Read Библия- Yakut 2021 Аман өһө 9 Bible Online

Аман өһө 9 - Библия- Yakut 2021 bible

Аман өһө 9

¹Дириҥ муударас дьиэ туттубута, дьиэтин сэттэ суоруу баҕаналаабыта;

²дьэ ол кэннэ, этин, минньигэс арыгытын бэлэмнээн, малааһын аһын-үөлүн тардыбыта;

³чаҕар кыргыттарын ыыталаан, ким барыта истэрин курдук, куорат дьогдьойор саалыттан:

⁴«Кэнэннэр миэхэ кэллиннэр!» — диэн биллэртэрбитэ; уһуну-киэҥи толкуйдаабат тутах өйдөөхтөргө эппитэ:

⁵«Кэлиҥ, мин астаабыт аспын аһааҥ, мин бэлэмнээбит минньигэс арыгыбын иһиҥ.

⁶Уонна аны акаарытык быһыыланымаҥ[6], оттомноохтук олоруҥ, үтүө өй суолун-ииһин тутуһуҥ.

⁷Кэрээнэ суоҕу көннөрдөххүнэ, үөҕүллүөҥ, нэгэйи сэмэлээтэххинэ, сиргэ-буорга тэпсиллиэҥ.

⁸Кэрээнэ суоҕу сэмэлээмэ, кини эйигин абааһы көрүөҕэ, эн муударай киһини көннөр, кини эйигин таптыаҕа.

⁹Муударайга сүбэлээ, оччоҕо ордук муударай буолуоҕа, көнө киһини үөрэт, оччоҕо өйө-мэйиитэ өссө тобуллуоҕа.

¹⁰АЙЫЫ ТОЙОҤҤО ытыктабыл — билии-көрүү төрдө. Сибэтиэй Таҥараны билэр киһи үтүө өйдөөх.

¹¹Ким муудараһы ылынар, ол уһун үйэлэниэҕэ, олоҕун күнүн-дьылын үксэтэн биэриэҕэ.

¹²Муударай өйдөннөххүнэ, эн бэйэҥ абыраныаҥ, баламат буоллаххына, эмиэ бэйэҥ алдьаныаҥ».

¹³Акаары быһыы — баламат дьахтар, айдааннаах-куйдааннаах, кэрээниттэн тахсыбыт ньүдьү-балай[7] —

¹⁴ким барыта көрөрүгэр дьиэтин айаҕар тахсан туран, биитэр куорат килбэйэр киинигэр үрдүк олбоххо олорон эрэ,

¹⁵ааһан иһээччилэри хаһыытыыр, баран иһэр көнө суолларыттан туората сатыыр,

¹⁶«Кэнэннэр миэхэ кэллиннэр!» — диэн ыҥырар; уһуну-киэҥи толкуйдаабат тутах өйдөөҕү уккуйар:

¹⁷«Уоран иһиллэр уу ордук минньигэс, кистээн сиэниллэр килиэп быдан амтаннаах».

¹⁸Бу дьахтар дьиэтигэр киирбит дьон өлөллөрүн, кини ыалдьыттара үтүгэн түгэҕэр түһэллэрин, кэр дьэбэр киһи сэрэйэн да көрбөт.