Read Библия- Yakut 2021 Лука 22 Bible Online

Лука 22 - Библия- Yakut 2021 bible

Лука 22

¹Паасха диэн ааттанар Көтөхтөрүүтэ суох Килиэп бырааһынньыга чугаһаабыта.

²Архиерейдар уонна сокуонньуттар норуоттан чаҕыйар буолан, Иисуһу хайдах эмэ гынан биллибэтинэн өлөрөр сылтаҕы көрдүү сатаабыттара.

³Дьэ ол саҕана Искариот диэн ааттаах Иудаҕа, Уон Иккиэлэртэн биирдэстэригэр, сатана киирбитэ.

⁴Иуда архиерейдарга уонна Таҥара Дьиэтин харабылын тойотторугар тиийэн, Иисуһу хайдах тутан биэрэр туһунан кэпсэппитэ.

⁵Кинилэр үөрэн харчы төлүөх буолбуттара.

⁶Иуда кинилэргэ тылын биэрэн, Иисуһу дьон көрбөт кэмигэр туттараары, тоҕоостоох түгэни көрдүү сатыы сылдьыбыта.

⁷Көтөхтөрүүтэ суох Килиэп бырааһынньыгар, Паасхаҕа, анаммыт бараан оҕото өлөрүллэр күнэ үүммүтэ.

⁸Иисус Петрдаах Иоанны: «Баран, биһиэхэ паасханы[52] бэлэмнээҥ», — диэн соруктаан ыыппыта.

⁹«Паасханы ханна бэлэмниэхпитин баҕараҕыный?» — кинилэр ыйыппыттара.

¹⁰Иисус эппитэ: «Куоракка киирэн иһэн, купсууннаах ууну илдьэ иһэр киһини көрсүөххүт. Кинини батыһан, ханна киирэр да, онно киирсээриҥ;

¹¹дьиэҕэ киирэн, хаһаайыҥҥа „Үөрэтээччи үөрэнээччилэрин кытта Паасха аһын аһыахтаах хоһо ханнатын ыйыттарар“ диэтэххитинэ,

¹²кини эһиэхэ бырааһынньыкка анаан хайыы-үйэ толору тэриллибит киэҥ-куоҥ үөһээҥҥи хоһу көрдөрүөҕэ, онно бэлэмнээриҥ».

¹³Кинилэр куоракка тиийэн, Иисус тугу эппитин барытын булан паасханы бэлэмнээбиттэрэ.

¹⁴Кэмэ кэлбитигэр Иисус онно тиийэн Апостолларын кытта аһаары өттүгэстээн сыппыта.

¹⁵Кини эппитэ: «Эрэйи-буруйу көрө иликпинэ, эһигини кытта бииргэ бу Паасха аһын аһыахпын олус баҕарбытым.

¹⁶Эһиэхэ этэбин: бу Паасха аһылыгын, аны Таҥара Саарыстыбатыгар буолуор диэри, Мин аһыам суоҕа».

¹⁷Итиэннэ иһити ылан Таҥараҕа махтанан баран, эппитэ: «Маны ылан үллэстэн иһиҥ.

¹⁸Эһиэхэ этэбин: Таҥара Саарыстыбата кэлиэр диэри, Мин аны виноград арыгытыттан испэппин».

¹⁹Итиэннэ килиэби ылан, Таҥараҕа махтанан баран, тоһутан кинилэргэ биэрбитэ уонна эппитэ: «Бу — эһиги тускутугар бэриллэр Мин Этим-сииним; Миигин ахтан-санаан туран, эһиги маннык гынар буолуҥ».

²⁰Аһылык кэнниттэн кинилэргэ иһити биэрэн баран, эппитэ: «Бу иһит — эһиги тускутугар тохтор Мин Хааным бигэргэппит Саҥа Кэс Тыла.

²¹Миигин таҥнарар киһи Миигинниин биир остуолга олорор;

²²Киһи Уола анаммытынан баран иһэр, ол эрээри Кинини таҥнарааччыны сор-муҥ кэтэһэр».

²³Үөрэнээччилэр бэйэ-бэйэлэрин икки ардыгар ким оннук быһыыланыан сөбүн кэпсэтэн барбыттара.

²⁴Үөрэнээччилэр кинилэртэн хайалара ордук улахан аатырыахтааҕын туһунан мөккүспүттэрэ.

²⁵Иисус эппитэ: «Ыраахтааҕылар норуоттары баһылыыллар, бастаахтар үтүөнү оҥорооччуларбыт дэнэллэр.

