Read Библия- Yakut 2021 Лука 1 Bible Online

Лука 1 - Библия- Yakut 2021 bible

Лука 1

¹Үгүстэр биһиэхэ буолбут түбэлтэлэри хайыы-үйэ сэһэргээн суруйар буолбуттарыттан,

²ону хара маҥнайгыттан көрбүт-истибит, Тыл туһугар сулууспалаабыт дьон биһиэхэ тиэрдибиттэрин

³барытын төрдүттэн ырытан-чинчийэн көрөн бараммын, ытыктабыллаах Феофил, мин эмиэ барытын эйиэхэ саас-сааһынан суруйан биэрэргэ быһаарынным.

⁴Бу урут истэн үөрэммит үөрэҕиҥ бигэ төрдүн билэргэр эйиэхэ көмөлөөх буолуоҕа.

⁵Ирод Иудея ыраахтааҕыта буолан олордоҕуна, Авия бөлөҕөр[1] Захария диэн ааттаах аҕабыыт баара; кини кэргэнэ Аарон аҕатын ууһуттан төрүттээҕэ, аата Елисавета диэн этэ.

⁶Иккиэн Айыы Тойон кэриэстэрин, ыйыыларын-кэрдиилэрин — барытын эҥкилэ суох толорор буолан, Таҥара иннигэр көнө дьон этилэр.

⁷Елисавета кыайан оҕоломмот буолан, оҕолоро суоҕа, саастара буоллаҕына быданнаабыта.

⁸Биирдэ Захария, бөлөҕүн ирээтэ кэлэн, Таҥара иннигэр сулууспалыы сылдьыбыта.

⁹Аҕабыыттар үгэстэринэн сэрэбиэй бырахпыттарыгар фимиам уматыыта киниэхэ түбэспитэ. Захария Айыы Тойон Дьиэтигэр киирбитэ,

¹⁰оттон дьон, кини фимиам уматар кэмигэр таска туран үҥпүтэ.

¹¹Арай Захария көрдөҕүнэ: үчүгэй сыттаах сиэртибэни уматар остуол уҥа өттүгэр Айыы Тойон Аанньала турара.

¹²Захария кинини көрөн өмүттэн хаалбыта, улаханнык куттаммыта.

¹³Аанньал киниэхэ эппитэ: «Куттаныма, Захария, эн үҥэриҥ Таҥараҕа тиийдэ. Кэргэниҥ Елисавета эйиэхэ уол оҕону төрөтүөҕэ, эн оҕоҕун Иоанн диэн ааттыаҥ.

¹⁴Эйиэхэ улуу үөрүү кэмэ үүнүөҕэ, үгүстэр кини төрөөбүтүттэн үөрүөхтэрэ.

¹⁵Кини Айыы Тойон иннигэр улуу киһи буола үүнэн тахсыаҕа; ханнык да арыгыны, итирдэр утаҕы иһиэ суоҕа, ийэтин иһиттэн тахсаат да, Сибэтиэй Тыынынан туолуоҕа;

¹⁶Израиль уолаттарын үгүстэрин Айыы Тойон Таҥараларыгар эргилиннэриэҕэ;

¹⁷аҕалары оҕолорун кытта эйэлэһиннэрэн, бас бэриммэттэри кырдьык суолугар төнүннэрэн, норуоту Айыы Тойон кэлэригэр бэлэмнээри, Илия курдук тыыннанан-күүстэнэн Кини иннигэр баран иһиэҕэ».

¹⁸Захария Аанньалтан: «Бу чахчытын мин хайдах билэбин? — диэн ыйыппыта. — Бэйэм кырыйдым эбээт, хотунум да сааһа ыраатта».

¹⁹«Мин Таҥара иннигэр турар Гавриилбын, — диэбитэ Аанньал. — Кини миигин эйиэхэ маны этиттэрэ, бу үөрүүлээх илдьити биллэртэрэ ыыппыта.

²⁰Бу эппиппин итэҕэйбэтэҕиҥ иһин, Мин эппит тылым туолуор диэри, эн тылгыттан матан, кыайан саҥарбат буолуоҥ».

²¹Дьон Захарияны күүтэн турбуттара, кини Таҥара Дьиэтигэр өр буолбутун дьиктиргээбиттэрэ.

²²Захария тахсан баран, дьоҥҥо тугу да кыайан эппэтэҕиттэн иһирдьэ көрүү көрбүт эбит диэн өйдөөбүттэрэ; кини саҥа таһаарбакка, илиитинэн эрэ кэпсэтэр этэ.

