Read Библия- Yakut 2021 Лука 23 Bible Online

Лука 23 - Библия- Yakut 2021 bible

Лука 23

¹Мунньах дьоно бука бары туран, Кинини Пилакка илдьэн,

²буруйдаан барбыттара: «Биһиги Кини буруйун арыйдыбыт: Бэйэтин Христос Ыраахтааҕыбын дэнэн норуоппутун иирдэр, император түһээнин төлөөмөҥ диир».

³Пилат Киниттэн: «Эн, кырдьык, иудей Ыраахтааҕытынаҕын дуо?» — диэн ыйыппыта. «Эн итинник этэҕин», — Иисус хоруйдаабыта.

⁴Архиерейдарга уонна мустубут дьоҥҥо Пилат: «Мин көрдөхпүнэ, бу Киһи туох да буруйу оҥорботох», — диэбитэ.

⁵Оттон кинилэр биири этэ турбуттара: «Кини бүтүн Иудея устун үөрэтэн, Галилеяттан маныаха диэри норуоту иирдэр».

⁶Галилея туһунан истэн, Пилат: «Бу Галилея киһитэ дуо?» — диэн ыйыппыта.

⁷Кини Иисуһу, Ирод уобалаһыттан төрүттээҕин билэн, ол кэмҥэ Иерусалимҥа кэлэ сылдьар Иродка ыыппыта.

⁸Ирод, Кини туһунан элбэхтик истэн, уруккуттан көрүөн баҕарара, онон Иисуһу көрөн улаханнык үөрбүтэ, туох эмэ дьиктини көрдөрөрө буоллар диэн, иһигэр эрэнэ саныыра.

⁹Ирод элбэҕи ыйыталаспытын үрдүнэн, Иисус киниэхэ тугу да хоруйдаабатаҕа.

¹⁰Архиерейдар уонна сокуонньуттар Кинини дьаныардаахтык буруйдаабыттара.

¹¹Ирод буойуннарыныын Иисуһу атаҕастаан, дуоһуйуор диэри күлүү-элэк оҥостон баран, маанытык таҥыннаран, Пилакка төттөрү ыыппыта.

¹²Бу күнтэн ыла урут өстөөх дьон Пилаттаах Ирод доҕордуу буолбуттара.

¹³Пилат архиерейдары, аҕа баһылыктары уонна норуоту мунньан баран,

¹⁴эппитэ: «Эһиги бу Киһини норуоту иирдэр диэн, буруйдаан, миэхэ аҕалбыккыт. Мин эһиги бэйэҕит көрөн турдаххытына, Кинини доппуруостаатым да, ити этэр буруйгутуттан биири даҕаны булбатым;

¹⁵Кинини Иродка ыыта сылдьыбыппар Ирод эмиэ тугу да булбата[56]. Өлөрөргө ууруллар ханнык эмэ буруйу оҥорбута көстүбэтэ,

¹⁶онон накаастатан баран, босхолуом».

¹⁷Бырааһынньыкка Пилат кинилэргэ биир хаайыылааҕы босхолуохтааҕа[57].

¹⁸Норуот күргүөмүнэн: «Кини өллүн! Биһиэхэ Варавваны босхолоо!» — диэн үөгүлээн барбыта. (

¹⁹Варавва, куоракка өрө турууну тэрийэн, киһини өлөрөн, хаайыыга сытара.)

²⁰Пилат Иисуһу босхолуон баҕаран, кинилэртэн хат ыйыппыта.

²¹Кинилэр биири үөгүлүү турбуттара: «Кириэскэ тиир, кириэскэ тиир — Кинини!»

²²Пилат үсүһүн эппитэ: «Кини туох куһаҕаны оҥорбутай? Өлөрөргө ууруллар буруйу оҥорботох, онон накаастаан баран — босхолуом».

²³Онуоха күүстэрин муҥунан хаһыытаһан, Иисуһу кириэскэ тиирэри модьуйбуттара; онон кинилэр уонна архиерейдар хаһыылара[58] баһыйан,

²⁴Пилат көрдөһүүнү толорорго быһаарыммыта.

²⁵Көрдүүр киһилэрин — аймалҕаны таһаарбытын, киһини өлөрбүтүн иһин хаайыллыбыт Варавваны — Пилат босхолообута, оттон Иисуһу кинилэр илиилэригэр биэрбитэ.

²⁶Кинини өлөрө илдьэн иһэннэр, Киринеяттан төрүттээх Симон диэн киһини, ходуһаттан истэҕинэ, Иисус кириэһин сүктэрээри, аара тутан ылбыттара.

²⁷Иисуһу үтүмэн үгүс киһи батыһан иһэрэ, дьахталлар, Кинини аһынан, түөстэрин кырбана-кырбана, ытаһаллара.

²⁸Иисус кинилэргэ хайыһан эппитэ: «Иерусалим кыргыттара! Миигиттэн ытаһымаҥ, бэйэҕититтэн уонна оҕолоргутуттан ытаһыҥ.

