Read Библия- Yakut 2021 Аман өһө 31 Bible Online

Аман өһө 31 - Библия- Yakut 2021 bible

Аман өһө 31

¹Лемуил ыраахтааҕы ийэтэ уолун үөрэтэн-такайан эппит иэйиилээх тыллара[51]:

²«Кэбис, тоойуом! Кэбис, оҕолоотор оҕом! Кэбис, Айыы Таҥараттан ааттаһан ылбыт уол оҕокком барахсан!

³Күүскүн-сэниэҕин дьахталларга эһимэ — ыраахтааҕылары алдьатааччыларга суолгун-иискин аһыма.

⁴Лемуил, ыраахтааҕы арыгы иһэрэ букатын табыллыбат, ыраахтааҕы арыгыны амсайыа суохтаах, тойон дьон уохтаах утахха умсугуйуо суох тустаах.

⁵Арыгылыыр буоллулар да, сууту-сокуону умнуохтара, кыраны-кыһалҕалааҕы көнө дьүүлтэн матарыахтара.

⁶Ол кэриэтэ уохтаах утаҕы өлөн-сүтэн эрээччигэ, аһыы утаҕы ыар кутурҕаннаахха кутан биэриҥ,

⁷оччоҕо кини аас-туор олоҕун умна түһүөҕэ, эрэйин-муҥун эргитэ саныы барыа суоҕа.

⁸Оттон эн иннин булан этиммэт эрэйдээххэ көмөлөс, бары кыаммат-тиийиммэт кырдьыгын туһугар туруулас;

⁹кинилэр оннуларыгар эн саҥар, кинилэри көнөтүк дьүүллээ, суох-дьадаҥы, эстибит-быстыбыт көҥүлүн көмүскээ».

¹⁰Ким булан ылар кыахтааҕый үтүөкэн дьахтары?[52] Кини күлүмнэс бэйэлээх күн да тааһынааҕар күндү.

¹¹Эрэ киниэхэ ис сүрэҕиттэн эрэнэр, биһи тугунан да тутайыахпыт суоҕа диэн билэр.

¹²Үчүгэй дьахтар эригэр үтүөнэн эрэ төлүүр, үйэлээх сааһыгар киниэхэ үтүөнү эрэ оҥорор.

¹³Бараан түүтүн да, лүөнү да бэрийдин, кини өрүүтүн үрүлүйэн үлэлиир.

¹⁴Хараабыллаах атыыһыттар курдук, хаһаас аһылыгын ыраахтан булунар.

¹⁵Тыҥ хатыыта туран, дьонун аһылыгын бэлэмниир, чаҕар кыргыттарын ис-тас үлэҕэ соруйталыыр.

¹⁶Өҥ сири-уоту була охсон, ону атыылаһан ылар, өлөрбүт харчытыгар бинэгирээт үүннэрэр.

¹⁷Кини хайдахтаах да күүс үлэттэн чаҕыйан турбат, ылыста да, илиитин букатын араарбат.

¹⁸Үлэтэ-хамнаһа тахсыылааҕын билэ сылдьан, түүнүн хойукка да диэри уотун умулуннарбат;

¹⁹Таҥас өрөр сабын бэйэтэ хатынар, дьарыгын кыратык да тохтото түһэн ылбат;

²⁰дьадаҥыга дьэллэмник бэрсэр, умнаһыкка улгумнук уунар.

²¹Хаар түһэриттэн кини дьиэлээхтэрэ куттамматтар — бука бары халыҥ таҥастаахтар.

²²Бу үтүөкэн ийэ орон сабыыта тигэр, бэйэтэ эмиэ күндү лүөн, түү таҥаһы таҥнар.

²³Аҕалара, куорат биир биллэр-көстөр киһитэ, дойдутун бас-көс дьонун кытта сэргэстэһэ олорор.

²⁴Дьиэлээх хотун лүөн таҥаһы тигэн атыылыыр, кур эгэлгэтин оҥорон, атыыһыттарга туттартыыр.

²⁵Майгылаах бастыҥа, санаалаах күүстээҕэ, кини кэнэҕэс кэми үөрүүлээхтик кэтэһэр.

²⁶Кэпсэттэҕинэ, өйдөөҕү эрэ этэр, сүбэлээтэҕинэ, көрсүөтүк үөрэтэр.

²⁷Дьиэтин-уотун кыһамньылаахтык көрөр-истэр, дьүккүөрдээх үлэтинэн айаҕын иитинэр.

²⁸Оҕолоро туран бары ийэлэрин хайгыыллар, эрэ эмиэ кининэн киэн туттар:

²⁹«Үчүгэй дьахтар өрүү элбэҕэ эрээри, эн кинилэри бука барыларын куоһардыҥ».

³⁰Киһи ис киирбэҕэ билбэт, кэрэ дьүһүн эмиэ кэхтиэхтээх, ол эрээри АЙЫЫ ТОЙОНУ ытыктыыр дьахтар хайҕал ылара сиэрдээх.

³¹Онон үлэтин-хамнаһын түмүгүттэн киниэхэ өлгөмнүк биэриҥ, оҥорбут үтүөтүн-өҥөтүн бар дьоҥҥо иһитиннэриҥ!