²³Таҥара иннигэр сулууспалыыр күннэрэ ааһаннар, Захария дьиэтигэр төннүбүтэ.

²⁴Бу кэнниттэн сотору кэргэнэ Елисавета ыарахан буолбута; кини биэс ый устата кистэнэ сылдьан:

²⁵«Дьон-сэргэ ыар тылыттан быыһаары, Айыы Тойон миэхэ маннык үтүөтүк сыһыаннаста», — диирэ.

²⁶Онтон алтыс ыйыгар Таҥара Аанньалын Гавриилы Галилея Назарет диэн куоратыгар

²⁷Давид удьуора Иосиф кэргэн ылар кэпсэтиилээх Кыыһыгар ыыппыта; Кыыс аата Мария диэн этэ.

²⁸Аанньал кини дьиэтигэр киирэн: «Үөр-көт, Үрдүк Алгыстаах! — диэбитэ. — Айыы Тойон Эйигинниин! Эн дьахталлартан алгыстаахтарынаҕын![2]»

²⁹Мария Аанньалы көрөн, кини тылыттан симиттэн, бу эҕэрдэни хайдах да быһаарыан булбатаҕа.

³⁰Аанньал эппитэ: «Мария, куттаныма! Эн Таҥара үрдүк алгыһын ыллыҥ:

³¹Эйиэхэ оҕо үөскээн Уолу төрөтүөҥ, Киниэхэ Иисус диэн ааты биэриэҥ.

³²Кини улуу буолуоҕа, Үрдүк Таҥара Уола диэн ааттаныаҕа; Айыы Тойон Таҥара Киниэхэ өбүгэтин Давид бүрүстүөлүн биэрэн

³³үйэлэр тухары Иаков удьуордарыгар ыраахтааҕылыаҕа; Кини Саарыстыбата муҥур уһуга суох буолуоҕа».

³⁴Мария Аанньалга: «Хайаан оннук буоларый, Мин эрэ суохпун эбээт?» — диэбитэ.

³⁵«Эйиэхэ халлаантан Сибэтиэй Тыын түһүөҕэ, Үрдүк Таҥара күүһэ сайыаҕа, — диэбитэ Аанньал, — онон Эн төрөтөр Сибэтиэй Оҕоҥ Таҥара Уола диэн ааттаныаҕа.

³⁶Бэл диэтэр аймаҕыҥ Елисавета, оҕото суох дэнэр бэйэтэ, кырдьан баран уол оҕону көтөхпүтэ алтыс ыйыгар барда.

³⁷Таҥара кыайбатаҕа диэн суох».

³⁸«Мин Айыы Тойон кулутунабын. Эн эппиккинэн буоллун», — диэбитэ Мария. Аанньал Киниттэн барбыта.

³⁹Ол күннэргэ Мария бэрт тиэтэлинэн Иудея хайалаах өттүгэр баар куоракка аттаммыта.

⁴⁰Кини Захария дьиэтигэр киирэн Елисаветаны эҕэрдэлиир

⁴¹саҥата иһиллээтин кытта, Елисавета иһигэр оҕото мөхсөн ылбыта, оттон бэйэтэ, Сибэтиэй Тыынынан туолан,

⁴²улаханнык саҥа аллайбыта: «Эн дьахталлартан алгыстаахтарынаҕын, төрөтө илик Оҕоҥ эмиэ алгыстаах!

⁴³Бу мин ким буоламмын, Айыы Тойонум Ийэтэ миэхэ Бэйэтинэн тиийэн кэллэ?

⁴⁴Эн эҕэрдэлиир саҥаҥ кулгаахпар иһиллээтин кытта, испэр оҕом үөрэн мөхсөн ылла.

⁴⁵Оо, алгыстаах да буоллаҕа Айыы Тойон эппитэ туоларын итэҕэйбит Кыыс!»

⁴⁶Мария эппитэ: «Дууһам Айыы Тойону айхаллыыр,

⁴⁷Таҥарабыттан — Быыһааччыбыттан — сүргэм көтөҕүллэр.

⁴⁸Кини Миигин, кыра биллибэт Кулутун, бэлиэтии көрдө, онон аны бары көлүөнэлэр Миигин Алгыстаах диэн ааттыахтара.

⁴⁹Сүдү Күүстээх Таҥара миэхэ маннык улуу үтүөнү оҥордо — Кини аата сибэтиэй!

⁵⁰Кинини ытыктыыр дьоҥҥо Таҥара удьуортан удьуорга амарах сыһыаннаах.

