.

¹⁷Кини тутуһар суола-ииһэ үөрүүлээх, кэлэр-барар ыллыга барыта эйэлээх.

¹⁸Муудараһы булан ылбыт дьоҥҥо кини — олох Аал луук маһа; ким кинилиин арахсыспат, ол дьоллоох.

¹⁹АЙЫЫ ТОЙОН дириҥ муудараһынан сири олохтообута, өркөн өйүнэн халлааннары оҥорбута.

²⁰Кини мындыр ыйааҕынан киэҥ далайдар арыллаллар, ир былыттар көй сиигинэн аллаллар.

²¹Уолум! Муудараһы хараҕыҥ далыттан хаһан да таһаарыма. Ыллыктаах өйгүн ыһыктыма, чэгиэн өйгүн-санааҕын саймаардыма.

²²Кинилэринэн эн дууһаҥ тыыннаах сылдьыаҕа, кинилэр эн киһилии сэбэрэҕин кэрэтитиэхтэрэ.

²³Дьэ оччоҕо барар-кэлэр суолуҥ очура-чочура суох буолуоҕа, эн туохтан да ончу бүдүрүйүөҥ суоҕа;

²⁴утуйардыы сыттаххына, куттанары-куойары билиэҥ суоҕа, түүҥҥү түлүк ууҥ минньигэс буолуоҕа;

²⁵уолуйуоҥ суоҕа аан алдьархай соһуччу адаҕыйарыттан, куһаҕан санаалаахтар эйигин өлөрөрдүү куомуннаһалларыттан,

²⁶ол курдук эн АЙЫЫ ТОЙОҤҤО бигэ эрэллээх буолуоҕуҥ; Кини эйигин кэнтиккэ киллэртэриэ суоҕа.

²⁷Кыахтаах эрэ буолларгын, кыһалҕалаахха көмөлөһөргүн кэрэйимэ.

²⁸Ыалыҥ киһиэхэ бэрсэрдээх тураҥҥын: «Кэлин кэлээр, сарсын биэриэм», — диэн кэтэһиннэримэ.

²⁹Эйигин эрэнэн тулаҕар олорор дьоҥҥун-сэргэҕин утары уодаһыннаах суолга сананыма.

³⁰Эйиэхэ куһаҕаны оҥорботох киһини кытары кураанахха бурайсыма.

³¹Батталлаахтар баайдарыгар баҕарыма, кинилэр хайа да суолларынан барыма,

³²тоҕо диэтэххэ, АЙЫЫ ТОЙОН оҕуруктаахтары абааһы көрөр, Кини көнө дьону эрэнэр.

³³Хара дьайдаахтар дьиэлэригэр АЙЫЫ ТОЙОН кырыыһа түһэр, көнө сүрэхтээхтэр дьиэлэригэр Кини алгыһа иҥэр.

³⁴Итэҕэли күлээччилэри Кини бэйэлэрин күлүү гыныаҕа, оттон сытыары майгылаахтарга амарахтык сыһыаннаһыаҕа.

³⁵Муударай өйдөөхтөр албан аатырыахтара, оттон акаарылар саакка-суукка барыахтара.