Read Библия- Yakut 2021 Матфей 27 Bible Online

Матфей 27 - Библия- Yakut 2021 bible

Матфей 27

¹Сарсыарда эрдэ архиерейдар норуот аҕа баһылыктарын кытта бары бииргэ мустаннар, Иисуһу өлөрөргө уурар туһунан сүбэ мунньах оҥорбуттара.

²Кинини кэлгийэн баран Рим анаабыт баһылыгар, Понтий Пилакка[66], илдьэн туттарбыттара.

³Таҥнарыахсыт Иуда Иисуһу өлөрөргө уурбуттарын билэн баран, кэмсинэн отут үрүҥ көмүс манньыатын архиерейдарга уонна аҕа баһылыктарга төттөрү илдьэн биэрбитэ.

⁴«Буруйа суох Киһини атыылаан аньыыны оҥоһуннум», — диэбитэ кини. «Онно биһиги туохпут кыһалҕатай? Бэйэҥ кыһалҕаҥ буоллаҕа», — дэспиттэрэ анарааҥҥылар.

⁵Иуда үрүҥ көмүс манньыаттарын Таҥара Дьиэтин муостатыгар тоҕо ыһаат, баран моҥнон өлбүтэ.

⁶Архиерейдар харчыны хомуйан ылан баран: «Бу киһи хаанын төлөбүрэ, онон маны Таҥара Дьиэтин хааһынатыгар угар табыллыбат», — диэн быһаарбыттара.

⁷Сүбэлэһэн баран, кэлии дьону көмөөрү, бу харчыга туойунан күөс охсооччу сирин атыылаһан ылбыттара;

⁸ол иһин бу сир күн бүгүҥҥэ диэри «Хааннаах Хонуу» диэн ааттанар.

⁹Онон Иеремия пророк өтө көрөн эппитэ туолбута: «Отут үрүҥ көмүс манньыаты — бу Кини сыаната диэн Израиль норуота быспыт сыаналарын — ыланнар,

¹⁰Айыы Тойон миэхэ эппитин курдук, күөс охсооччу сирин атыыласпыттара».

¹¹Иисус аны баһылык иннигэр турбута. «Иудей ыраахтааҕыта Эн дуо?» — баһылык Киниттэн ыйыппыта. «Эн итинник этэҕин», — диэн хоруйдаабыта Иисус.

¹²Архиерейдар уонна аҕа баһылыктар буруйдааһыннарыгар Кини туох да диэн саҥарбатаҕа.

¹³«Эйигин итинник элбэххэ буруйдуулларын Эн истибэккин дуо?» — диэбитэ Пилат Киниэхэ.

¹⁴Пилат улаханнык дьиктиргиэн иһин, Иисус биир да ыйытыыга хоруйдаабатаҕа.

¹⁵Бырааһынньыкка баһылык биир хаайыылааҕы, норуот талбыт киһитин, босхолуур үгэстээҕэ.

¹⁶Ол саҕана хаайыыга Варавва[67] диэн киэҥник биллибит хаайыылаах сыппыта.

¹⁷Дьон мустубутугар, Пилат ыйыппыта: «Кими босхолотуоххутун баҕараҕытый: Варавваны дуу, Христос диэн ааттаах Иисуһу дуу?»

¹⁸Иисуһу ордугурҕуур санааттан туттарбыттарын Пилат билэр этэ.

¹⁹Дьүүллүүр үрдүк кириэһилэтигэр олордоҕуна, ойоҕо киниэхэ киһи ыытан: «Ол Кырдьыксыт Киһиэхэ туох да куһаҕаны оҥорума. Бөлүүн түһээн Кини туһуттан эрэй-буруй бөҕөтүн көрдүм», — диэн илдьиттээбитэ.

²⁰Ол эрээри архиерейдар уонна аҕа баһылыктар норуоту кигэн Варавваны босхолотторор, оттон Иисуһу өлөртөрөр курдук көрдөһүннэрбиттэрэ.

²¹Баһылык кинилэртэн хат ыйыппыта: «Бу икки киһиттэн хайатын босхолотуоххутун баҕараҕыт?» «Варавваны!» — дэспиттэрэ.