²⁶Оттон эһиэхэ оннук буолуо суохтаах: улахаҥҥыт — кыраҕыт курдук буоллун, баһылыккыт — үлэһиккит курдук буоллун.

²⁷Хайалара улаханый: аһаары өттүгэстээн сытааччы дуу, эбэтэр кинини аһатар үлэһитэ дуу? Өттүгэстээн сытааччы буолбатах дуо? Оттон Мин эһиэхэ үлэһиккит кэриэтэбин.

²⁸Миигин тургутар бары ыарахан суолларга эһиги Миигинниин бииргэ сылдьыбыккыт,

²⁹онон Аҕам Миэхэ биэрбит Саарыстыбатын Мин эһиэхэ биэрэбин.

³⁰Мин Саарыстыбабар эһиги Миигинниин биир остуолга аһыаххыт, бүрүстүөлгэ олорон Израиль уон икки аҕатын ууһун дьүүллүөххүт».

³¹Онтон Айыы Тойон эппитэ[53]: «Симон! Симон! Сатана эһигини сэлиэһинэй бурдугунуу сиксийээри, көрдөспүтэ,

³²ол эрээри Мин, эн итэҕэлиҥ энчирээбэтин туһугар, үҥпүтүм. Эн эмиэ кэлин, эргиллэн кэллэххинэ, бырааттаргын бөҕөргөтөөр».

³³«Тойонуом! — диэбитэ Петр. — Мин Эйигин кытта хаалларга да, өлөргө да бэлэммин».

³⁴Иисус эппитэ: «Эйиэхэ этэбин, Петр: бүгүн бөтүүк хаһыытыан иннинэ, эн Миигин билбэппин диэн үстэ мэлдьэһиэҥ».

³⁵Онтон үөрэнээччилэригэр эппитэ: «Мин эһигини кумааһынньыга да, матаҕата да, атах таҥаһа да суох ыыппыппар эһиги туох эмэ кыһалҕаҕа ыллара сылдьыбыккыт дуо?» «Суох, туох да кыһалҕаны билбэтэхпит», — дэспиттэрэ.

³⁶Иисус эппитэ: «Оттон билигин ким кумааһынньыктаах — онтун угуннун, матаҕатын эмиэ ыллын; оттон ким онтуката суох, ол сонун атыылаан батас атыыластын.

³⁷Эһиэхэ этэбин: Суруйууларга „Кинини хара дьайдаахтарга тэҥнээбиттэрэ“ диэн Мин туспунан этиллибит туолуох тустаах. Мин туспунан суруллубута барыта туолан эрэр».

³⁸Кинилэр эппиттэрэ: «Тойоммуот, манна икки батас баар». «Сөп буолуо», — диэбитэ Иисус.

³⁹Кини мантан тахсан, үгэһинэн Елеон хайатыгар барбыта, үөрэнээччилэрэ кэнниттэн батыспыттара.

⁴⁰Онно тиийэн баран, кинилэргэ эппитэ: «Тургутууну тулуйар туһугар, үҥүҥ».

⁴¹Итиэннэ Бэйэтэ, бырахтахха, таас тиийэр сиригэр баран, сөһүргэстээн туран үҥпүтэ:

⁴²«Аҕаа! Оо, арай Эн бу эрэй-буруй иһитин Миигин тумуннарарыҥ буоллар! Ол эрээри Мин көҥүлбүнэн буолбатын, Эн көҥүлгүнэн буоллун».

⁴³Халлаантан Аанньал көстөн, Кинини бөҕөргөппүтэ.

⁴⁴Иисус ис-иһиттэн муунтуйан, ордук кыһаллан үҥпүтэ, Кини көлөһүнэ сиргэ саккырыы тохтор хаан курдуга[54].

⁴⁵Үҥэн бүтэн баран, үөрэнээччилэрин кэлэн көрбүтэ, санааҕа хам баттатан, утуйа сыталлара.

⁴⁶«Тоҕо утуйа сытаҕыт? — диэбитэ Кини. — Тургутууну тулуйар туһугар, туран үҥүҥ».

⁴⁷Арай бу этэ турдаҕына, дьон кэлэн иһэрэ көстүбүтэ, инники Уон Иккиэлэртэн биирдэстэрэ Иуда иһэрэ. Кини Иисуһу уураары, ыкса тиийэн кэлбитэ. Иуда «мин кими ууруубун да, ол Иисус буолуоҕа» диэн дьоҥҥо эрдэттэн бэлиэ биэрбит этэ.

