Read Библия- Yakut 2021 Аман өһө 6 Bible Online

Аман өһө 6 - Библия- Yakut 2021 bible

Аман өһө 6

¹Уолум! Өскөтүн эн кими эрэ мэктиэлээн тылгын биэрбит, туора киһи туһугар илии охсуспут буоллаххына,

²ол аата тылгыттан ылларбыккын, баскын быһа этиммиккин —

³киһи илиитин иһигэр киирэн биэрбиккин. Дьэ оччотугар, тоойуом, тугу да гын, өрүһүнэри эрэ толкуйдаа, кытаат, ол киһигин, тиийэн, арахпакка ааттаа;

⁴утуйар уугун ончу умун, көрбүт хараххын симимэ,

⁵булчуттан куотар табалыы, доҕууртан төлө көтөр чыычаахтыы, быыһанарга эрэ дьулус.

⁶Кымырдаҕаһы баран көр, сүрэҕэ суох, киниттэн муудараска үөрэн:

⁷ким да киниттэн ирдээбэтин, ким да кинини кэтээбэтин, сирдээбэтин үрдүнэн,

⁸кыстыыр бурдугун сайыҥҥыттан хаһаанар, аһыыр аһылыгын сыһыыттан таһынар.

⁹Оттон эн, күөх көппө, төһө өр күөлэһийэ сытаҕын, төһө өр бу курдук уһуктубат буолаҕын?

¹⁰Өссө быыкаатык кум гына түһүөҥ, нуурайан-нухарыйан ылыаҥ, быар куустан олорбохтуоҥ да,

¹¹быстарар муҥуҥ-таҥыҥ, хаамаайы курдук, бу тиийэн кэлиэҕэ, хаһаамматах кыһалҕаҥ, халабырдьыт курдук, кыһарыйбытынан барыаҕа.

¹²Хара санаалаах нэгэй киһи албыныгар-куулдьаҕатыгар үктэтээри, киирэр-тахсар:

¹³хараҕынан имнэнэр, атахха тэбэн ылар, тарбаҕынан кистээн бэлиэ биэрэр;

¹⁴уодаһыннаах суолу торумнуур, куруутун куһаҕаны оҥорору толкуйдуур, өһү-сааһы күөдьүтэр.

¹⁵Дьэ ол сэтигэр кини иэдээҥҥэ түбэһиэҕэ, өрүһүммэттии, эмискэ бүдүрүйүөҕэ.

¹⁶АЙЫЫ ТОЙОН алта суолу абааһы көрөр, сэттис суол эмиэ Киниэхэ сидьиҥ:

¹⁷ол сиэрэ суох үрдүктүк туттуу, сымыйаны саҥарыы, буруйа суох дьон тыыныгар туруу,

¹⁸хара дьайдаах суолга сананыы, сиэхситтии быһыыланарга тиэтэйии,

¹⁹суукка сымыйанан туоһулааһын, итиэннэ ини-биилэри иирсиһиннэрии.

²⁰Уолум! Аҕаҥ ытык тылын быһа гыныма, ийэҥ үөрэтэн эппитин сиргэ-буорга кэбиһимэ —

²¹дьонуҥ сүбэтин-аматын сүрэххэр-быаргар иҥэринэн ис, көмүс кылдьыы курдук, моонньугар кэтэн кэбис.

²²Ханна да барбытыҥ иһин, эйигин ийэлээх аҕаҥ үөрэҕэ сирдиэҕэ; утуйаары сыттаххына, тула өттүгүттэн араҥаччылыаҕа, уугуттан уһугуннаххына, сүбэлээн-амалаан көрсүөҕэ.

²³Төрөппүттэриҥ кэс тыла барар суолгун сырдатыа, үөрэппит үөрэхтэрэ үтүө өйгүн сайыннарыа, оттон тыйыс-дьиппиэн ыйыылара олоххо суолгун булларыа.

²⁴Дьонуҥ сүбэтэ-амата эйигин хара саҥнаах дьахтартан, туора киһи ойоҕун ньуолбар тылыттан харыстыаҕа.

²⁵Эрдээх дьахтар кэрэ дьүһүнүгэр баҕарыма, көрөн-истэн тылбыҥнаатаҕына, киниэхэ киирэн биэримэ.

²⁶Дьэгээрбэ сыаната — биир быһыы килиэп харчыта, оттон туора киһи ойоҕо бүтүн олоххун эрэйиэҕэ.

²⁷Хоонньугар уоту уктан бараҥҥын, таҥаскын-сапкын кэриэрдиэҥ суоҕа дуо?

²⁸Уоттаах чоҕунан хаама сылдьаҥҥын, атаххын уокка сиэтиэҥ суоҕа дуо?

²⁹Атын киһи ойоҕунуун көссүүлэстэххинэ, эмиэ оннук буолуоҕа: ким кинини таарыйбыт, ол накаастабылтан куотуо суоҕа.

³⁰Ааһан-туоран, хоргуйан өлбөт туһугар уорбут уоруйаҕы даҕаны аһына-харыһыйа барыахтара суоҕа:

³¹тутталлар эрэ, сэттэ бүк иэстиэхтэрэ, баарын барытын былдьаан ылыахтара.

³²Оттон дьахтардыын көссүүлэһээччи өйө суох — оннук быһыыланан, өлөрүн оҥостунар.

³³Хаһан эрэ кулугур кулгаахтанан аата-суола алдьаныа турдаҕа, ол саата-суута саллар сааһыгар ааһыа суоҕа.

³⁴Эр киһи, ойоҕор күнүүлээн ииримтийэ кыыһырдаҕына, өһүн-сааһын ситиһэр күнүгэр кими да харыстыа суоҕа,

³⁵хайдахтаах да манньаттан кыккыраччы аккаастаныаҕа, төһө да элбэҕи киниэхэ биэрэ сатаа — эн кини сүрэҕин сымнатыаҥ суоҕа.