²⁹„Оҕоломмоттор, төрөөбөт киэлилээхтэр, эмтэрбэт эмиийдээхтэр дьоллоохтор!“ — диир күннэрэ кэлэн иһэллэр.

³⁰Оччоҕо хайаларга: „Үрдүбүтүгэр сууллуҥ!“, булгунньахтарга: „Биһигини саһыарыҥ!“ — диир буолуохтара.

³¹Киил маһы маннык кэбилиир буоллахтарына, хаппыт мас хайдах буолуой?»

³²Кинини кытта икки икки киһини, буруйдаахтары, өлөрө илдьибиттэрэ.

³³«Бас уҥуоҕа» диэн ааттаах сиргэ кэлэн, Иисуһу уонна буруйдаахтары тиирбиттэрэ: биирдэрин Кини уҥа өттүгэр, атынын — хаҥас өттүгэр.

³⁴Иисус эппитэ: «Аҕаа! Бырастыы гын кинилэри — тугу гыналларын билбэттэр». Түөрэх бырахсаннар, таҥаһын үллэстибиттэрэ.

³⁵Маны норуот көрөн турбута. Аҕа баһылыктар элэк оҥостон этэллэрэ: «Атыттары быыһыыра дии, Таҥара талбыт Христоһа буоллаҕына Бэйэтин быыһаннын!»

³⁶Буойуннар эмиэ күлүү гынан, уксууһу уоһугар үҥүлүтэ-үҥүлүтэ:

³⁷«Иудей Ыраахтааҕыта буоллаххына, Бэйэҕин быыһан!» — дэһэллэрэ.

³⁸Кириэскэ Кини үрдүнэн: «Бу иудей Ыраахтааҕыта», — диэн гректии, латыынныы, еврейдии[59] сурук турара.

³⁹Кириэскэ ыйаабыт буруйдаахтарыттан биирдэстэрэ Кинини: «Эн, Христос буоллаххына, Бэйэҕин уонна биһигини быыһаа!» — дии-дии үөҕэ турбута.

⁴⁰Атына киһитин буойан этэрэ: «Бэйэҥ эмиэ итинник буруйданан баран, Таҥараттан куттаммаккын дуо?

⁴¹Биһиги сөпкө буруйданныбыт, тугу оҥорбуппутугар сөптөөҕү ыллыбыт, оттон Кини буоллаҕына туох да куһаҕаны оҥорботоҕо».

⁴²Онтон Иисустан көрдөспүтэ: «Тойонуом, Саарыстыбаҕар тиийдэххинэ, миигин санаар!»

⁴³Иисус киниэхэ эппитэ: «Кырдьыгы эйиэхэ этэбин: эн күн бүгүн Миигинниин ырайга буолуоҥ».

⁴⁴Күнүс алта чаас саҕана сир үрдүнэн им балай хараҥа бүрүүкээн, тоҕуска диэри[60] ыаһыран турбута:

⁴⁵күн хараара өлбүтэ, Таҥара Дьиэтин иһинээҕи таҥас быыс ортотунан хайа барбыта.

⁴⁶Иисус улаханнык: «Аҕаа! Тыыммын Эйиэхэ туттарабын», — диэт, тыына быстыбыта.

⁴⁷Туох буолбутун барытын көрөн турбут сотник Таҥараны айхаллаан баран: «Чахчы да бу Кырдьыксыт Киһи эбит!» — диэбитэ.

⁴⁸Кэлбит дьон буолбуту көрөн, айманан, түөстэрин кырбана-кырбана, тарҕаспыттара.

⁴⁹Маны Иисуһу билэр дьон бары уонна Кинини Галилеяттан ыла батыһан кэлбит дьахталлар ыраахтан көрөн турбуттара.

⁵⁰Биир үтүө санаалаах, кырдьыгы тутуһар олорор Иосиф диэн ааттаах Сүбэ чилиэнэ —

⁵¹кинилэр куомуннаһыыларыгар кыттыгаһа суох, бэйэтэ эмиэ Таҥара Саарыстыбатын кэтэһэр киһи —

⁵²Пилакка кэлэн, Иисуһу ылаары көрдөспүтэ.

⁵³Көҥүллэтэн баран, Кинини кириэстэн арааран таҥаһынан суулаабыта уонна очуоска оҥо хаһан оҥоһуллубут, ким да харайылла илик хаспах хоруобугар сытыарбыта.

⁵⁴Ол бээтинсэ күн киэһэтэ, субуота үүнэн эрэр кэмэ этэ.

⁵⁵Галилеяттан кэлсиспит дьахталлар батыһан тиийэн, Иисуһу харайалларын көрбүттэрэ;

⁵⁶ол кэнниттэн төннөн кэлэн, үчүгэй сыттаах арыыларын, оҕунуохтарын бэлэмнээбиттэрэ; Сокуон быһыытынан ити кэннэ субуотаҕа тугу да гымматахтара.