Read Библия- Yakut 2021 Аман өһө 4 Bible Online

Аман өһө 4 - Библия- Yakut 2021 bible

Аман өһө 4

¹Истиҥ, оҕолоруом, аҕаҕыт такайан этэрин, болҕойон истэҥҥит өйгүтүн үксэтиҥ.

²Мин эһиэхэ үтүөнү эрэ үөрэтэбин, онон кэскиллээх кэс тылбын сиргэ-буорга тэпсимэҥ.

³Хаһан эрэ мин да аҕа курдук аҕалаах уолчаан этим, мин эмиэ, ийэ соҕотох оҕото, төрөппүт иһирэх тапталын билбитим.

⁴Аҕам миигин үөрэтэн этэр буолара: «Сүбэлээн этэрбин сүрэххэр-быаргар сөҥөрөн ис, кэриэс-хомуруос тылбынан олоххун оҥкуллан.

⁵Муудараска үөрэн, билиигэ-көрүүгэ дьулус, эйиэхэ эппиппин умнума — барытын тутус.

⁶Муудараһы хаалларыма — кини эйигин араҥаччылыы сылдьыаҕа, кинини таптаа, оччоҕо эйигин харыстыаҕа.

⁷Туохтааҕар да дириҥ өй суолталаах, онон муудараска үөрэн, төһөлөөх да үлүскэн үптээҕэр үтүө өйү күндүргэт.

⁸Муудараһы үрдүктүк тут — кини эйигин өрө таһаарыаҕа, кинилиин тутуспутунан сырыт, оччоҕо эйигин албан аатырдыаҕа;

⁹үтүөкэннээх бөнүөгү төбөҕөр кэтэрдиэҕэ, килбиэннээх мэнньиэһи эйиэхэ бэлэхтиэҕэ».

¹⁰Иһит эрэ, тоойуом! Мин үөрэтэрбин ылыннаххына, олоҕуҥ күнэ-дьыла эбиллэн биэриэҕэ.

¹¹Мин эйиэхэ муударас ыллыгын ыйабын, көнө суолунан эйигин сирдиибин.

¹²Бу суолунан бардаххына, хардыыҥ хаһан да кыарыа суоҕа, сүүрдэххинэ да, сүһүөххүн сүтэриэҥ суоҕа.

¹³Эйиэхэ үөрэтэн этэрбин кытаанахтык өйдөөн кэбис, тугу да умнума, барытын бигэтик тутуһа сырыт: мин тылым эйиэхэ олоххун оҥкуллуо.

¹⁴Кэдэрги кэмэлдьилээхтэр кэптэрин кэтимэ, хара дьайдаахтар ыллыктарын батыма,

¹⁵сылдьар ыырдарыттан туораан таҕыс, ол суолу тутуһума, атын сиринэн эргийэн бар, кый ырааҕынан тумнан аас.

¹⁶Кинилэр куһаҕаны оҥорботохторуна утуйуохтара суоҕа, киһини бүдүрүппэтэхтэринэ уулара көтүөҕэ.

¹⁷Кэдэрги кэмэлдьилээхтэр мэҥиэстэр килиэптэрэ — кэрээнэ суох кэбилэнии, утахтанар арыгылара — бардамнык быһыыланыы.

¹⁸Оттон үтүө дьон суола-ииһэ сарсыардааҥҥы сарыал кэриэтэ, күн халлаан оройугар тэмтэйэ ойуор диэри улам сырдаан иһэр.

¹⁹Хара дьайдаахтар суоллара им балай хараҥа, ханна тиийэн бүдүрүйүөхтэрин бэйэлэрэ да билбэттэр.

²⁰Уолум, мин тылбын болҕойон иһит, өйдөтөн этэрбин долоҕойгор хатаан кэбис.

²¹Бу үөрэхтэн хараххын хаһан да араарыма: сүрэххэр-быаргар сөҥөрөн өйдүү-саныы сырыт.

²²Ким бу этиллибити тутуһар, ол уһун үйэлэниэҕэ, бүтүн бэйэтэ чэбдигириэҕэ.

²³Ханнык да күндү кылааттааҕар сүрэххин харыстаа, олоҕуҥ дьүүктэтэ сүрэххиттэн сүүрдэр эбээт.

²⁴Сымыйаны саҥарартан аккаастан, албын-көлдьүн тылы киэр кыйдаа.

²⁵Инниҥ диэки көнөтүк көр — сири-буору кымыстаама.

²⁶Үтүө аартыгы тобул, тутуһар суолуҥ барыта бигэ буоллун.

²⁷Уҥа-хаҥас халбаҥнаама, куһаҕантан дьалты хаамп.