⁴⁸Иисус киниэхэ эппитэ: «Иуда! Эн Киһи Уолун уурааҥҥын таҥнараҕын дуу?»

⁴⁹Онуоха үөрэнээччилэр туох буолан эрэрин өйдөөн: «Тойоммуот! Батаһынан охсуһабыт дуо?» — диэн ыйыппыттара.

⁵⁰Биир үөрэнээччитэ архиерей кулутун уҥа кулгааҕын быһа охсубута.

⁵¹«Түксү, тохтооҥ», — диэбитэ Иисус итиэннэ кулут кулгааҕын тарбаҕынан таарыйан үтүөрдэн кэбиспитэ.

⁵²Онтон Кинини утары мустубут архиерейдарга, Таҥара Дьиэтин харабылын тойотторугар уонна аҕа баһылыктарга эппитэ: «Ороспуойу тутарга дылы, эһиги Миэхэ болоттонон, үөрбэлэнэн кэлбиккит.

⁵³Мин эһигини кытта күн аайы Таҥара Дьиэтигэр сылдьар этим да, эһиги Миигин тыыппатаххыт; оттон билигин — эһиги кэмҥит, хараҥа былааһа».

⁵⁴Иисуһу тутан архиерей дьиэтигэр илдьибиттэрэ. Петр ыраахтан батыһан испитэ.

⁵⁵Тиэргэн ортотугар кулуһун оттубуттарыгар дьон уот тула олорбуттара, Петр кинилэр аттыларыгар олорбута.

⁵⁶Биир чаҕар кыыс кини уот таһыгар олордоҕуна, одуулаһан баран: «Бу киһи эмиэ Кинини кытта сылдьара», — диэбитэ.

⁵⁷«Мин Кинини билбэппин», — диэн Петр кыккыраччы мэлдьэспитэ.

⁵⁸Чочумча буолан баран аны атын киһи кинини көрөн эппитэ: «Эн эмиэ итилэр киһилэринэҕин». «Эчи суох!» — диэбитэ Петр.

⁵⁹Чаас кэриҥинэн өссө биир киһи дьаныһан турбута: «Бу Галилея киһитэ, чахчы, Кинини кытта сылдьара».

⁶⁰Ол эрээри Петр: «Эн ити тугу этэргин билбэппин», — диэн эмиэ мэлдьэһэн кэбиспитэ. Бу этэ турдаҕына, бөтүүк хаһыытаабыта.

⁶¹Онуоха Айыы Тойон эргиллэн, Петр диэки көрбүтэ; Петр киниэхэ Айыы Тойон «бөтүүк хаһыытыан иннинэ эн миигиттэн үстэ аккаастаныаҥ» диэн эппитин өйдөөн кэлбитэ

⁶²уонна таска тахсан уйа-хайа суох ытаабыта.

⁶³Иисуһу тутан турар дьон Кинини үөҕэн, кырбаан барбыттара.

⁶⁴Хараҕын саба баайан баран, сирэйгэ охсуолуу-охсуолуу: «Пророк, эт: ким Эйигин оҕуста?» — дииллэрэ.

⁶⁵Уонна араас элбэх куһаҕан тылынан үөхпүттэрэ-түүрбүттэрэ.

⁶⁶Саҥа күн үүнээтин кытта, норуот аҕа баһылыктара, архиерейдар, сокуонньуттар түмсэн баран, Кинини синедрион иннигэр туруорбуттара.

⁶⁷«Эн Христоскун дуо? — диэн ыйыппыттара. — Биһиэхэ эт!» Иисус эппитэ: «Эттэхпинэ даҕаны, эһиги итэҕэйиэххит суоҕа;

⁶⁸оттон ыйыттахпына, Миэхэ хоруйдуоххут суоҕа уонна Миигин босхолуоххут суоҕа[55].

⁶⁹Мантан ыла Киһи Уола Күүстээх Таҥара уҥа өттүгэр олоруоҕа».

⁷⁰Маныаха бука бары: «Ол аата Эн Таҥара Уолунаҕын дуо?» — дии түспүттэрэ. «Ону бэйэҕит эттигит», — диэбитэ Кини.

⁷¹«Бу кэннэ биһиэхэ өссө туох туоһута нааданый? — дэспиттэрэ. — Тугу эппитин бэйэбит иһиттибит!»