Read Библия- Yakut 2021 Лука 19 Bible Online

Лука 19 - Библия- Yakut 2021 bible

Лука 19

¹Онтон Иисус Иерихоҥҥа киирэн, куорат устун баран испитэ.

²Биир Закхей диэн ааттаах баай киһи, түһээн хомуйааччылар тойонноро,

³Иисуһу ким буоллаҕай диэн, көрүөн олус баҕарбыта да, уҥуоҕунан кыра буолан, дьон кэннигэр түбэһэн хаалан, кыайан көрбөтөҕө;

⁴ол иһин сүүрүүнэн илин түһэн, Иисус ааһыахтаах суолун кытыытыгар үүнэн турар смоковница үрдүгэр ыттыбыта.

⁵Иисус бу сиргэ кэлэн, кинини көрөн: «Закхей! — диэн ыҥырбыта. — Түһэ оҕус, бүгүн Мин эн дьиэҕэр тохтуохтаахпын».

⁶Закхей үөрэ-көтө түһэ охсон, Иисуһу дьиэтигэр киллэрэн маанылаабыта.

⁷Бары ону көрөн, сөбүлээбэккэлэр: «Аньыылаах киһи дьиэтигэр тохтоото», — диэн суугунаспыттара.

⁸Оттон Закхей туран Айыы Тойоҥҥо эппитэ: «Тойонуом! Мин баайым аҥаарын умнаһыттарга биэриэм, итиэннэ кими эмэ атаҕастаабыттаах буоллахпына, киниэхэ түөрт оччону төлүөм».

⁹«Бүгүн бу дьиэҕэ быыһабыл кэллэ, — диэбитэ Иисус киниэхэ. — Кини эмиэ Авраам уола эбээт.

¹⁰Киһи Уола өлбүтү-сүппүтү булан быыһыы кэлбитэ».

¹¹Иисус Иерусалимҥа чугаһаабытын иһин дьон Таҥара Саарыстыбата субу кэлиэ дии саныыллара. Кини истэн олорооччуларга өссө биир домоҕу кэпсээбитэ.

¹²«Биир үрдүк сололоох киһи, ыраахтааҕы солотун ылан төннөөрү, ыраах дойдуга аттаммыт, — диэбитэ Кини. —

¹³Суолга туруон иннинэ уон кулутун ыҥыран ылбыт, уонна барыларыгар биирдии кыһыл көмүс манньыаты биэрэн баран: „Мин төннүөхпэр диэри, бу маны эргитээриҥ“, — диэбит.

¹⁴Биир дойдулаахтара кинини абааһы көрөр буолан: „Кини биһиэхэ ыраахтааҕы буолуон баҕарбаппыт“, — диэн кэнниттэн илдьит ыыппыттар.

¹⁵Киһи ыраахтааҕы солотун ылан кэлээт, ким төһөнү эргитэн булбутун билээри, харчы биэрбит кулуттарын ыҥыртаран ылбыт.

¹⁶Бастакы кулута кэлэн эппит: „Тойонуом! Эн биир кыһыл көмүс манньыатыҥ уон манньыаты аҕалла“.

¹⁷Тойоно киниэхэ эппит: „Бэрт сөпкө гыммыккын, үтүө үлэһитим! Кыраҕа да итэҕэллээҕиҥ иһин, уон куораты эйиэхэ салайтара биэрэбин“.

¹⁸Иккис кулута кэлэн эппит: „Тойонуом! Эн биир кыһыл көмүс манньыатыҥ биэс манньыаты аҕалла“.

¹⁹Онуоха тойоно: „Эн эмиэ биэс куораты салайа ылаҕын“, — диэбит.

²⁰Үһүс кулута кэлэн эппит: „Тойонуом! Эн миэхэ биэрбит кыһыл көмүс манньыатыҥ бу баар, мин маны харыстаан былаакка суулаан уура сырыттым.

²¹Эн дьэбиргин — уурбатах сиргиттэн ыларгын, ыспатах бааһынаҕыттан хомуйаргын билэр буоламмын, эйигиттэн куттаммытым“.

²²Тойоно эппит: „Бу эппит тылгынан бэйэҕин дьүүллүөм, көлөөк үлэһит! Мин дьэбирбин — уурбатах сирбиттэн ыларбын, ыспатах бааһынаҕыттан хомуйарбын билэр эрээригин,

²³төннөммүн, төһөнү биэрбиппин барыстары ылыахпын, харчыбын тоҕо эргитэ биэрбэтиҥ?“

²⁴Уонна онно турар дьоҥҥо: „Киниттэн кыһыл көмүһүн ылаҥҥыт, уон көмүс манньыаттаах киһиэхэ биэриҥ“, — диэбит.