⁵¹Күүстээх илиитин уунна да, Кини киэмсиктэр өйдөрүн-санааларын үрэйдэ,

⁵²баһылыктары бүрүстүөллэриттэн суулларда, намыһахтары өрө таһаарда.

⁵³Аччыктарга байылыат олоҕу биэрдэ, баайдары кураанах ыыталаата.

⁵⁴Өбүгэлэрбитигэр, Авраамҥа уонна кини удьуордарыгар, үйэлэр тухары амарахтык сыһыаннаһыах буолбутун толорон, чаҕарыгар — Израильга — көмөлөстө».

⁵⁵

⁵⁶Мария Елисаветаны кытта үс ый бииргэ олорон баран, дьиэтигэр төннүбүтэ.

⁵⁷Елисавета оҕолонор кэмэ уолдьаһан, уол оҕону төрөппүтэ.

⁵⁸Ыаллара уонна аймахтара Айыы Тойон киниэхэ хайдах курдук амарахтык сыһыаннаспытын истэн, кинилиин тэҥҥэ үөрсүбүттэрэ.

⁵⁹Ахсыс күнүгэр кыра оҕоҕо быһыллыы сиэрин-туомун оҥоро кэлбит дьон уолу аҕатын аатынан Захария диэн ааттаары гыммыттарыгар

⁶⁰ийэтэ: «Суох, кини Иоанн диэн буолуоҕа», — диэбитэ.

⁶¹«Эн уруугар-аймаххар итинник ааттаах ким да суох ээ», — диэбиттэрэ.

⁶²Илиилэринэн имнэнэн аҕата оҕотун ким диэн ааттыан баҕарарын ыйыппыттара.

⁶³Аҕата хаптаһын көрдөөн ылан: „Кини аата Иоанн“, — диэн суруйбута.

⁶⁴Онуоха кини тыла өһүллэн, Таҥараны алҕаан киирэн барбыта.

⁶⁵Ыаллыы олорооччулар бука бары маны истэн дьулайбыттара; бу туһунан сурах Иудея хайалаах дойдутун бүтүннүү тилийэ көппүтэ.

⁶⁶Истибит эрэ барыта итини тойонноон: «Бу оҕоттон туох эрэ тахсар?» — диэн кэпсэтэрэ. Айыы Тойон алгыстаах илиитэ кинини араҥаччылыыра.

⁶⁷Иоанн аҕата Захария Сибэтиэй Тыынынан туолан, маннык төлкөлөөн эппитэ:

⁶⁸«Айыы Тойоҥҥо, Израиль Таҥаратыгар, алгыс буолуохтун! Кини биһиэхэ көмөҕө кэллэ, норуотугар көҥүлү биэрдэ.

⁶⁹Былыр сибэтиэй пророктарынан эрэннэрбитин курдук, чаҕарын Давид дьиэтиттэн биһиэхэ улуу Быыһааччыны биэрдэ —

⁷⁰

⁷¹бары өстөөхтөн, абааһы көрөөччүлэртэн Өрүһүйээччини!

⁷²Кини өбүгэлэрбитигэр амарахтык сыһыаннаһыах, эппит сибэтиэй кэс тылын өйдүү сылдьыах буолан,

⁷³аҕабытыгар Авраамҥа андаҕайбыта.

⁷⁴Онон өстөөхтөрбүтүттэн быыһанан үйэ-саас тухары Кини иннигэр сибэтиэй, кырдьыксыт дьон буолар туһугар, туохтан да толлон-торуттан турбакка, биһиги Киниэхэ сулууспалыахпыт.

⁷⁵

⁷⁶Оттон эн, кыһыл оҕо, Үрдүк Таҥара пророга диэн ааттаныаҥ: Айыы Тойон иннигэр бараҥҥын, Кини суолун солуоҥ,

⁷⁷Кини норуота быыһанарын, аньыыта-буруйа бырастыы буоларын иһитиннэриэҥ.

⁷⁸Айыы санаалаах, амарах сүрэхтээх Таҥарабыт биһиэхэ үөһэттэн сырдык сарыалы ыытыаҕа,

⁷⁹оччоҕо Кини — тахсан эрэр сырдык — хараҥаҕа, өлүү күлүгэр олорор дьону сырдатыаҕа, биһигини эйэ суолугар үктэннэриэҕэ».

⁸⁰Оҕо улаатан, улам бөҕөргөөн, ис тыына күүһүрэн испитэ; Израиль норуотугар биллэр кэмэ кэлиэр диэри, кини дьоно-сэргэтэ суох иччитэх сиргэ олорбута.