²²«Оччоҕо Христос диэн ааттаах Иисуһу хайыыбыный?» — Пилат ыйыппыта. «Кириэскэ тиир — Кинини!» — диэн хаһыытаспыттара бука бары.

²³«Кини туох куһаҕаны оҥорбутай?» — Пилат ыйыппыта. «Кириэскэ тиир — Кинини!» — өссө күүскэ үөгүлэспиттэрэ.

²⁴Пилат туох да туһалаабатын, аймалҕан өссө күүһүрэн иһэрин көрөн, уу аҕалтаран, норуот көрөн турдаҕына, илиитин сууммута: «Бу Кырдьыксыт Киһи хааныгар[68] мин буруйум суох. Эһиги эппиэттиэххит!»

²⁵Норуот киниэхэ: «Буруйа биһиэхэ итиэннэ биһиги оҕолорбутугар түстүн!» — диэн хардарбыта.

²⁶Онуоха Пилат Варавваны босхолообута, оттон Иисуһу кымньыынан таһыйтаран баран[69] кириэскэ тиирдэрэ биэрбитэ.

²⁷Баһылык буойуннара Иисуһу дыбарыас тиэргэнигэр хаһаарымаҕа илдьэн, тула бүтүн этэрээти муспуттара.

²⁸Таҥаһын устан баран, санныгар кыһыл сону[70] саба бырахпыттара;

²⁹төбөтүгэр хатыылаах ыарҕаттан өрүллүбүт бөнүөк кэтэрдибиттэрэ, уҥа илиитигэр торуоска туттарбыттара, ол кэннэ иннигэр сөһүргэстээн туран: «Иудей Ыраахтааҕыта туругурдун!» — диэн күлүү-элэк оҥостон эҕэрдэлээбиттэрэ.

³⁰Итиэннэ Киниэхэ силлээбиттэрэ-хаахтаабыттара, торуосканы ылан, төбөҕө охсуолаабыттара.

³¹Дуоһуйа күлүү-элэк оҥостон баран, кыһыл сонун устан Бэйэтин таҥаһын таҥыннарбыттара уонна өлөрө илдьибиттэрэ.

³²Куораттан тахсан иһэн, аара Симон диэн Киринеяттан төрүттээх киһини көрсүбүттэрэ. Киниэхэ күһэйэн туран Иисус кириэһин сүктэрбиттэрэ.

³³Голгофа, ол аата «Бас уҥуоҕа» диэн ааттаах сиргэ кэлэн,

³⁴үөстээх арыгыны иһэрдэ биэрбиттэрин Иисус амсайан көрөн баран, иһиэн баҕарбатаҕа.

³⁵Кинини кириэскэ тиирэн баран, сэрэбиэй быраҕан, таҥаһын үллэстибиттэрэ,

³⁶уонна аттыгар манаан олорбуттара.

³⁷Төбөтүн үрдүнэн буруйун көрдөрөр «Бу Иисус, иудей Ыраахтааҕыта» диэн суруктаах хаптаһыны саайбыттара.

³⁸Иисуһу кытта бииргэ өссө икки ороспуойу тиирбиттэрэ: биирин Кини уҥа өттүгэр, атынын хаҥас өттүгэр.

³⁹Ааһан иһээччилэр, төбөлөрүн кэҕиҥнэтэ-кэҕиҥнэтэ:

⁴⁰«Ээй, Таҥара Дьиэтин урусхаллаан баран үс күнүнэн тутааччы! Таҥара Уола буоллаххына, Бэйэҕин быыһан, кириэскиттэн түс!» — диэн үөҕэн ааһаллара.

⁴¹Архиерейдар сокуонньуттардыын уонна аҕа баһылыктардыын эмиэ күлүү гыммыттара:

⁴²«Атыттары быыһыыра, оттон Бэйэтин быыһанар кыаҕа суох! Израиль Ыраахтааҕыта эбит буоллаҕына, сибилигин кириэстэн түстүн, оччоҕо биһиги Кинини итэҕэйиэхпит.

⁴³Эрэнэрэ бэрдэ дии, Таҥара Кинини сөбүлүүр буоллаҕына, билигин эрэйтэн быыһаатын ээ. Таҥара Уолабын дэнэр этэ буолбаат!»