²⁵Онуоха: „Тойоммуот, ол киһи хайыы-үйэ уон көмүс манньыаттаах ээ“, — диэбиттэр.

²⁶Тойонноро эппит: „Эһиэхэ этэбин: баардаахха — бэриллиэҕэ, оттон туга да суох киһиттэн туох эмэ баардааҕа кытта былдьаныаҕа.

²⁷Оттон мин ыраахтааҕы буолуохпун баҕарбат өстөөхтөрбүн манна аҕалан, көрөн турдахпына, өлөртөөҥ“».

²⁸Маны кэпсээн баран, Иисус Иерусалимныыр суолу тутуһан салгыы айаннаабыта.

²⁹Елеон хайатын аттыгар баар Виффагиялаах Вифанияҕа чугаһаан иһэн, Кини икки үөрэнээччитин сорукка ыыппыта.

³⁰«Бу иннибитигэр көстөр дэриэбинэҕэ бара сылдьыҥ, — диэбитэ. — Онно киирээт да, өссө мииниллэ илик осел баайыллан турарын көрүөххүт, ону сүөрэн манна аҕалыҥ;

³¹ким эмэ тоҕо сүөрэҕит диэн ыйыттаҕына, Тойоммут наадыйар диэриҥ».

³²Үөрэнээччилэр тиийэн, Кини эппитин булан ылбыттара.

³³Осел оҕотун сүөрэн эрдэхтэринэ, иччилэрэ: «Хайа бу оселу тоҕо сүөрэҕит?» — диэбиттэрэ.

³⁴«Тойоммут наадыйар, ол иһин», — диэн хоруйдаабыттара.

³⁵Оселу Иисуска сиэтэн аҕалан, үрдүгэр таҥастарын ууран баран, Иисуһу олордубуттара.

³⁶Кини оселу миинэн истэҕинэ, дьон таҥастарын устан суолга тэлгээн биэрэллэрэ.

³⁷Иисус Елеон хайатыттан түһэр аартыкка чугаһаабытыгар үтүмэн үгүс үөрэнээччилэрэ бары үөрэн, илэ көрбүт дьикти дьайыыларын иһин Таҥараны айхаллаабыттара:

³⁸«Айыы Тойон аатыгар кэлэн иһэр Ыраахтааҕы алгыстаах! Халлааҥҥа эйэ буоллун, үрдүк Халлааннарга айхал буоллун!»

³⁹Дьон быыһыгар турар сорох фарисейдар: «Үөрэтээччи! Үөрэнээччилэргин буой эрэ», — диэбиттэрэ.

⁴⁰«Кырдьыгы эһиэхэ этэбин, — диэбитэ Иисус, — кинилэр уурайдахтарына, таастар хаһыытаһыахтара».

⁴¹Иисус Иерусалимҥа чугаһаан баран, куораты көрөн аһынан ытаабыта:

⁴²«Оо, эйигин[49] эйэҕэ туох тиэрдэрин саатар бүгүн билэриҥ буоллар! Ол эрээри билигин бу барыта эйигиттэн кистэммит.

⁴³Өстөөхтөрүҥ эйигин тула бөҕөргөтүү туттан, эргиччи ыган иилии эргийэр күннэрэ тирээн кэлиэ.

⁴⁴Эйигин оҕолоргунуун имири эһиэхтэрэ, эн тааскыттан тааһы хаалларыахтара суоҕа. Ол барыта эн Таҥара быыһыы кэлбитин билбэтэххиттэн буолуо».

⁴⁵Онтон Таҥара Дьиэтигэр киирэн, онно баар атыылааччылары уонна атыылаһааччылары барыларын үүртэлии сылдьан:

⁴⁶«Мин Дьиэм үҥэр дьиэ буолар диэн суруллубута, ону эһиги ороспуойдар ордуулара гыммыккыт!» — диэбитэ.

⁴⁷Күн аайы Кини Таҥара Дьиэтигэр үөрэтэрэ. Архиерейдар, сокуонньуттар уонна норуот биллэр аҕа баһылыктара Кинини өлөрөр сылтах көрдүү сатаабыттара эрээри,

⁴⁸тугу да кыайан тобулбатахтара — бар дьон Кини хас биирдии тылын истээри, харыс да хаалбакка, батыһа сылдьара.