Read Библия- Yakut 2021 Аман өһө 7 Bible Online

Аман өһө 7 - Библия- Yakut 2021 bible

Аман өһө 7

¹Уолум, мин эппиппин тутус, кэскиллээх кэс тылбын ытыктаа.

²Кэриэс-хомуруос тылбынан олоххун оҥкуллан, үөрэтэр үөрэхпин, хараҕыҥ харатыныы, харыстаа,

³биһилэх курдук, тарбаххар кэтэ сырыт, сүрэҕиҥ ньууругар сурунан кэбис;

⁴Дириҥ муудараска: «Эн миэхэ эдьиийим буолаҕын!» — диэн эт, олохтоох толкуйу чугас убайгынан ааттаа,

⁵оччоҕо эн туора киһи ойоҕуттан, эрдээх дьахтар эйэҕэс тылыттан көмүскэллээх буолуоҕуҥ.

⁶Биирдэ мин олорор дьиэм түннүгүнэн өҥөйөн эрэһиэҥкэ быыһынан бүдүйэн көрдөхпүнэ,

⁷арай биир эдэркээн уолан, уһуну-киэҥи санаабат төбөт, уулуссаҕа тоҕуоруспут улдьаа уолаттар, оҕо дьон быыстарынан ааһан,

⁸чэпчэки дьахтар олорор уулуссатыгар туораабыта, чопчу кини дьиэтин быспыта.

⁹Күн киирэн боруҥуй түһэн эрэрэ, им балай хараҥа түүн иэһийэн иһэрэ.

¹⁰Онтон көрбүтүм, арай дьахтар уолга утары тахсан кэлбитэ; ол эр дьону угуйардыы таҥныбыт, уодаһыннаах санаалаах,

¹¹айдааннаах-куйдааннаах, баламат быһыылаах-майгылаах, дьиэтигэр-уотугар түптээн-таптаан олорбот,

¹²арыт уулуссаҕа, арыт болуоссакка баран турар, муннук-муннук ахсын эр дьону манаһар сэлээрчэх,

¹³уолу харбаан ылаат, кинини уураан барбыта уонна ымыттан да көрбөккө эппитэ:

¹⁴«Мин сиэртибэ биэрээри, сүөһү өлөрдүм, мэктиэ тылбын бүгүн дьэ толордум.

¹⁵Ол иһин бу эйиэхэ утары таҕыстым, хата көрдөөн-көрдөөн, эйигин булан ыллым.

¹⁶Доҕоччуок, мин утуйар ороммун мааны сабыынан, Египет дьэрэкээн өҥнөөх таҥаһынан, саппытым,

¹⁷сытар тэллэхпэр минньигэс сыттаах мирра, алоэ уонна киннамон ыспытым.

¹⁸Чэ, киириэх, сарсыардааҥҥа диэри таптаһыах, астына-дуоһуйа таҕылбытын тарҕатыах.

¹⁹Эрим билигин дьиэтигэр суох, ыраах айаҥҥа аттаммыта.

²⁰Көмүстээх көһүлүөгүн уктан барбыта, ый эргэтэ биирдэ эргиллиэҕэ».

²¹Ити курдук аҕыластаан, албын тылынан абылаабыта, эҥинэ бэйэлээх эйэҕэс тылынан эрийбитэ.

²²Сонно уол кинини батыһан барбыта; буойунаҕа илдьиллэр оҕустуу, айаҕа табыллар табалыы[4],

²³сүрэхпин ох дьөлө көтүө эрэ диэбэккэ, көтөр курдук, туһахха иҥниэм диэн сэрэйэн да көрбөккө, өлөр өлүү айаҕар киирэн биэрбитэ.

²⁴Дьэ онон, уолаттарыам, мин этэрбин истиҥ, аҕаҕыт тылын бигэтик өйдөөн кэбиһиҥ:

²⁵чэпчэки дьахтарга сүрэххитин сүүйтэримэҥ, кини содурдуур суолунан муна-тэнэ сүүрүмэҥ.

²⁶Үксэ-дьүүлэ биллибэт эр бэртэрин кини сиэбитэ, аата-ахса биллибэт көй дьону суорума суоллаабыта.

²⁷Содур дьахтар дьиэтэ-уота — анараа дойду аартыга, өлүү уораҕайын булларар амырыын суол айаҕа.