⁴⁴Аттыгар тиириллэн турар ороспуойдар эмиэ Кинини үөхпүттэрэ.

⁴⁵Алта чаастан тоҕус чааска диэри[71] сир үрдүгэр ыас хараҥа бүрүүкээн турбута.

⁴⁶Тоҕус чаас саҕана Иисус улаханнык хаһыытаабыта: «Или, Или! Лама савахфани?» (Ол аата, тылбаастаатахха: «Таҥарам! Таҥарам! Тоҕо Эн Миигин хааллардыҥ?» — диэн.)

⁴⁷Аттыгар турбут дьонтон сороҕо ону истэн: «Илияны ыҥырар», — дэспиттэрэ.

⁴⁸Сонно биирдэстэрэ сүүрэн тиийэн гуупкаҕа уксууһу оборторбута уонна тайахха иилэн баран, иһэрдээри, Кини уоһугар даҕайбыта.

⁴⁹Оттон атыттара эппиттэрэ: «Бэйи тохтоо эрэ, Илия Кинини быыһыы кэлэр эбит дуу, суох дуу, көрүөххэ».

⁵⁰Иисус өссө төгүл улаханнык хаһыытаат, тыына быстыбыта.

⁵¹Дьэ онуоха Таҥара Дьиэтин иһинээҕи быыһа үөһэттэн алларааҥҥа диэри икки аҥыы хайа барбыта; сир хамсаан дьигиһийбитэ, очуос таастар хабырыттыбыттара,

⁵²хоруоптар аһыллыбыттара, сибэтиэйдэртэн элбэх киһи тиллэн, хоруоптарыттан тахсыбыттара.

⁵³Кэлин, Иисус тиллибитигэр кинилэр сибэтиэй куоракка киирбиттэрин элбэх дьон көрбүттэрэ.

⁵⁴Сир хамсааһынын онно туох буолбутун барытын көрөн турбут сотник итиэннэ кинини кытта бииргэ Иисуһу манаабыт харабыллар: «Кини чахчы Таҥара Уола эбит!» — диэн улаханнык куттаммыттара.

⁵⁵Иисуһу Галилеяттан ыла батыһан кэлбит, Киниэхэ сулууспалаабыт үгүс дьахталлар ыраахтан итини барытын көрөн тураллара.

⁵⁶Олор ортолоругар Мария Магдалина, Иаковтаах Иосия ийэлэрэ Мария уонна Зеведей уолаттарын ийэлэрэ бааллара.

⁵⁷Киэһэрбитигэр Аримафеяттан төрүттээх Иосиф диэн баай киһи, эмиэ Иисус үөрэнээччитэ, тиийэн кэлбитэ.

⁵⁸Кини Пилакка кэлэн Иисуһу көрдөөбүтэ. Пилат биэрэллэригэр дьаһайбыта.

⁵⁹Иосиф тиийэн Иисуһу ылан ыраас таҥаска суулаабыта уонна

⁶⁰очуоска хаһан оҥоһуллубут бэйэтин саҥа хоруобугар илдьэн сытыарбыта; барарыгар аанын улахан тааһынан бүөлээбитэ.

⁶¹Оттон Мария Магдалина уонна атын Мария хаспах иннигэр олорон хаалбыттара.

⁶²Сарсыныгар Бэлэмнэнии күнүн[72] кэнниттэн, архиерейдар уонна сокуонньуттар мустаннар, Пилакка кэлбиттэрэ:

⁶³«Тойоммут! Биһиги били албынньыт тыыннаах сылдьан „Үс күн буолан баран тиллиэҕим“ диэн эппитин өйдөөн кэллибит.

⁶⁴Аны үөрэнээччилэрэ түүн кэлэн уоран ылан баран, норуокка тилиннэ диэн кэпсиэхтэрин сөп, онон бу үс хонук туолуор диэри, хоруобу манатарга бирикээстээ. Кэнники албына бастакытынааҕар өссө куһаҕан буолуоҕа».

⁶⁵Пилат эппитэ: «Эһиги бэйэҕит харабыллааххыт, онон хайдах билэргитинэн баран харабыллааҥ».

⁶⁶Кинилэр тиийэннэр, хаспах аан тааһын хам бэчээттээн баран аттыгар манабыл туруорбуттара.